[poem=font="Tahoma,4,orangered,bold,normal" bkcolor="transparent" bkimage="" border="none,4,gray" type=0 line=0 align=center use=ex num="0,black"]
يابو مشبب وانت من خير الاصحاب= وين انت من شهرين ماشفتلك زول
انا حصل لي ظرف والظرف غلاب = لو ماحصلي ظرف جيتك عاى طول
صرنا قراب بعاد وبعاد وقراب= وزين ان تلاقينا على داير الحول
ارسلت مرسولي وودا ولا جاب= واليوم سقنالك رسالة ومرسول
سلام واعذار ومشاريه وعتاب= لي حكمة فيها ومغزى ومدلول
فان قلت روّح ياسعد راحت رقاب= قضيتك سجلتها ضد مجهول
فتبنا لك البيضا على كل مرقاب = عذري سمين وعند الاجواد مقبول
يابو مشب كل شي له اسباب=شي بدون اسباب ماهو بمعقول
اكبر سبب حرب الدول ضد الارهاب = بمجوقلاتٍ تطرد فلول وفلول
عقرب ثرى وطيت على خشة الداب = وهو عمى ولاله ايدين ورجول
راخو ضحيتها شباب وشياب= احد خذا بالعرض واحد خذا طول
ماخذيت بالاخلاق خذيت بمشعاب= عان القنابل تضرب جبال كابول
كنا عصب كفٍّ وهم كانوا احزاب= واليوم صرنا عكس يحول يحول
سواة من يفتح على نفسه الباب = من عقب مابابه ببو تاج مقفول
وغزو الفكر ما ستقبله غير الاذناب = ناس خفاف عقول مامعهم عقول
قدام فترة لعبة الورع منطاب = واليوم عاده في ظهر بوه محمول
قد عنده بلستيشن وغرفة العاب = ومن كل مسلولٍ ومن كل مملول
وآخر زمانه يرقص الدسك والراب = من شان الاهلي سجلوا فالنصر قول
ومضيعٍ وقته على شاشة اللاب = ابليز ويت وميبي وكولمي كول
ومابين خدمة الانتر وخدمة ابواب = وخط الصداقة معظم الوقت مشغول
ومن برحة القزار لابرحة حجاب = ومن سنتر بلازا لسوق الخبر مول
والادمي لو ما متلى فمه تراب = في ذمتي مايترك الصول والجول
خاب الرجا في عالم واجده خاب = لكن دخيلك ويش تبغاني آقول
تقطعت الاعصاب من شد الاعصاب =جنب بقى متعافي وجنب مشلول
تقرسنتي ذا السنة بين الانياب = والوقت حملني على حملي حمول
الوقت بعض احيان ما حسب له حساب = واحيان لاضيعته آكون ماسول
وآقول جرحي طاب والجرح ماطاب = والعب على نفسي بحبة بنادول
فياليت عدوان العرب شمسها غاب = وياليتها شدة على النفس وتزول
وان كان راسي سابقٍ حله وشاب= نجحت فالدنيا بتقدير مقبول
بنعيش طلاب وبنموت طلاب = والانسان في دنياه محمول مزمول
والرابح اللي للردا صار مجناب = وعلى علوم الخير والطيب مجبول
شرواك ياللي للمطاليق رحاب = قول وفعل وربوعك اقوال وفعول
في جملة اهل الطيب لك موقع اعراب = فاعل جمايل والجمالات مفعول
ومادام عودنا على فتل الاشناب = لي شارب بين الرجاجيل مفتول
لي ماكر مايدهله كل مخلاب = وعلى الرقاب آمون وآقول وآطول
عند الرفيق مقدر وعند الاجناب = ومن دون وجهي كالمل الجهد مبذول
على الجميل انشط من الزير وذياب = واكسل على فعل الردية من الزول
وان راحت رقاب فترى باقي رقاب = يامبارك ازهم صاحي يجيك مهبول

سعد بن شفلوت[/poem]

__________________