جمل القحطاني
شجاع في بيشه معه قنبله وسط الحـزام
ويقول انا بيشي وباقي العرب تحت قدمي
مجنون هذا لاكلبـي مايحسّـب للكـلام
مايدري انّه لقمةٍ من يمينـي فـي فمـي

شجاع الأكلبي
لاياجمل وان كان تبغي مساليك الكرام
خلك مثل من جيتله يافتى وجالك سمي
من هامنا بالناب وقع على خشمه قوام
وعيونه الثنتين بعد البصر تصبح عمي

جمل القحطاني
أنا اعرف انك ياعميلي بعير بـلا خطـام
تمشي ولا همّك قريـح المدافـع والرمـي
كانك تذكر وش حصل لك قبل عشرين عام
فأنا على خبرك ليا ثار دمـك ثـم حمـي

شجاع الأكلبي
أنا أذكر اديـارٍ مـن أسبابنـا راحـت هـدام
وساداتها بعد السيـاده يجـون مـن خدمـي
أظـن مـا تجهلـك ياصاحبـي كـل العـلام
نشرب زلال وغيرنا يشربون من الطمي

جمل القحطاني
مافككم من شوكة الحرب ترديد السـلام
يرتاح من يقبر ويشقا غريـر ميتمـي
ماقول غير الله أكبر .. على الدنيا السلام
دامك لبست إلنا العمامه وفيدك خاتمـي

شجاع الأكلبي
حنا نظيم اللي حربنـا وحنـا مانظـام
ويا مخبل اللي من ورانا سعى وينمنمي
بيجيلكم يومٍ تشوفون كارثـة الحطـام
وياذيب عوّد وين تبغى وانا عند غنمي

جمل القحطاني
الهرج يبقى هرج مايجبر أكسور العظام
ياللي تخلطون أعربي الحكي بالاعجمي
درب التمنّي مابنا لك قصور ولا خيام
خلك ورى ضانك ولا تحتزم بالمحزمي

شجاع الأكلبي
لا يالظعيّف لا تحجج بتبعـك للنظـام
وتمشي تحت رحمة عدوٍ خبيثٍ مجرمي
قلبك كبير والريايا معه ضخـمٍ جسـام
وراسك بلا رايٍ وتمشي برأسٍ عمعمي

جمل القحطاني
ماني ضعيفٍ لك ولي مع هل الطاله مقام
وليا وقفت أقول وأطول وألزم لازمـي
راسٍ بلا طاقيتـه لاحـلال ولاحـرام
وشلون تمسك شوشته وانت عبدٍ مسلمي

شجاع الأكلبي
من ركب فوق العيز ماقال أنا راعي المسام
أمشي قدم واللي ورايه زرعت له ألغمـي
لا بد من يوم يجـي ينجلـي كـل الغمـام
وتشوفنا في الدار وتقول يانفـس أسلمـي

جمل القحطاني
الله رقيبٍ عالخلايـق وعينـه ماتنـام
تزرع لغم والغامنا روّحـت يالحاتمـي
احلى تحيّه خير ما أقول في مسك الختام
راسي سلم منها وراسك رفيع وسالمـي

شجاع الأكلبي
أنا أشهد انك ياجمل من خيرة الناس الحشام
من زاركم يلقى المعزّه لا يجوع ولا ظمـي
أشكرك ماناحت على الأغصان قمري الحمام
ويفداك ناسٍ للرخيص اتسوقـه وتخمخمـي

وسلامتكم منقول من منتدى آخر