أنا طالبكم بالوجه والجاه وأحسن الأسليب أن تقرون ذا الموضوع. هام لكل أعضاء مجالس قحطان

الله يمسيكم بالخير يالربع وش كل وحاله عساكم طيبين

العلم سلامتكم

في ليلة طيبة وأنا ممسي في البيت وبعد ما تعشيت وسمرت واللي علي بالخير سمعت الجرس يدق افتح الباب إلا و فارس قحطان عند الباب لحاله يوم شفته قلت يالله بعلم خير يالله وش يبغى الرجال في ذي الخزه من آخر الليل الله يستر


رحبت بالرجال : ارحب يالله حيه اقلط

عيا الرجال وقال أنا عندي شغل وماني فاضي .

قلت العن الشيطان اقلط عشاء والا قهوه

قال لا أنا مستعجل و بعطيك علمي وأنا واقف قلت هاسلم

(وبيني وبينكم قد ودي يعلمني بسرعه لاني مستعجل وخبركم لا جاء أحدكم مدير يبغاه في موضوع ماعاد يبغاه يطول في علمه تلقاه مستعجل على علمه )

المهم قال فارس قحطان العلم سلامتك : نبغا نعينك مشرف على مجلس سعة الصدر ،،

لأنك تتواجد دايم في المنتدى وعلومك طيبه وسلامتك(انتفخ راسي من المدح وخصوصا مدح المدير)

قلت له الله يحييك ويحيي علمك وفي الحقيقة ما عندي مانع وخدمة الرفاقة في مجالس قحطان شرف ولكن ما ادري هذه الوظيفة كم راتبها وكم العلاوة ؟ وكيف دوامها ؟

إلا والرجال يضحك وقال : لا راتب ولا بطيخ . يكفي إنك تصير مشرف في المجالس

قلت له مادام ما فيها دراهم ما أبغاها
قال فارس قحطان اسمع يا معمري تراك مصدق نفسك إن مهم احمد الله ان حن اخترناك من بين الاعضاء وحطيناك مشرف
ولا لها راتب ولا بتشوف منا ريال ؟

قلت له آفا والله خابرك كريم يا فارس قحطان

قال كريم وإلا الربيع <<< (عصيرات) ما لي دخل هو ودك بها وتصير مشرف

وتسير مع الرجاجيل وتذب الريع وإلا غيرك يتمناها وبيعطي فلوس . ؟

قلت : طيب لا تعصب ولا تنفخ كل شيء ينحل بالهداوة وإلا يوم انك مدير تنفخ

وأما من ناحية الراتب فمادام إنكم ما بتعطوني راتب من طيب نفس فالله غني خلاص معاد أبغى شيء

و أما الإشراف فقد ودي أخدم أخوياي

( أصلا قد ودي به حتى لو خبطني فارس قحطان ماكان عييت من الإشراف )

وقلت له خلاص اعتمد يا فارس قحطان

رجعت البيت ومن اليوم الثاني وأنا طاير في العجة فرحان أحسب إن قدني وكيل إمارة منطقة ... وكل من قابلني قلت له وسع مني معاك المشرف

ورحت لأبوي وأمي الله يحفظهم من كل شر وجيب أبشرهم << من شافني قال ذا .... جاله ولد

قلت لأمي ترى قد ولدتس مشرف في مجالس قحطان .. فقالت الله يحفظها : وش ذي المجالس وين يفصلونها في أي محل ؟

قلت ياا مي هذا موقع في الانترنت قالت وين ذا الموقع وين محله وش ذا الترتنت

قلت يامه ذي كمبيوتر وقمت اشرح لها ومن سمعني قال ذا بيل جيتس ما أدري وش اسمه صاحب شركة مايكروسوفت

ما درت إني يالله بي أفتح الجهاز واطفيه قلت لها ما ألومش يا امه ذي الطفرة الالكترونيه

ماجات إلا في وقتنا أما انتوا ماجاء على مدتكم إلا الجرين والزرع والغنم والله يسقي ايامكم مازينها

الشايب جيت عنده اتفلسف واشرح له وفي الأخير : قال صب قهوه وانتبه على عيونك

لا يروح شوفك في ذي الشاشه اللي تو وجهك

رجعت البيت واترزز تو الجهاز كني باتصور توه واشغله تشغيلة واحد مشرف

بكل ثقل ماعاد هي مثل تشغيلتي

وانا عضو منتف ( كنت أشغل الجهاز برجلي من العباطة

وأنا متمدد فوق الكرسي <<< قد شفتوا أحد يتمدد فوق كرسي

دخلت واختار اي شركه اتصل عن طريقها في الايزي نت من حقي

وادخل مجالس قحطان واروح مباشره على مجلس سعة الصدر

ويوم قربت مع باب المجلس فاتنحنح ارب اللي داخل ينتبهون ويرحبون والله ما به حس

ادخل واسلم مابه حد درت على المجلس من ورىورحت عند المغاسل والمقلط والصالة ولا به حس

قربت من دوره المياه وقلت يمكن احد من الشباب بطنه يلويه ودخل الحمام يعبر عن مشاعره
الا ولمبه الحمام الله يكرمكم طافيه

بصراحه انصدمت قمت واجلس في رأس المجلس

وقلت عطهم فرصه يمكن هم في شغل وإلا مشوار وإلا معزومين
وانتظر طول اليوم ولا به حد

جيت اليوم الثاني وانتظر ولا فيه فايده

انتظر احد يفيض علي <<< وفي روايه يتغازى علي من طرف الباب ولا شيء

ويوم انتصف النهار وإلا واحد من الاعضاء اسمه بن سابره يدخل ويسلم

وقمت ارحب به ماعاد احتريت احد يرحب بي

وأما عزومة تعينيي مشرف فقد عذرت منها مادام ذا علمهم

والصراحة قدني باخبل وانا قاعد لحالي في ذا المجلس

شحالك يابن سابره يالله حيه واسولف معاه وخذينا نص ساعه

إلا والرجال يقول عندي استلام ولازم اروح للعمل..

قلت الله يستر عليك وفي الحقيقة ودي اعطي عطا ويقعد معي

راح الرجال واطلع انا انتظر عند الباب كني فراش مدرسة ماكني مدير

واسمع هدره واجده واتتبع صوتها إلا وهو صادر من المجلس العام في الحارة اللي ورانا

اروح لهم والقى عندهم زحمه قلت انه زواج واروح استعلمهم إلا وكلهم زوار أعضاء

والمجلس من أوله لآخره مليان يسولفون وفارس الشواطي مترزز

في رأس المجلس ببشته وكرشته الكبيره شوي ماهي بواجد ( وش دخلك في كرشته )

والعود الازرق يمر من توه والولد يصب القهوه وتوه عذق تمر مازين شكله

فقلت في خاطري ( عز الله ذي الميدره صح ..

ماهي مثل ميدرتي في مجلس سعة الصدر كني مثل اللي يلعب من ورى الصف قاعد لحالي

واعاين في المجلس واشوف مخاوي سهيل متربع في زاويه المجلس

وقد نزل بشته وجيبه مورم فيه كاميرا يشلها

يصوربها واسأل عن عاشق الوطن فقالو الرجال تعبان شوي وراح يقيل

جلست شوي وتقهويت واللي علي بالخير ولعنت الشيطان

وذكرت الله على ميدرة فارس الشواطي ( لايجيه شي فيوجه

الاتهام لعيون آل معمر ) استأذنت ورحت لمجلسي وصرت اجلس فيه يوميا

احيانا يمر عليها ابن سابره ولما هنا مر علي بن مصلح الأشعري ومحمد بن سعود العبيدي

ويسولفون معي شوي ويروحون


بصراحه الوضع ماهو بطيب والتواصل واجب

ومن حقنا انكم تزورونا وتشرفون محلنا ولذا فحن عزامه لكم في منتدى مجالس سعة الصدر

وأبشروا بالكرامه والطيب والخير

ومن هذا المنبر يعلن الكاتب ( آل معمر ) عن هذا العرض الخاص وهو

أن كل من يشارك في منتدى سعة الصدر راح نقدم له ذبيحته

والذبيحه عباره عن توقيع هديه مجانيه أصممه من عندي

وبأعطي كل من يشارك معنا من اليوم ورايح بأعطيه توقيع أصممه له تصميم على قد الحال

وبأكتب عليه اسمه أو ايميله واكتب عليه مجالس قحطان

وإذا كان يبغى في التصميم صوره مخصصه مثل صوره صقر وإلا صورتي الحلوه وإلا فرس

وإلا يبغى ألوان معينه فيقول لي ويبشر بالخير والله يعيني اسهر عليها وازينها

ولكن الشرط الأساسي يشارك معنا في منتدى سعة الصدر
( الله يالدنيا قد حن نطلب الناس طلبه ونذبح لهم تواقيع حتى يوسعون صدروهم وينبسطون )

وراح أنزل بعض تصاميمي اللي على قد حالي
وأيضا دفعني لذلك ما لاحظت بعض الشباب يحط له تواقيع صور مختلفة من مواقع أخرى



ولا أحد يزعل ويقوم على هذا الموضوع ويحذفه
فأطلبه بالحق عند فارس قحطان واعذرونا على الإطالة وفي الرد الثاني بعض التصاميم



الله الله يالربع هذا علمنا وسلامتكم