[poem=font="Simplified Arabic,4,black,normal,normal" bkcolor="transparent" bkimage="" border="none,4,gray" type=0 line=0 align=center use=ex num="0,black"]
ياسعيد كان تسال جدٍ وتحفيد=لك معنويٍ باصلنا تستفيده
يمكن عليك نزل بالعلم ونزيد=الا انشد التاريخ تلقا وكيده
حنا الذي يضرب بنا الوصف ياسعيد=ضياغمٍ من روس جنب وعبيده
وهواجرٍ يوثق بنا في المعاهيد=وقحطان ابونا حافظينٍ رصيده
والسمت والشيمه وقسمٍ من الجيد=سلم لنا كل القبايل تريده
نزهين من قرب الدنس والمناقيد=وعروضنا مثل الثياب الصفيده
وقصيرنا ماحن لبيته رواويد=لا غاب منه لين حتى يعيده
ولا نختبي دونه بالاشيا المزاهيد=وايدينا في غالي الزاد بيده
ونتبع مراضي جاهله لو على الديد=ولكرام جار البيت نفرح وليده
وان مر كلبه ماحذفناه بالحيد=لو كان مانرجي ورا الكلب صيده
ونطنف مراحيله ولو هي مغاميد=وعلى كرامه ضيفنا هو قعيده
وخوينا نكمد مشاكيه تكميد=لو مايهوجس يمنا بتعويده
وان زارما العاني لبعض المقاصيد=متعلث ماننشده عن سديده
نذبح سمان الضان له والمفاريد=ومن جاد للعاني فرحنا بجيده
وان جاو اهل جيش ونايا مضاديد=ماذاقوا امس الا شلاوي قديده
نقحص لهم بالهيل ترس المباريد=والبن يحمس جمر الارطا وقيده
ونقحص لشتويا دفوفه ملاهيد=ويفهق لهم عقب العشا به بريده
وان زارنا المجرم يقزي لذاويد=ينزل ويرحل ماجعل له نضيده
فوق العلا نرفع مبانيه ونشيد=الين يبعد من وطنا شديده
وان رامنا ضدا عمدنا بتكويد=عود بغبنه عبرته في وريده
نجعل على زوره رسوم مجاديد=ويبطي وكبده من سنعنا غديده
وايلا انتزح منا ورا واسع البيد=فالجيش يقطع مستواه وقويده
ماهو علينا لو بغيناه بعيد=نصبر على حر الزمان وجليده
ناتيه في الكنه حلول المواريد=معطان والا نرضمه بتهجيده
يصبح قطيعه بين الايدي تباديد=ويفرح ايلا ردوا عليه الشريده
واقفوا على ابله شايلين التغاريد= ومن الحسايف يصفق ايده على ايده
ومن زان حنا له خيارا اجاويد=ومرجام للشيطان لفتل قيده
لحركوا الاسباب بعض المقاريد=نوطي على الزرب الصريع وهميده
وان صار من بعد التساهل تلاديد=فالرابح اللي مقبلاته سعيده
سلم النضا والخيل مافيه تبنيد=في كل وقت لابسين عديده
وان ثار عكنان كشف غره الغيد=ندعي النفوس الغاليه به زهيده
نلقط على الهيجا وحس البواريد=لو كان ماينفع عضيدا عضيده
لاوصلت الذله معلق لواريد=واللي معه جريا تقاصر فديده
ونفرج ايلا من صار صكا وتسنيد=الى استغرب الطارد بقيضه طريده
صار اجتوال الخيل تن وتفاريد=وكلا يخايل غره في نديده
هذا عليه معودين تراديد=ونحيي الامور الماضيه بالجديده
وعشنا على صايب ومصيوب وشهيد=وهذاك ممنوع تعزف ذويده
وهذاك معتدي وذا كاسب فيد=واصبح يوزع بين الادنين فيده
تمت وصلى الله وسلم بتجويد=على نبي مخلص بالعقيده [/poem]


والله كفو كفو كفو قصيده من اروع القصائد ومما يميزها هو انها ( قول على فعل)

اخوي // فهد بن دلباح لاهنت لاهنت لاهنت وبيض الله وجهك على ايراد هذه القصيده

للشاعر عمير بن راشد بن عفيشه . اكرر لك الشكر ولاقصرت وتقبل تحياتي