عدل وعطاء واحسان للشاعر خلف بن هذال

بسم الله الرحمن الرحيم
حبيت انقل لكم قصيدة من أروع قصائد الشاعر خلف بن هذال في حفل الجنادرية والتي تعتبر أول قصيدة تلقى في حفل الجنادرية في حكم خادم الحرمين الشريفين الملك عبدالله بن عبدالعزيز يحفظه الله
ولاأطول عليكم وأخليكم مع القصيدة
على الراعي سلام من الرعيه سنة الرحمن
من السنه سلام وللرعيه عاش راعيها
رعاه الله امام المسلمين وللوطن عنوان
ورمز ونور نجد وعز حاضرها وماضيها
حضرنا للتراث اللي يمثل ماضي العربان
ولا يبقى للامه قيمه دون ماضيها
صحيح ومن قرا التاريخ يلقابه عرب واوطان
قرون حافله مايمكن التاريخ يخفيها
هلا ومية هلا بضيوف حلوا في محل اخوان
تراحيب المضيف وبالضيوف الله يحييها
ملك وجنادريه والامان بديرة الايمان
بلاد السلم والاسلام والمعبود حاميها
بلاد تطعم الجايع بلاد تكسي العريان
بلاد آمنه ما روعت والامن كاسيها
وفيها قبلة المسلم وفيها من ولد عدنان
نبي قام وادى رسالته باسمى معانيها
دعا الامه على المنبر سنين وعلم القرآن
لبر الوالدين اوصى وبالارحام موصيها
وفيها شعب وافي والوفا ورثه من الجدان
على الشدات يرسي مثل ماترسي رواسيها
وفيها من ملوك العرب من قادوا رسن وعنان
ميامين تحت راية ملبيها لداعيها
حموا شبه الجزيره من جيوش الظلم والطغيان
قيادات تعاقب باول الهجره وتاليها
نفوز بشوف عبدالله وشوفه يرضي الزعلان
ليا شفناه كنا نملك الدنيا وما فيها
تهاتف له جماهيره وتعزف له طرب والحان
اناشيد الفرح بحضور سيدها تغنيها
له الفعل الجميل وله جزيل الشكر والعرفان
تحيات الثناء للقائد الاعلى نثنيها
تغشى سيدي بالورد واليشموم والريحان
على روس الاصابع صاحب الخبره منقيها
تقدم في طبق لولو وبروازه من المرجان
هدية شاعر لمربي الاجيال مهديها
ملك نعم الملك شيخ الشيوخ مشيخ الشيخان
ملك كل القلوب ويملك الغالين غاليها
فتح صدره ورحب بالجموع وشرع البيبان
تجي وتقابله وتروح مقنعها ومرضيها
تمد اله القدح فاضي وترجع بالقدح مليان
عزيز النفس وجه وجاه والقدحان ماليها
شجاعه مع كرم والظفر منجى والكريم معان
عيون يذر فيها الشب وعيون يداويها
مواقيفه يسر بها الصديق وتقهر العدوان
على وجهه تباشير السعد تبدي مواريها
ملك مؤمن ملك مخلص ملك مدرك بطل ميدان
هذا صقر العروبه فارس الساحه ومخليها
هذا المصلح هذا المفلح كلام الصدق بالبرهان
سياسة عبقري يرسم الخطه ويمضيها
ملك مد الجسور وخاطب العالم بكل لسان
طرح كل الدروس ومن عظام الراس ممليها
تحرك والتقا بالشرق من ساسه دول واديان
وله دينه وله راي وعلاقات ينميها
حكيم الراي في حسم الامور يقرر الميزان
ليا طاحت موازين العرب بين اياديها
يدافع عن عقيده مالها فالعالمين اثمان
كرامتنا عقيدتنا نموت ولا نخليها
علينا ماتهون ومن تخضع للهوان يهان
يشوف الذل ويذوق المراره عقب حاليها
تحدث عن قضيه جوهريه جمدوها ازمان
فراعنة العذاب وبالخراب ابليس مغويها
رموها واتركوها المفسدين بسلة النسيان
تغط بنوم ماندري متى الدنيا تصحيها
يسومون العرب بديارهم سوء العذاب الوان
عساها للذهاب ويذهب المولى ذراريها
يحل بها ما حل بقوم نوح بساعة الطوفان
تساوى بالسفينه بامر مرسيها ومجريها
تعدي ياسفينه واعبري في حكمة الربان
على بر الامان مبرمج الرحله يقديها
حفظك الله ملك ياللي خذيت الشعب بالاحضان
قريب منك وكمومك على العورات مضفيها
على جنبك ولي العهد اخو نايف واخو سلمان
رجل طيب وسخا وان كبرت القاله يلاقيها
حجا الرمله رجا الكهل الكبير مغذي اليتمان
تبارك ثم تبارك خطوة سلطان يمشيها
عيال موحد الملك العظيم مشيد البنيان
على الدين الحنيف يسير والنيه مصفيها
صبي توحيد وموحد له قدر ومكان وشان
يقيم الشفع ثلث الليل والايات يتليها
صدق من قال خلص حاجتك بالسر والكتمان
ليا بانت خصائص حاجتك وشلون تقضيها
شهر عبد العزيز لماكره مثل اشقر الجنحان
مخاليبه من الفرسان اخو نوره محنيها
حمل روحه على كفه شباب بزهرة الريعان
سواة مغامري من غير ابو تركي يسويها
يبي حلم كبير ومن وراه ودونه الفرسان
نشامى تجتلد والموت الاحمر في يمانيها
ثلم حدب السيوف المرهفات وكسر العيدان
مداغيش العيال الياعتزا تسكت عزاويها
هجد فوق الصويتيه وريمه والجمل ريمان
على ظهور الاصايل ياخذ الصحرا ويطويها
هجيج من المضحى للمعشى كنها الغزلان
يموج بطانها ببطونها والليل ضاويها
عرايب من ركايب والركايب من ركاب عمان
تقول ان الوحوش مع الخلا الخالي تباريها
ماجاته بالسوالف والعوافي جت بصفق اكوان
معارك طاحنه والعج شمس الظهر غاطيها
تزوغ به العقول الراسيه وتشيب الولدان
بها سود النواصي عودت سود نواصيها
جلا وجه الحياة وغاب وجه الجهل والحرمان
وازال الخوف واعلن دولته واصبح مسميها
وابابعث من فؤادي ماختزن شوقي من الوجدان
على قوم توارت في سنه ماني بناسيها
فقدنا بالخليج وبالجزيره للديار اركان
سلاطين تساقط كيف مانحزن ونبكيها
رحل عنا اربعه والاربعه عدل وعطا واحسان
من الدنيا خلت ولا تخلت عن مباديها
فهد وشيوخنا جابر وابن راشد وابن سلطان
رجال سطرت لشعوبها مجد يكفيها
رجال الخير والتدبير التطوير والعمران
بنت بلدانها بني يخلدها باساميها
ألا يالله تجزى المحسنين العفو والغفران
تلهمها الصواب ومن عذاب النار تنجيها
اله الكون تمنحنا مزيد الصبر والسلوان
بعدهم وانصر الحيين واهزم كيد اعاديها
كريم القوم الاكرمته ملكته لك يصير مدان
هل المعروف لو هي بالقبور الذكر يحييها
وان اكرمت اللئيم وطال عرفه صد عنك وخان
عليك يدور العثرات والحسنات غاويها
ومن لايذكر الله ويتذكر مافعل شيطان
ردي الحظ دايم للاذى نفسه معنيها
تحملنا ولا عاد نتحمل والمغطى بان
مبيتة الخدع في حقدها والحقد معميها
ومن ينوي لنا بالشر هذا جاهل غلطان
نقول له انت جاهل والجهاله لاتطريها
ولا نجهل ولا يجهل علينا كاين من كان
ماهي بعلوم جهال حجاويها تسليها
ولا ضاعت حقوق ولا طلب منا حقوق انسان
حقوق الناس قبل حقوقنا حنا نبديها
صحافات تصدر بالفلس والخزي والخسران
بضاعه فاسده خسران بايعها وشاريها
دعايات تروجها العدا بالزور والبهتان
خرافه في صحافه مع مهب الريح نرميها
يبري ذمته من قال انا صاحب قلب فهمان
يفكر بالحقائق ويتفكر قبل يبديها
وسلامتكم

__________________
اللـهـم
اصلـح لي ديـني الذي هـو عصمـة أمـري
واصلح لي دنيـاي الـتي فيـهـا معــاشــي
واصلح لي آخرتي الـتي فيـها مـعـــادي
واجـعل الحيـاة زيـادة لي في كـل خــيــر
واجـعل المــوت راحــة لي مـن كـل شـــر


ازا مر زمان ولم تروني ,,, فهذه رعصاتي على الكيبورد فتذكروني

ابوسالم اررررحب تراحيب المطر الله يحييك ويحيي ما جيت به

قصيده تستحق الشكر علي نقلها لنا واختيارك طيب من طيب راسك

خلف بن هذال العتيبي شاعر تطرب له القلوب صح الله لسانه

__________________