قصيدة مدح في بني تميم..

السلام عليكم..

قصيدة مدح في لابتي بني تميم..

احببت أن تشاركوني متعتها..

اترككم مع القصيدة..
يانديبي شـد مـن ديـره وحـل بديـره
لاتـرد الشـور للقاصـي ولا للـدانـي
اركب اللي كن صوته يوم يدرج سيـره
لحن قيفانـن بدعهـا تركـي الميزانـي
جيب لكزس صنعـوه مصنعيـن البيـره
اليهـود مكرّميـن الزانيـه والـزانـي
ابيـضً تخفـي معالـم لونـه التغبيـره
مثل عفـرا غبرتهـا رملـة الصمانـي
كن عجه مع دماث الارض عج مغيـره
جرها بن حميد واوقف زحفها القحطانـي
وكن شكمانه ليـا دخـن وفـاضً قيـره
جرةً حـرق بصلهـا شايـبً سودانـي
وكن نـوره لاتقـادح قدحـة التعميـره
برق صيفً وصفه لي محسـن الهزانـي
ولا اعترض من عقب أخذ له لفه وتدويره
اعتراضة يوم عروى شيخنـا ربيعانـي
صاح في ربعـه وغـزا ليـن سعيـره
وانتهت حرب البسوس وهيجن القومانـي
نحـره دار الرجـال مقدريـن الجيـره
الرجال اهل السلـوم مزبنيـن الجانـي
عـزوة التسبيحتيـن وعـزوة التكبيـره
ونصرة الدين الحنيف وعلـة النصرانـي
لابة لاقـام راع الحـرب ينقـر زيـره
اقطعو سبحة فلان وطـار عقـل فلانـي
منهم القعقـاع وبـن صقيـه والمغيـره
ومنهم الاقرع وزيد وعمرو والسمعانـي
والمتنبـي وأوس ومالـك بـن نـويـره
والحطيئه والفرزدق وبقطـر بـن ثانـي
ومنهم القابوس وال الشيخ واللـي غيـره
وشيخ شيخان الكتاب ومفتـي الاخوانـي
ياتميم أهل الكرم والطيب وأهل السيـره
وياتميـم أول تميـم وياتميـم الثـانـي
ياهل الخيل الاصيلـه والفخـر والغيـره
وياهل البير القديمـه والدلـو والسانـي
جاكم الحافي يسوق من الغـرام بعيـره
دافعه صدق المشاعـر لا لشـيً ثانـي
لايجي فـالبال شك ولا يجي بـه حيـره
مجدكم مجـدً تليـد وهاجسـي سرانـي
ياسـلام الله سـلامً فيـه خيـر وخيـره
سجله قلبي واذاعـه للحضـور لسانـي
للكبير اللـي يطـول وشرهتـه كبيـره
وللصغيـر وللمقيـم وللخـوي والعانـي
عـد ماتقـدح تميـم بزندهـا للنـيـره
وعد ماتطفـي تميـم النـار والدخانـي
وعد ماتشـري تميـم البـن بالتسعيـره
وعد ماتذبح تميم من الجمـل والضانـي
وعـد ماتدفـع تميـم ريـال والا ليـره
لاأكبرت سود المشاكل والهـدف مجانـي
وعد ماتغلـي تميـم الديـن فالسريـره
وعد ماتكره تميـم الصـدر والسستانـي
والله يعـز الملـوك ويحفـظ الجزيـره
هم بعـون الله حـزام الامـن والامانـي




الشاعر

سعود بن سالم الحافي العتيبي

ونعم في بني تميم

وصح الله لسان العتيبي

__________________

بسم الله الرحمن الرحيم
السلام عليكم ورحمة الله وبركاته

صح لساااااااااااااااااان الشاعر


والله يحفظ الجميع

__________________

يستاهلووووووووووووون المدح

قصيده جزله من رجال جزل

والنعم في شاربك اخوي ناصر وماعليك زود ولابتك..

وصح بدنك نيابة عن الشاعر العتيبي..

عليكم السلا ورحمة الله..

ياهلا يا أبن خضير..

صح بدنك نيابة عني والشاعر.,

تستاهل الطيب والعافية يافارس ال فرس

مرورك الجزل لا خلا ولاعدم..

بسم الله الرحمن الرحيم
السلام عليكم ورحمة الله وبركاته


تستـــــــــــــــــــــــــاهلون الطيب

وصح لســـــــــــــــــــــــــان الحافي..

__________________

ونعم في بني تميم

يستاهلون بني تميم