أيهم أفضل الأستثمار العقاري أو الأسهم

السلام عليكم ورحمة الله وبركاته بارك الله لك ونا خوك وفكر في حق الله قبل حقك
وصدقني سيطرح الله البركه فيما عندك ولا تنسى صلاة الاستخاره واللي راح راح
الناس توهقوا في الاسهم يبغون يرجعون راس المال بس المشاريع كثيره وتوكل على الله
وشوف اللي يخارجك وواللي يتحمله راس مالك وتوكل على الله سبحانه والله الله في الزكاه
وفيه (صندوق الملك عبد الله لدعم المشاريع الصغيره) يمكن تستفسر عنه واتمنى انه ينفعك
تقبل فائق احترامي

__________________

الله يبارك لك فيها

انصحك لا تدخل في الزراعة إلا إذا كنت راعي طويلة وصبور

لكن اللي يبغى الفائدة بسرعة ما تخارج معه

وش رأيك تجمع فوقها كم قرش وتصلح استراحة للأفراح والمناسبات

بصراحة مربحها سريع ومريحه وما تحتاج إلا عامل واحد فقط

وفي حفلات الزواج راح تأجرها الليلة بـ 4000 أو 5000 آلف ريال في الليلة على أقل تقدير

وأنت شايف كيف الاستراحات شغالة وما توقف

__________________

الله يعطيك العافية يابن فالح وماقصرت

عزيزي ال معمر

هذا أن شاء الله اللي أنا أفكر فيه

التقاعد باقي له 3 سنوات

أقسمها نصفين 5000م أستراحة

و 5000م سكن عائلي وزراعة بسيطة وحوش غنم على قد الحال ونرتاح من غثا الدنيا

لاكن لدي أستفسار عن الأسعار

هل بناء سور بلك أرخص من الشبك وحوله أشجار كثيفة ؟

وكم هو السعر المتوقع للسور بأرتفاع 3 أمتار بطول 200م ؟

وكم هو سعر تكلفة البئر الأرتوازي بعمق 200م تقريبا ؟


الله يعطيكم العافية على النصيحة والمشورة والوقوف بجانبي بارك الله فيكم

عاد زودتها يالحبيب

شرنا عليك بالمشروع وانتهينا

عاد تبغاني اعطيك سعر البلوك والاسمنت والحديد والخشب واجره العمال وسعر الشبك والتشجير ووووو وانت جالس على النت

ما باقي إلا تقول تعال يا آل معمر أنت وفارس قحطان وبن غفره اخلطوا الخلطه وليّسوا الجدر <<< تلياس

وانخلوا البطحاء وبلطوا الحوش

الله لا يهينك قم اركب موترك ورح اسألك عن محلات المقاولات ومحلات الشبوك وحفر الارتوازات وراح تعرف كل شي



















































ترى امزح معك يا محتري السيل

اللي انصحك به لا تستعجل في حفر الارتواز حتى تتاكد من الارتوازات اللي بجوار مزرعتك

والله يوفقك

__________________

ههههههههههههههههههه

حسبي الله عليك يا ال معمر

قسم بالله بغى يغشي علي من الضحك

تخيلتكم كل واحدن رابط شليله ومقرط في طرف فنيلته بضروسه وهذا شيول وهذا مسحاة وأنت ماسك لي الماء بزعم أنك مقاول

تقبل مني كل الود عزيزي ال معمر لروحك المرحة وسعة صدرك

أكيد أنا المقاول المدير

ازبط الخلطه يابن غفره

__________________

السلام عليكم ورحمة الله وبركاته
الاخ محتري السيل يقولون العقار الابن البار ولكن عيبه يبغاله طولة بال وصبر بحيث انك ترجع راس المال وما فوقة من الارباح خلال فترة زمنية طويلة
اما اذا كان عندك الوقت الكافي والدراية التامه بحركة سوق الاسهم فانصحك بان تضارب يوميا وهذه اقل الخساير ومن خلالهل تستطيع ان تسترجع راس المال اللي فقدته في الاسهم وزيادة

وسلاااااااااااااااااااااااااااااااااااااااااااامتك

__________________
فاقدلي سلعة (ن) أكبر بضاعه ***** سلعة (ن) تشرى ولاهيب تنباعي

رفقة الطيب ليا غير اطباعة ***** اشهد انها كية (ن) توجع اوجاعي

وعليكم السلام ورحمة الله وبركاته

مشكلة سوقنا للأسهم مازال غير مستقر وتأثر فيه العوامل الخارجية والأخبار السيئة بسهوله

ومنطقة الشرق الأوسط مازال أمامها متسع من الوقت حتى تنال قسط من الأستقرار

وأعتقد والله أعلم ان أزمة لبنان ستستمر لسنين عديدة بأستمرار الخطط الصهيونية بعيدة المدى

ثم ستأتي مشكلة أيران مع نهاية شهر أغسطس مع مجلس الأمن والحصار والعقوبات في الطريق

يليها تصفية حسابات مع سوريا من أجل خارطة الطريق وشرق أوسط جديد مفتعل

يعني في أقل تقدير سنحتاج لسنتين حتى نقول سوق الأسهم بدى ينتعش

وبالنسبة للمضاربة مازلت أضارب بشكل يومي والخروج من السوق دون البقاء فيه أفضل

وطريقتي في المضاربة .....

متابعة المؤشر لمدة نصف ساعة مع بداية فترة التداول

وعند نزوله لأدنى نقطة وصل اليها أذهب للشركات الأكثر نزول ثم الشراء

ومع الأرتداد أبيع بمكسب قليل وأخرج من السوق

والحمد لله تعلمت كثير من خسايري السابقة



شكرا لك يا بن عوضه وبارك الله فيك