عطوا سداح فرصة..(( يامراقب المجالس إني لك من الناصحين!!))
في البداية بعد مشاركة 1 :
بدأ عضو صغيراً ،، ثم بدا مثيراًً بعد عدة رسائل إلى المراقب كلها تزلفٌ ورجاء،، تكفى نفداك ياولد عمي ويالحمي ودمي ،، هيلب ،، تكفى ترى تكفى تهز الرجاجيل،، تكفى يا عصابة راسي ،،يا محزمي،،،، حطني مشرف ،،
هنا يخجل المراقب ويرد على الأسلوب المقرف بأسلوب دبلوماسي ،،، أنتظر وأبشر بالخير بس صبرك،،،يرد العضو الصغير امرك طال عمرك....
بعد 5 مشاركات للعضو الصغير ..
يرسل العضو الصغير ،،، هاه يالمراقب وين الوعد ،،، لعنبو الجحدات ،، مهيب لك ،،، تكرم،،
وأراك تفعل ما تقول وبعضهم ---- مذق اللسان يقول ما لا يفعلُ
نسيت ولد عمك ،،، تراني على الوعد أنتظر ،،،، أرسلي على الخاص ....
والمراقب العام ،،،، ما زال يرسله (( أبشر بالخير ،،، لا تستعجل))
بعد 10 مشاركات للعضو الصغير...
يرفع العضو الصغير التلفون ،،، طوط طوط ...(( الوه يامناحي )) تعرف فلان ...(( يقصد المراقب العام))
يرد مناحي الطرف الوسيط بين العضو والمراقب العام ،،، (( والله أعرف ولد عم خال ابوه ، ليش وش تبيبه ))
لا لا بس أبيه يعطيني رقم تلفونه ،،، ويكلمه في موضوعٍ لي ..
يرد مناحي ،، أبشر ما لك هم ،، اعتبر التلفون عند وأمورك متسنعه.
وهنا يبدأ سيل رسائل الجوال ،،، والاتصالات ،، والفزعات،،، والمشرف ما زال يقول للعضو الصغير (( ابشر بالخير))
بعد 20 مشاركه:
يرسل العضو الصغير سابقاً الى المراقب العام ،،، هاه بتحطني مشرف ولا تراني بروح للساحات ،،، تراهم مزعجيني هذا من غير الجرايد جريدة الوطن والتايمز اللندنية ،،، هاه وش قلت.
المراقب ياخذ الأمر بعين الأعتبار ،،، ويصدق نصبات صاحبنا ،،، وينزل الخبر الجديد...
باركوا للعضو (( الصغير سابقاً )) صار مشرف على مجلس .....(( كلمة محذوفة))
المشاركة 21 كتبها العضو الصغير سابقاً كالأتي :
شروط الكتابة في مجلسي ،،، ترى مجلسي مهوب لعبة لكل من هب ودب،، والي مهوب ممتثل ترانا بنشخته (( أي بنطرده )) مع الباب ..
شروطي :
1- الكتابة بلغة فصحي (( مثل كتاباتي)).
2- لازم أن الأعضاء يمدحون قصايدي ومواضيعي ،، وأهم شي جدي،، والي ما يمدحني تراني بحذف وقصقص مواضيعه والرب أخبر..
3- في الشهر مالك ألا موضوع واحد (( علشان محدٍ يكتب أكثر مني )).
4- أي موضوع فيه خطأ لاحد يكتب رد يبين خطأ الموضوع ،، أرسلولي على الخاص (( علشان يحسبون الناس أني أنا الي مكتشفها ))
5- لي ولدين عم يكتبون معكم ،،، والله ثم والله ،،لحد يعترضهم أن احط حرتي فيه..
6- ما نبي (( خطء أأملاائية )) ،، عيب عليكم اكتبوا مثلي (( ألي حالبة أمه على خشمه يدقرلي على اخطائي ألأملائية))
7- لمني ابطيت عليكم لا أحد يرسل للمراقب ،،، ولا ينشد ويني ،،،، تراني مشغول عند الحلال وعند ابل الشايب .
8- أحب أعلمكم إني مشرف على أربع منتديات والخير مقبل،،، وكلها كاتب فيها نفس الشروط ،،، وكلهم ما شين فيها على الجادة ،، وأبيكم مثلهم،، واحسن..
بعد مرور أكثر من 3 شهور من الغياب يعود المشرف (( الصغير سابقاً )) بمشاركته 22 كالأتي:
مساكم الله بالخير أنا انقطعت منك لي 3 شهور ،،، كنت حايلٍ بالبل جعلها الجرب ،،، وعينتلي محطة فيها انترنت ،، وأرسلت لكم ذي الرسالة ،،، وبارجع لكم بعد شهرين ... فمان الله (( أعععع صوت الحشوان وراه))
بعد رجوعه من محيال الإبل يكتب في موضوعه 23 كالأتي:
جدي تراه داهية الدواهي ،،، شاعر فارس ،،، عريف في الحرس ،،، شيخ مافي الحكي فايده ،،، قولوا ونعم..
بعد مرور سنة ،، كانت مشاركاته لا تتجاوز 25. وهنا علم المراقب أن مشرفنا الموقر حمل نفسه ما لا يطيق فهو مشرف على أكثر من خمسة مواقع ،،، ومن بغاها كلها تركها كلها..
تكاثرت الظباء على خراش فما يدري خراشٌ ما يصيدُ
وهنا ،،،، أخذ المراقب العام يبحث عن بديل لمشرفنا ،،، أخذ في البحث ،،، وما زال يبحث عن سداح أخر حتى يعطيه فرصته..
تحية واحترام لكل مشرف يبذل قصارى جهده في خدمة المجالس،،
ناقد خطير
__________________
خلف كلماتي..هناك نية ايجابية...يراها الايجابيون...حاول أن تراها....
22-08-2005, 11:39 PM
تعليمات المشاركة
العرض العادي
