المشاركة الأصلية كتبت بواسطة محمد بن دشن الفهري

[frame="9 80"][poem=font="Simplified Arabic,5,black,bold,normal" bkcolor="transparent" bkimage="backgrounds/18.gif" border="double,thick,firebrick" type=4 line=0 align=center use=ex num="0,black"]
عزاه ياعين عن النوم تايبه =وعزاه ياقلب مفارق حبايبه
احاول اكتم زفرت الحزن بالغنا =ونا عيوني بازرق الدمع رايبه
لو ماوطى كبدي وطى صمت الصفاء = تصبح وهي من صالي الهم ذايبه
ون ضاق صدري من هموم تلايمت = رحت انحر الفج الخلا مع ترايبه
واكثر بلاى إليا تعليت لي رجم = وهبت على جاشي ذعاذع هبايبه
ونا احسب فيه إنشراحي وسلوتي = وثره عذاب القلب واثره عقايبه
وابديت به قاف(ن) على قدر خبرتي = ماهو طرب لاكن تضايق حشاي به
قاف(ن) هلالي من ضميري بديت به = وتركت هزلاته ونقيت اطايبه
قامت مواريده على الجاش تدحم =ورد الضمي والقيض زادت لاهايبه
وجيت المكان وليت ماكان جيت له =جدت جروح في الحشاء من سبايبه
ديرت بني عمي هل المنع والذرا = قفيت عنه ومنه النفس طايبه
شفت المكان اللي قليل به الونس = من عقب عزه ما بقى الا خرايبه
واسمع صفير الباب لاهبه الهوا = باب (ن) قديم نــاحلات خشايبه
واسمع ونين من ورا الباب هزني = ولقيت لي عود(ن) نواصيه شايبه
وقام ونشدني العود عن ربعي اللذي =كثيرهم مثلي شكى فقد شايبه
ينشدني الماضي ونا قمت اجاوبه = وصدره على جيله تزايد نحايبه
وابوي راح ولا بقى غير ذكره = رحــل عن الدنيا وقفت ركايبه
ودع مسا الجمعه بسبعه محرم = مع الغروب وتوها الشمس غايبه
فرقاه نار(ن) حرق القلب حرها =لو اشرب الماء مايطفى لهايبه
قدلي ثلاث أسنين واجروحي اوغلت =وابطيت أداويها ولاهي بطايبه
ون مروا الشيبان باطيب مواقفه = اسمع وقلبي مخلب الهم صايبه
ماعنده إلا كلمت الصدق والنقا = وإليا دخل فامر(ن) يخلص نشايبه
ماعاش بالنمات والكذب والردا = وترا رفيقه ماشكى من طلايبه
ون جوه ضيفان يثني وقارهم =قلط لهم كبش كبار عصايبه
يشهد على فعله كلام آل ناله = يوم الزمـان الشين شبت شبايبه
صداقه(ن) بنيت على العز والشرف= ماشابها من غدر الانذال شايبه
من يوم كان الوقت فقر ومعوزه = عشى اخويا جنبه من أطيب جلايبه
ماخاف من فقر(ن) يرده على ردا = يرجي عـوض رب(ن) جزال وهايبه
(ويشهد على قولي جراب الجميحي = ياحي والله نمر هذي ظرايبه
ويشهد على قولي قصيد ابن ملهيه =يوم (ن) جلى همه وفرج كرايبه
ياويش لولا الله ثم دشن ابن راشد = كان القعم حلت علينا مصايبه
وياويش لولا كلمة قالها لي = كان امدحه مدح(ن) كثير شعايبه )
كلمه قصدها مزحة(ن) يوم قالها = وعن الردا يكرم ولاهو بجايبه
ونا ترا ماني بحافظ قصيدته = ويمكن حفظها شاعر(ن) من قرايبه
خواله احباب(ن) ليا حل ذكرهم = فازو بقول ونعم في كل نايبه
حرابهم بيموت مانسي وقعهم = تخلي مراحينه وتكثر صوايبه
أولاد ابن مجمح كعام المعادي = تارد حياض الموت ماهي بهايبه
وابوي عز الضيف والجار والخوي = وليت ياذا الدهر ماكثر عجايبه
ورقيت أنا في مرقب كان يدهله = وما جابه السرحان فالرجم جايبه
وابوي والله إن الحقه مانسيته= حتى تركز فوق قبري نصايبه
وبعد ثلاث اشهور مريت قبره = ودمعي على خدي تزايد سكايبه
عسى السحاب اللي تزبر غيومه= مزن(ن) من المغرب ترادم سحايبه
نوه مثل وصف الجبال الشوامخ = ترزم مقاديمه ويرخي ذوايبه
ينشي على قبر(ن) نزل فيه غالي= يسقي ثرا قبره ويسقى نصايبه
والموت حق وكلنا ذايقينه = من حان موته ما تفيده طبايبه
يالله عسى الفردوس الاعلى منازله= ارجي كريم (ن) مايخيب رجاى به
تكفون ياربعي هل الجود والظفر = ياكبر هقواتي ولاهي بخايبه
لم الشمل خير لنا من تفرقه =واللي بليا ربع تكثر حرايبه
هم(ن) قصاني لين بينت ما خفى = خلا بعيد السد تقرب حضايبه
عــزاه ياعين(ن) عـن النــوم تايبه= وعــزاه ياقلب(ن) إمفـــارق حبايبه [/poem][/frame]