بسم الله الرحمن الرحيم

هذه القصه سبق ان كتبت هنا في مجالس قحطان ولاكن كاتبها لم يوفق في كتابتها بالشكل الصحيح وحرف القصيده والتاريخ وسرده للروايه ركيك جدا وبحثت عنها ولم اجدها فقررت ان اعيد صياغتها

والقصه هي

ان المرحوم باذن الله محمد بن ناصر بن كدم المكنى ( نخران )

ذهب في عام 1351 هجري من طريب الى الرياض على بعيره طعيزين والبعير هذا مااحد يمسك به الا صاحبه نخران( شرود) الا اذا شاف راعيه

كان اذا اراد ان يركبه نزل له رقبته فاذا حط رجله عليها رفعه الاوهو فوق الشداد وكان هذا الجمل اذا مشى نخران على رجله في مشاوير قريبه تبعه هذا البعير

ومره عقله من يد واحده وكان في اليل ونخران بدوي حول قرية طريب ونخران وده يسمر عند راعي مزرعه حوله يقال له ابن شينان من الجرابيع فخرج خلسه حتى لايشوفه البعير لان البعير ضاره يطمر في المزارع وراح لابن شينان الله يغفر لهم جميعآ رحب ابن شينان وقلطوا في السقف الثاني وجلس نخران على الدريشه وعاده يكون ارتفاع السقف الثاني عن الارض 3امتار ولاحس نخران الا البعير يدق كوعه معى الطاقه بخشمه وكانه يقول ليش تروح من غير ماادري

فقال نخران انزل اعقله من الثنتين فحلف ابن شينان ان يفكه في البرسيم يتعشا منه

ومره كان نخران مريض 3 ايام ماخرج من البيت ويوم جا اليوم الثالث وهو في فراشه في البيت لحاله الا البعير جاي وبرك عند المقدم لبيت الشعر واخذ يزحف وهو بارك حتى حط راسه فوق راس راعيه برهه ودمعت عيناه ثم اعاد ادراجه للخارج

المهم سافر على بعيره حاط عليه الشداد والخرج ودفاه وبندقه والقربه وتعدا بني بسقان وقطع المهمل وبعد اربعه ايام وصل هضب الدواسر الا الديره مسنيه وخلا مافيها طاير يحوم وصل عد هو خابره يبا يملا قربته ويسقي بعيره ويوم وايق في العد الا الدبابير لها رنه باسفل العد تدور الثرى قال لاحول ولاقوة الا بالله

البعير ماوصل العد الا وهو يقوده من العطش وبرك وحط راسه على الارض واخذ يحن بصوت خافت

بقي معه غرفة ماء في القربه وكان ضميان فاخذ الماء وتوضى ثم صلى ركعتين ثم قال بالحرف الوحد

يالله يامنشي السحاب -- ويامعتق الرقاب -- وياقابل من العبد لاتاب --- ان انكان في من الاجواد ريح ان تنزل علي المطر -- ثم جلس يذكر الله واذن للظهر وهو يصلي الا ظل الغيمه يوم غشيته ويوم سلم ليوم انشت باذن الله وضربه المطر عرضها حدود 2 كيلو وطولها مثل وشرب بعيره وكلا من الحشايش اليابسه المبلوله بالمطر الين شبع

وكان قبل سفره سئله واحد من حوله وين رايح قال باروح الملك عبدالعزيز قال مدري لاتموت في المهمل من الضماء وقال له كلام ماطاب لنخران

تذكر كلام الرجال

فقال هذه الابيات

قال أبن ناصر يوم شـــــــرف نايف --------------------- والقلـب والله ينهـبـه ســـــــــعـيـر

في ديرة خلو وقطع مـن العــــرب---------------------- والمـاء قليـل والذلـول بعــــــــيـر

يرغي ليا شافني اوميت بالعصـــا --------------------- وعقـب الشراده كـــاده المـســــير

حطيت أنا القربة ثمان من الشهــــر -------------------- حساب الليالـي والنهـار نســـــيـر

والي من العربه تلوج كــــلامـــــها -------------------- مثل الـــــحاء لــــواجته فـــــــطير

ركبي على البابور في غبة البحـر ------------------- فيـه النصـارى والعـذاب كـــــــثيـر

اخير من لامـــــــا رفيقن حـــــــاقر -------------------- الفـــــعل خـــــامل والكـــــلام مرير

يبغي يزحزني من الجود للـــــردى -------------------- يشمت علينا حـــــــاقد وغــــــــرير

بو كلمتن لا وقعت في القلب كنهـا -------------------- أمحق من المخطر على القــــصديـر

ما طــال من بنيه عسى الله يطيحـه -------------------- وياجعل قبره مثـل غــــــــور البيـر

وياجعله عمى ويقوده اللي يكرهه -------------------- ومن القــــوايم وحــــدتن كســـــير

كنه يوصينـي لجمـع المــــــــرجلـه -------------------- ونا بطبعـي قـــــانـع وبصــــــــيـر

لاجمعت لسعار في الســــوق قلٌبت -------------------- ماتســـتوي سمــــرا وحـب شــعيـر

ولايستوي الفلفل وهيل من الحــبش ------------------- ولايستوي ثوب خـام وثـوب حــريـر

كلن على ماله وحـوزه وجـــــــانبـه ------------------ ولا الذهـــب يطبع معى القصــــــ-دير

ماقــدمت يمناك مــدحه لحـــــــــيتك ------------------ وعـــقب يمنن مــــدها قصـــــــــــير

واصل سفره ووصل الرياض ولا الملك في الحجاز فرقبه 3 شهور حتى وصل الملك عبدالعزيز وسلم عليه وبارك له

بقيام المملكه العربيه السعوديه

والقاء قصيده بين يديه فاكرمه الملك عبدالعزيز رحمهم الله جميعآ

ودمتم بخير

الأخ الظور ,,

السلام عليكم ورحمة الله وبركاته ,,

لقد كتبت عن رجل يستحق من يكتب عنه ويشير إلى مكانته وأمجاده وأخلاقه الحميده وكرمه وإنه رحمه الله

رحمتا واسعه ملاذ بعد الله للأجواد من الشر والجوع وضيم الرجال وأنا أكتب هذه العبارات لإني

لحقت عليه في أخر أيامه وإنه من أصحاب المكانه ومن الرجال أهل الدين والورع ويعتبر الشيخ :محمد بن ناصر المللقب

بنخران رحمه الله رحمتا واسعه رمزا من رموز قبائل عبيده ويعلم الله إنني حاولت الكتابه عنه أكثر من مره لكن

للأسف لم أحفظ من قصائده إلا جزء بسيط المساجله التي حصلت بينه وبين الغامدي أمام حاكم عسير في ذلك الزمن,,,

أسأل الله في هذا الشهر الفضيل أن يرحمه رحمتاً واسعه ويتجاوز عنا وعنه وعن المسلمين أجمعين ........

أخي أبو محمد وفقت في الكتابه عن هذا الرجل الذي يشرف وذكره إذا مر على الرجال مثل رائحة العنبر

سلمت ولاهنت وبارك الله فيك..................

__________________

رحمك الله يا نخران رحمة واسعه ومهما قيل في هذا الرجل قليل في حقه شكرا لك أخوي الظور

لاهنت

بيض الله وجهك


يعطيك العافيه



تحياتي

__________________

الاخ ابو فيصل

اجزلت في الرد وعطرته بثنائك الكريم

وكان ردودك موضوع كامل

والله يرحم والديك بهذا الشهر الفضيل

قل امين

ووالدينا وكل المسلمين

ارحب يابندر

بيض الله وجهك

لاهنت ع المرور