يالله وأنا طالبك تغفـر لـي ذنوبـي يـا غفـور

أرجيك وألجا لك وأنـا سالـك وأعيـد المسألـه

لوما تطهرنـي بعفـوك مـا تطهرنـي البحـور

جيتـك وذنبـي قـد تعـلاّ غاربـي يـا مثقلـه

أنا من الطين انخلقت , أخطـي ولانيـب معـذور

قامت علي الحجّـه بدعـوة رسلـك المرسلـه

مؤمن بتوراتـك و إنجيلـك و مؤمـن بالزبـور

و بسنّـة محمـد وآيـات الكـتـاب المنـزلـه

لكن خُدعت بزخـرف الدنيـا وزادتنـي غـرور

أبدت مفاتنهـا و ورتنـي مـن العمـر اجملـه

طبعاً بما إنـي بنـي آدم حصـل منّـي قصـور

واذنبت يـا مـولاي ذنـبٍ بالخفـا مـا تجهلـه

أسألك تغفر لي و تستر موقفـي يـوم النشـور

اليا القفت خلقـك صحايفهـا وهـي مستذهلـه

من يستلمها بالشمال افلس وهـو يدعـو ثبـور

ومن يستلمها باليميـن افلـح لخيـر المنزلـه

واسألك يا ربـي تعاونّـي علـى نيـل الأجـور

أحيا حيـاةٍ مكسبـي فيهـا مـن البـر افضلـه

واسألك جاهٍ مع هـل الدنيـا وحـظٍ مـا يبـور

أيضاً وعرفٍ مـع هـل الحكمـه ورزقٍ تكفلـه

من لا تهيّا لـه مقـامٍ مـع طويليـن الشبـور

يبكي على ما ضاع من عمره وخيبـات عملـه

وان شاب راسه لا ترجّى فيـه تجبيـر الكسـور

لا خير فـي تالـي زمـانٍ مـا تغانمـت اوّلـه



ومانيب ناسي قصةٍ صـارت وانـا ازورالقبـور

لازلـت افكـر فـي غرابتهـا وبالـي تشغلـه

ساعة ظهر لي شايبٍ له حول قرنيـن محجـور

في جوف قبرٍ عن هـل الدنيـا طـواه ويعزلـه



سلّم وجا صوبي يقول : ابنشـدك يللـي تـزور

عن حالة الدنيا وعن وضع الزمان وعـن هلـه

أنا مضى وقتي ومـرّت بـي طويـلات الدهـور

والباقـي بعمـري بعيشـه بينكـم واستكملـه



قلت : الزمان اللي يبارينا علـى خبـرك يـدور

الوقت نفسـه مـا تغيّـر ماشـيٍ فـي جدولـه

أما البشر , , , لا والله الاّ غير من حد الجـذور

صار انتقالٍ مـن يميـن الـى يسـار المنقلـه



استغرب الشايب من اللي قلـت وبليّـا شعـور

حط اليمين اعلىالشمال وخاطـره فيـه اسئلـه

قال : افتني عن حالة الشيبان والشيـخ الوقـور

أهل الخبر والراي والحكمـه وضـرب الأمثلـه

القدوه اصحاب الأمور اللي تطـاع بكـل شـور

اللـي يفضّـون النـزاع ويحكمـون المشكلـه



قلت : البعض منهم على ما قلت في وصفك وقور

قدوه ولكن رايهـم مـا ينفـرض فـي مسألـه

الطاعه العميـا بقـا منهـا مجاملـة الحضـور

اللـي تلاقيهـا مـع اوّل فـرصـةٍ متنصّـلـه

والبعض لا عبـدٍ يخـاف الله ولا عبـدٍ شكـور

لا زهّـده شيبـه مـن الدنيـا ولا هـو جمّلـه

بهيمةٍ يرجـع علـى منحـاه الاوّل ومحصـور

فـي لعـب بيلوتـه وريـح زقارتـه ومعسّلـه

والبعض الآخر شابت رموشه على درب الفجـور

ينقـل جـوازه للسفـر مـن مزبلـه لا مزبلـه

أشيمطٍ زانـي قضـا عمـره بحانـات الخمـور

والعايلـه ورعٍ يغـرّر بـه وبـنـت مهمّـلـه



قال : افتني عن حالة الخفـرات ربّـات الخـدور

اللي تصـان بـبيـت عايلهـا و بابـه تقفلـه

شيهانةٍ تشمخ عفاف وتصقـل فـروخ الصقـور

بين الفريق بـبشتهـا الضافـي وتـوبٍ تسبلـه



قلت : العـذارى فـي زمنّـا ببغـاوات الطيـور

تقليد هرج و عرض ريـشٍ خلفهـا تستخملـه

تلبس عباةٍ ضيّقـت حـول الردايـف والخصـور

فضيحةٍ تكشف جسدها مـن علـوّه لـاسفلـه

وموضة شيالٍ تكشف الوجنات والـوان الشعـور

والمحـرم تبـدّل بـجـوالٍ بيـدهـا تحمـلـه

لا فوّحت صفر الدلال ولا عرفت غـش القـدور

تطبـخ لـهـا خـدّامـةٍ بالعايـلـه متوكـلـه

الأم ما صانت عفاف البنت من عمـر الزهـور

والأب ديّـوثٍ تحكـمـه حـرمـةٍ مسترجـلـه

وشلـون يتربّـى عيـال ام التبـرّج والسفـور

الاّ خنـازيـرٍ دمـاهـا بــارده ومغـفّـلـه



قال : افتني بحال الشباب الصلب صيّـاد النمـور

الفـارس اللـي ينطـح خصومـه بزنـدٍ يفتلـه

الوافي الشهم الغيور اللي لعرض الجـار سـور

البار عند امّـه وابـوه وعلـم ربعـه يشغلـه



قلت : الشباب بوقتنا وجهه مثـل بـدر البـدور

والجسم من زود الرخا ما تنفتـل فيـه عضلـه

قصّـة شعـورٍ صيّرتهـم لا إنـاث ولا ذكـور

والثـوب راح ولا بقـى الاّ عـالـمٍ متبنطـلـه

ناسٍ ( فلنتينو ) وناسٍ تلبـس ( كرستانديـور )

صار التنافـس بينهـم فـي لبسهـم والجنتلـه

من كان يشرب من قرار البير مشروبه ( بيور )

والبل راعيها غدا يشـرب حليـب ( النستلـه )

مامنهم اللي قام دون اعـراض جيرانـه غيـور

من قام قالو , , وشـملقّف حضرته ؟ وشـدخّله

والوالدين حقوقهم ضاعت وعنهـم فـي نفـور

ان غـاب عنهـم لا تذكرهـم ولا جـاه الولـه

بدّا عليهم شلّـةٍ تهـوى الوطـا بيـن الجحـور

لو تعزله عنهم تبـي لـه شـان كنّـك تقتلـه

ما راح يوم يشارك ربوعه بحـزن ولا سـرور

حتى ابن عمّه يعرفه بالوجـه واسمـه يجهلـه

بدّل حكاه وضيّـع سلومـه وحالـه فـي دبـور

وان شاف ضيف يخش حتى انّه يفـارق منزلـه



ناظر لي الشايب بعينٍ تجمـع السبـع البحـور

يقول : انا لا يمكـن ادخـل مجتمعكـم واقبلـه

انتو لكم وقتٍ تصـدّع مـن بلاويـه الصخـور

ما يقعد الجمّال به ساعـه ولـو ضـاع جملـه

أخوي عوض مواضيعك راقيه بيض الله وجهك لاهنت.........

__________________

لاهنت ....هذي قصيدة للشاعر ظافر القحطاني (خوي المطاليق)

وانشدها سمير البشيري وهي بالاسواق حتى الان

__________________

أرحب يابو مبارك لاهنت على المرور الجزل


والله لايهينك وأرجو التعديل لأن القصيدة


مثل ماقال ابو سامي ليست لإبن فطيس


وإنما هي بعد البحث لظافر الحبابي


سامح الله اللي أرسلها لي

أرحب يابو سامي لاهنت على المرور الجزل والملاحظة المهمة جداً


فعلاً القصيدة لظافر بن لعور لكن أرسلت على الإيميل وأعجبتني


وذكر مرسلها إنها لإبن فطيس سامحه الله

القصيده تعتبر شيخه القصيد في هذا الوقت
الله يعطيكم العافيه

__________________
الله يرحم المومنين والمومنات والمسلمين والمسلمات الاحياء منهم والاموات اللهم آمين
اللهم ارزقنا الجنه وماقرب اليها من قول او عمل واللهم باعد بيننا وبين النار وماقرب اليها من قول او عمل اللهم آمين

لاهنت

وانا سمعت انها لـ ظافر الحبابي

ارحب الله يحييك يا الوافي يا ابن الوافي بيض الله وجهك وصح لسانك ولسان الشاعر ظافر ابن لعور
فعلا هذه القصيده كلها حكم وتحاكي واقع مجتمعنا اليوم بكل تفاصيله
فعلا انها قصيدة (الحكمه )من شاعر (حكيم)لواقع(اليم)
ونقول لله درك يا ابن لعور

تقبل شكري وتقديري يا رفيقي

__________________
[poem=font="Simplified Arabic,5,darkred,bold,normal" bkcolor="transparent" bkimage="" border="solid,4,black" type=0 line=0 align=center use=ex num="1,black""]
مرحوم يا معرب الجدين والخالي =من روس دعوى سعد تعرف عزاويها
ابوي يا مقرع للحق مامالي =يفرض فروضه وبدعوى يقاضيها
منصا لربعه ولضيفان مدهالي =الباب مفتوح والكرمات يثنيها
كريم عارف شجاع ماهو يبالي =يمنع ويردع وياقف عند حاضيها
يشهد بفعله حجا الحافر ولنقالي =بمات تاجين ما يخطي مراميها
يوم لفانا العدو رجلي وجمالي =يبغا مفالي لنا يرعى مراعيها
عود كسير وجاز من التخبالي = والرجل من جور مافيها يشاديها
هذي فعوله فعول ماهي اقوالي =قول بلا افعال عيب انا نطريها[/poem]

ارحب ياعوض ولاهنت على النقل ..


والشاعر لابد فعلا ان تنسب له قصيدته ولكن الاهم هي مضمون القصيده وهي هذه الدرر والحكمه التي نقلتها لنا ..


ومن هنا انا اؤكد معلومتك فهي قد وصلتني على الايميل بإسم ابن فطيس ..

__________________
صلوا على محمد

اللهم صلي وسلم على اشرف الخلق وخاتم الرسل محمد بن عبدالله وعلى آله وصحبه وسلم

[إذا مَرت الأَيام ولم تَرُوني فَهذه مُشَارَكَاتِي فَتَذكروني ...
وإن غِبت ولم تًجدوني أكون وَقتها بِحاجه للدُعاء فادعولي ]

أرحب يابن شرعا لاهنت

ومشكور على المرور