انضم لعالم المثقفين!!!

مقال إستهبالي


((اتبع النقاط التالية وانضم لعالم المثقفين))

1 امحط الشنب .

2 إذا سألك أحد من تسمع له قل لفيروز وشاديه حتى لو انك ماتسمع إلا لمزعل وسعد جمعة وعزازي .

3 إذا قالوا لك من شاعرك المفضل قل محمود درويش و ادونيس حتى لو انك ما تقرأ إلا لضيدان بن قضعان وسعد بن جدلان وفلاح القرقاح

4 ابتعد عن المباشرة في الكلام واعمد إلى " التفعيط " و " التمطيط " وبدل ما تقول "في البداية " قل : " بادئ ذي بدء " وبدل ما تقول "وهذا يدل على " قل : " وهذا إن دل < /span> فإنما يدل على " ... لا تقعد تقول صعبة ومشوار ومدري إيش لازم تصبر وتتحمل ...ترى الثقافة مهيب سهلة !!!!..

5 إذا كتبت مقالاً فلازم تطعمه ببعض الكلمات الرنانة واللي مالك غنى عنها مثل : "الراديكالية والديماغوجية والميكافيلية " ولاهوب لازم تحطها وأنت تكتب المقال لا... إذا قضى الأمر أبد لزهن فيه كلمة منا وكلمة مناك الين يقضن "" إن ما كتبت منهن شي تراك من جنبها في الثقافة لو تحفظ سبعميه ألف كتاب وتقرأ ثمانميه ألف موسوعة ""؛ وانتبه تقول : "الرأسمالية و الأشتراكيه والقومية " ترى ذي الكلمات حقت مثقفين منول .. أما الحين ما عاد يوكلن عيش.

6 كثر من الكلمات اللي تنتهي بـ"قراطيه" مثل : " الديموقراطيه . البيروقراطيه . الأرستقراطيه . الأوتو قراطيه . التيوقراطيه ". وإذا انزنقت "فخربط" لك أي كلمه واختمها بـ " قراطيه " مثل " الخنبقراطيه.والخربوقراطيه"؛ ولا تخاف ما في احد يبي يسألك ويقول وش معنى ذا الكلمة عشان ماينكشف " جهله " ويدرون الناس انه مهوب مثقف.

7 خربط لك أي كلام بس بشرط انه يكون " مبهم " وغير مفهوم وأهم شي اكتب فوقه " شعر فلان بن فلان " عشان يعرفون " القراء " انه شعر حداثي .. لايحسبونه مقال والا روايه .

8 انتبه انك تؤرخ بالهجري حتى لو كان هو تاريخ المسلمين ترى المثقفين مايؤرخون إلا بالميلادي ويفضل بعد انك إذا كتبت قصيده حداثيه تكتب الشهر كتابه مهوب رقم زي كذا " حزيران 2007 " أما ذا الشهر حق مثقفين بقوه وينصح بعد انك تحط تحت التاريخ أي عاصمة أوربيه " لندن , جنيف , باريس " حتى لو انك كاتب القصيدة في حريملاء و إلا شقراء ولا الارطاويه .

9 إذا جاء معك مقابله في التلفزيون " حش" في الشعر الشعبي وشرشحه حتى لو انك تحبه وقل انه شعر البسطاء والعامة و الدهماء وانه معول من معاول هدم اللغة ولابد من إعلان الحرب عليه دون هوادة !!!

10 إذا سألك احد وش الجرايد اللي تقراهن انتبه تقول له عكاظ والا الرياض !! عشان مايدري انك قروي , لا..
وقل الحياة والشرق الأوسط والاقتصادية حتى لو انك مابعد شفتهن على الطبيعة ..بس لزوم الثقافة.

11 إذا قال لك احد وش الأجواء اللي تجد فيها نفسك , لاتفضحنا وتقول إذا جلست مع أهلي والا إذا طلعت للبر والا إذا صرت اضبب !! ولا طالع اصيد دخّل وصفاري لاياحبيبي , قل له أنا تأسرني الليالي البيروتيه المقمرة وخصوصا في فصل الخريف حتى لو انك ما تفرق بين الخريف و" المربعانيه ".

12 حاول دايم انك تفلسف وتلف وتدور في كل شي وفي كل اجابه حتى لو ان الجواب حرفين خله عشره سطور وكثر من الكلمات اللي ماتفهمها عشان مايفهمونها الناس ويتأكدون بما لا يدع مجالا للشك انك من كبار المثقفين.


13 لا تجيب طاري الخميس والجمعة ، بل حاول تقول الويكند ، ولا تقول الشهر الماضي بل قل لست مونث ، عشان يقولون واااااو لغته رااااقية خخخخ.

14 إياك وعلي الطنطاوي أو غيره من الأدباء أو الكتاب اللي مثله ، بل استبدله بأدونيس ، أو أينشتاين ، وشرواهم " شرواك الطيب"


أخوكم المثقف جدا / أينشتاين العبدالله

__________________



اللهم أرحم والدتي ..وأجعل قبرها روضه من رياض الجنه..واسكنها جناتك

ههههههههههههههههه

عزالله راحو فيها المثقفيين ..

دمت لنا يا أينشتاين العبدالله

__________________

ياكثرهم اللي يستخدمون ذا الطريقه هههههههههههههه

خآلص ودي ياكحلان ..

__________________

هههههههههههههههههههههههههههههههههههههههههههه

ياخوي انا يرتفع ضغطي لا شفت واحد مثل كلامك خوي منصور تبيني بعد اصلح

مثقف مثله لا ياخوي خلني على مشوار وماعندي وقت ولاني فاضي أفضل

هههههههههههههههههههههههههههههههههههههههه

لاهنت يا مبدعنا الغالي

__________________

والله الكثير من المثقفين ما عندهم سالفة

يحفظ كم كلمة ويجي يتفلسف

مشكور أخوي منصور

__________________

هههه

صحيح هذا حركاتهم هذه الايام ...


المشكلة يا بو نواف لو محطت اللحية ..

محد يسلم عليك , وتتأخر معاملاتك بالدوائر .

يسعد صباحكم يا شباب

ويسعد مساكم يا شباب


لاهنتوا يا شباب


ركزوا في اول نقطه


محط الشنب

اهم شيء زيروا الشنب

وتمشي امورك

أسألوا ابن عياف

محط الشنب وعلى طول لقى ترقيه

وبدل ماهو سبيكه

صار سبيكة أول


تحياتي يا احلا مجلس

__________________



اللهم أرحم والدتي ..وأجعل قبرها روضه من رياض الجنه..واسكنها جناتك