السلام عليكم

مساكم وصبحكم الله بالخير

في قصة عجبتني وحبيت اكتبها لكم وانشاءلله تعجبكم

أبي اقول لكم عن قصة صارت لي وابيكم تشاركووووني كل الأحاسيس البعيرية هع هع

المهم وأنا في عز النوووم والسعاااابيل الا فجأة .. رن التلفوووون .. وطبعا تلفوننا شااايل أبوي منه كل الأرقام .. مووب مخلي الا رقمين التسعه والثمااانية .. يعني ماالك الااا تدق على الشرطة ولا على الدفاع المدني مااااافيه ...
المهم اني رفعت السماعه وأقول : نعم .. الا وذاااااك الصووووت اللي يرد الروووووح ... صوووووت بنت ....
,اخوكم اذا سمع صوت بنت اوووجععه بطنه وانواااااع الاسهااااال ...
وقالت : الووووووو .
وانا مااعاااد عررررفت وش اقوووول انشلت براااطمي وطلعت كني يااااسر عرفاااااات ( الله يرحمه ) ... ال ال ال الوووووو ....
قالت : مين معاااي ؟ قلت : معاااك أنااا ؟ ( صراحة جواب يدل على ذكائي )
وهي اللي تضحك .. وانااا قلبي احسه مووووب طبيعي قاالبهاااااا ساااامري واستنزل عند الكبد والبنكرياس ...
أنوواااااااااااااااع الربكة ..
وقالت لي : سوسو موجوووووودة ؟
قلت لها : ما ينفع حوحو ....؟
قالت : مين حوحو ...؟
قلت : هذا اسم الدلع حق الحمار اللي هو انااااا . ( وضحكت للمره الثاااانيه هلى التوااالي)
وقالت : يؤيؤ .. شكلي غلطانه .. طيب آسفه ..
قلت لهاااا : لاااااا عاااادي .. لا شكر على واجب .. ( دايم اسمع هالكلمه وجاااالس احتررري الفرصة اني اقولها ) وقفلت السماعه ...
تصدقووون ... ما ادري وش صار فيني .. حسيت بقشعريرة في جسمي .. وان افرازاااات الخشم عندي زاااادت ...
وان اروووح انبطح في الحوش واكتب قصيده هجائية ...
لا يكووووون هذا هو الحب اللي يقولووووووون .. ( لعن ابو الحب اللي تعرفه يالضفدع )
عاد انا ماني متعود على البناااات .. لأن ماشاءالله بيتناااا فيه خمصطعشر رجاااال اللي هم انا واخواني وابوي وامي ..
( الله يخلف على ابوك واميمتك هذا وانت اكبر اخوانك عليه العوض ومنه العوض )
المهم يعني انا واخواني ماشفنا بنت ابد ... وهذا هو اللي سبب لنا عقدة تسمى العقده الفسيلوجيه ( من وين جت ذي)

المهم اني قررت اني اتعررررف على بناااات .. بس فيه مشكله وحدة اللي هي اني ماااعندي اسلوووووب ابد ...
(يعني وقفت على الاسلوووب لعن ابوووك انت عندك الف مشكله مو بس مشكله .. واهمها مشكلة وجهك اللي كنه لووحة انتبه امامك نقطة تفتيش ..)
الوكااااد اي مااالقيت قداااامي الااااا واااحد من العيااال اسمع عبدوووش .. معروف ان البنات ما يعوقووون معه .. وانا اللي ألقط مفتاح سيارتي واروووح له
المهم ... اني رحت لعبدووش وعلمته بوضعي وان امنيتي في الحياة اتعرف على بنت قبل مااا اموووت (اخس يالشايب)
قال لي : السالفه بسيطه .. اذا بغيت البنت تحبك حسسهاااا انهاااا احسن وحده بالعاااالم
قلت له :يعني كيف يعني .. اقولهاااا انتي احسن من مارادووووناااا !!
وهو اللي يرفسني برجله في بطني ... وقال لي : انت ثوووووووور .. وش دخل مارادونا يالغبي ؟
وهووو اللي يمووووه برجله ويمحطني بيده على جبهتي ...
وقال لي : شوف انت حمااار وما راح تفهم الا بالدروس العمليه .. ويطلع جواااله ويدق .. وقال لي : شوف انا الحين بكلم وحده ... وتعلم ..... قلت له : طيب ...
وكلم وقااال .. هلا حياااتي هلا عمرررري هلا رووووحي .. انا لؤي حبيبك ومجنوووونك ..(الحمدلله على العقل لعن ابوووك وين لؤي معه ...والله لو اشوووف وجهه في احسن الاحوال بعد ماااعطيه غير اسم جعفر ..قال ايش قال لؤي)
وقاااام يقووول لهااا .. احبك وامووووت فيك ... انا بدونك مثل البيت بدون حاااره .. مثل التلفون بدووون حراااره .. مثل السواااق بدون سياااره .. انا البنزين وانتي الشرراااره .. انا الشارع وانتي الاناره .. انا الرومانسيه وانتي الاثاره .. انا مبني التجارة العالمي وانتي الطياااره ..
(قسم بالله اني بغيت اضمه وابووووسه يوم سمعت كلااامه .. حسيت بشعووور غريب .. لعن ابليسه لو يكلم جدار كان ذاااااب )
المهم .. انه خلص المكالمه .. والتفت لي .. وقال :يالله دووورك ... باعطيك رقم بنت وكلمهااا .. قول لهااا نفس كلاااامي .. وقلت له بكل خجل : طيب ...
وهووو اللي يدق على بنت ويعطيني الجوال عشان اكلمهاااا .. وانا اللي اقووول : الووووووو ...
ويوم سمعت صوتهاااا ضاااااعت علووومي .. ونسيت كل الكلام .. وقلت لهااا : بابا فين ...؟
وماااحسيت الا بذيك الجزمه اللي لازقه في مقفاااي ...
وقال لي : قوووول نفس اللي الكلام اللي قلتله يالثووور ..
وانا اللي اقوول لهااااا .. هلا حياتي هلا روحي هلا تعااالي ..
قالت : طيب وبعدين ...؟
قلت لهاااا : انااا بدونك مثل الكيبورد بدون فاره .. مثل التقاطع بدون اشاااره .. مثل الحمااار بدون حمااااره ... مثل السلطه بدون خيااااره .. انا محترف وانتي نظااام الاعاااره .. انا الولاعه وانتي السيجااااره .. انا الددسن وانتي الغماااااره .. انا الصرصور وانتي البياره .. انااااا طوووط طوووط طوووط طوووط ... قفلت الخط بوجهي ..
قااال عبدووووش .. وش فيك ؟؟ قلت له : لا ابد الخط مشغووووول !!.. ( مايعرف يصرف ابد ...)
ومااادريت الا وعبدوووش مطلع لوووح فيه مسامير ودبجني فيه اليييين قلت للعنز يااخااااله ...
المهم ... اني رجعت للبيت ودماااني تصب وماليه وجهي من كثر الطق اللي جاااني من عبدوووش .. لدرجة اني اللي يشوفني ما يعرفني .. طاااالع كني مسااابقة .. ( من صااااحب هذه الصوووره ) اللي يحطووونها بالمجلات ..
وانا الي ادخل البيت بشووييييش عشااان مايشوفني احد ... واطلع غرفتي واسكر الباااب وانااام .. وفي عز النوووم ..
دق جرس التلفووون .. وارفع السماااعه .. الا وهي نفس البنت اللي كلمتني اول مرره .. قلت : نعم .. قالت : سوسو موجووووودة ؟
قلت لهاا : شوووفي .. بيتنا كله شباااب وما فيه احد يبدا اسمه بحرف السين .. انا واخوااني كلنا خااالد .. ومافيه الا اخوي فهد هو اللي اسمه نااايف ونناديه مسفر ....
والبنت كررتها ضحكه .. وقالت : ماشاءالله دمك خفيف ... ( وهي تحسبني استهبل مادرت اني دلخ من جد )
وقلت لها : شكرا .. (مسوي مؤدب )!!
وسألتني : وش تسوي هالحين ..؟
قلت لها : والله كنت نااايم .. قالت : يؤيؤ تنام في الليل انت ..؟ قلت : اجل متى انام ..؟ قالت : لااااا انا اناااام في النهااار واهر بالليل .. قلت لها : ليش الاخت بومه .. قالت : لا بس الليل وقت الرومانسيه.. انت تعرف الرومااانسيه..؟ قلت لها : لا والله ماعرف بنااااات انااا (مسوي فيهااا فااااهم )
وسألتني : انت وش اسمك..؟قلت لهاا : مصيول .. قالت : وش معناااه ..؟ قلت لهاا : هذا اسم كلب كااان عند جدي وسماني ابوي عليه لاني اشبهه .. وسألتها : وش اسمك ..؟ قااالت : داليدااا... قلت : اني ابي اعرف اسمك مووو عياااارتك ...!! قالت : هذا اسمي .. (هذولي البناااات .. تسألها وش اسمك .. تقول رهف ولا اشواث ولا افنان )
سووويت فيها اسلوووب وقلت لها اني حبيت وحده بس انتهى الحب .. لأن الي حبتها خاااانتني ... قالت لي : من حبيت ..؟ قلت : عنز جيرااننا .. بس انها خااانتني مع تيس سوووري عشااان له قذله !!..
المهم ... ان البنت قالتلي : اووكي اكلمك بكره لان امي تناااديني .. قلت : مو مشكله ..
وتطورت العلااااقه .. وصنا نكلم بعض كل يوووووم .. واناا انقلب حاااالي .. ولاااحظوااا اهلي اني تغيرت .. يعني نكون جااالسين على الغدا ولا العشاااا وانا آكل .. سااارح وانغف .. وبعض المراات انسى اصبعي داااخل خشمي
ولاحظوا اهلي اني صرت مؤدب واقرااا وااااجد .. واناا اقراا عشان اعرف كلام جديد في الحب .. تلقاني اقرا كتب الشعر والحب والطبخ .. ( لاتستغربون لأن كتب الطبخ اتعلم منها كلام حلو مثل .. ياعسل ، ياحليب ، ياقشطه ، ياكريم كراميل)
وبررضه صررت ادخل كتب ممنووووعه للبيت ... مثل كتاب .. ماذا تفعل في ليلة الدخله.. زكتاب سنه اولى زواج ..
بس المشكلة انها ضاعت هالكتب مني وصررررت اررروح عند بيارة جيراااننا اللي طافحه واقعد افكر واتأمل وارمي حصى في البيااااره ... ( مسوي رومااانسي .. مثل اللي يجلسوون على البحر ويرموووون حصى ..!! )
المهم .. انه في ليله من الملااااليل ...
قالت لي البنت : مصيوول .. اوصفلي شكلك ..!!
ياوالله البلشه .. وش اقووولها هذي الحين .. اقولهااا اني قررررررد .. اعترف لها بالحقيقة المره واقولها اني جداااار ماااالي ملااااامح ... ياولد خلني اسوي مثل كل الشباب .. وانصب عليها ...
يعني تلقى والواحد من الشباب شييييييييين واذا شفته في الشارع ما تدري هو رااايح ولا جاااي لان وجهه ماله معاااالم .. ولو تشوف وجهه تحسبه واحد معطيك مقفااااه .. يعني مفروض يحط في وجهه لوحه ويكتب .. ترى هذا وجهي ..
عشان الناس ما يلخبطون بين وجهه وقفااااه .. وانا مثلهم وأردى بعد .. انا اذا قابلت احد يجلس سااااعه محتااار وين وجهي من قفاااي وما يعرف الا اذا لقى الورقه ..
لأن فيني ورقه مثل اللي تجي في الفنااايل والسراااويل عشااان تعرف روى من قداااااام ..!!
المهم اني قلت لهاا ... انا عيوني مثل جواااااد ... وطولي مثل طلاااال الرشيد( الله يرحمه ) ... وخشمي مثل خشم خالد عبدالرحمن ... وملحي مثل ملح رااااشد المااااجد ... ومضوووووم كتييييييييير مثل راااامي عياش ...
( والله ما ناقص الا تحط ملحن معاهم وتكمل الاوبريت ..!! )

الوكااااد ... ان البنت شكلها خقت معي وقااامت تشاهق من الفرحه ...
وسألتها انتي اوصفيلي شكلك ...
قالت : ما اقدرررر .. لما تشوفني بتعرررف .. لان مالي شبيه .. (اخس يابريتني ..)
وانااا اللي افك خشتي وسعابيلي تقوووطر ... كني كلب شايفله عظمه ...
وقلت لها : يعني بشووووفك...؟؟ قالت : اكيد .. انا بكره بروووح شاليهات اليمااااامه اللي على طريق الرياض الخرج ونتقابل هناك ...
قلت لها : بس هذيك للعوائل بس .. قالت : عاااد انت دبر نفسك ... قلت : اوكي مو مشكله بس كيف اعرفك .. قااالت : بيننا الجوااال .. اذا وصلت كلمني وانا اعلمك وين نتلاقى ... المهم اني انا توهقت .. وشلوووووون ادخل الشاليهاااات وهي للعوائل ...
وقلت مااالي الا عبدووووش .. اتصل فيه وتفاهم ويااااه ... ودقيت عليه .. وردعلي بعصبيه .. نعم وش تبي يالغبي ..؟
وعلمته بالسالفه من سلسل الليييين طقاق عليكم .. ( تراااني اقصد من طق طق الليييين سلام عليكم )
وقال لي : والله صعبه وش بتسوي ..
قلت له : وش رايك تلبس عباااة وتسوي نفسك حرررررمه وتروح معي على انك زوجتي ..
وهو اللي يتغير وجهه .. وقال .. اناااا ولد ابووووي ...
قلت : بالله .. والله توووني ادري كنت احسبك ولد ابوووي انااااا ....!!
قال : تستهبل يالزبااال انا اسوووي نفسي حررررمه .. ياااويل ويلي ويلااااه ... خيل الخيل خياالهاااا ....
قلت له : يارجاااال كلك تبن لا ادوووس على بطنك ... جالسيين في مضاااارب البااادية حناااا....!!
قال : لا يامصيوول هذا شي مااقدر عليه .. وش اقول للجماعه ..؟
قلت له : ومن قااالك ان حنا بنحضر عرررس ... حنا بنرووح الشاليهاااات .. وانت ما راااح تكشف وجهك ابد ...
قااال : طيب .. ليش انت ما تسوووي نفسك حرررمه وانااا الرجاااااال ...!!
قلت : ياخوي انا مااااا اقدر لأني لا ناااافع رجاااال ولا حرررمه ناااافع .. وبعدين حتى لو غطيت وجهي بيكشفووون اني حرمه من ريحتي اللي كنها ريحة شراباااات عزووووبي ...
قالي لي : خلاااص بس لاحد يدررري .. قلت له : ابشر ... بس جهز نفسك بكررره بمرك وبنرووووح ...
واخذت سيارة وااحد من العيااال .. ورحت لبيت عبدووووش ولقيت عند بابهم شحاااده وهي اللي تجي تبي تركب ...
قلت لها : الله يعطينااا ويعطيك ياخاااله ... وهي اللي تطق قزاز السياااره وشوي وتكسرهاااا .. وانا اللي اطلع من جيبي ريااال ونص كنت ناوي اشتري به توكس .. الا وهي اللي تقووول افتح الباب الله ياخذ هالراااس ... الصووت مووو غريب علي ...
يوووووووه عبدوووووش ..
قال .. اييييه عبدوووش الله لايبااارك فيك .. افتح بسرعه قبل ما يطلع احد من هلي ... وفتحت له البااب وركب وانطلقنا للشاليهااااات ....
المهم ... وصلنا للشاليهاااات ... ونزلنااا من السيااره.. وامسك ايد زوجتي ... اللي هي عبدوووش سابقا .. ودفعنا التذاااكر .. ويوم جينااا بندخل .. وقفنا الحارس اللي على الباب ..
وقال لحظه : لازم زوجتك تدخل محل تفتيش النساااء لاننا شاكين فيها .. قلت له : ليش في مطار حنا .. تراااه شااااليهاااات .. بعدين وشفيها زوجتي ... ؟ قال الحارس : ياخوووووي وش هالحرمه اللي لااااابسه زبيرياااااات !!!!..
وانا اللي انااظر في رجول عبدوووش الا فعلا لابس زبيرياااات !!!! يالله لا تفضحنا بس ...
وانا اللي اقول للحارس : ممكن تتركني معاا زوجتي .. ابيها في كلمة رااااس ...
قال : ادخل هالغرفه الفاضية وتفاهم معاااها... وانا اللي اسحب عبدووووش للغرفة واترفس في بطنه وانواااااع الاكواااااااع ... لعن ابوك يالغبي زبيريات مررره وحده ...
قال : وش اسوي ما لقيت جزمه كعب على مقااااسي
وقلت له : اسمع نزل العبااار على ارجولك عشان ماحد ينتبه يالغبي ..
المهم .. رجعنا للحارس .. واعتذرنا منه على سوء التفااااهم .. دفيناااه بمية ريال عشااان يسكت .. واول ما دخلنااا استأجر شاااليه صغير وقلت لعبدوووش يجلس فيه .. وانا بروووح ادوي خويتي ..
وطلعت ودقيت جوال على خويتي ووصفت لي مكاااانهااا .. تقول انها عند الشجره اللي عند المطعم .. زانا اللي اروح هناااك .. واجلس ساااعتين ادوووورها وما لقيتهاااااا ... وادق عليها جوااال وقلت لها : وينك فيه لي ساعتين ادوورك
قالت : انت وين بالظبط ..؟
قلت : انا واقف جنب كيس زبااااله .. وانتي وينك ؟
قااالت : وانا واقفه جنب وااحد عليه قل صح ..
وانا اللي التفت وراااي ... ووووب .. هذي هي ..
( افااا طلعت انا المجنون اللي اقصده ... وهي كيس الزبااااله اللي اقصده .. )
وهي اللي تنصدم ...
وقااالت : هذا انت ... ؟؟؟ وين الوصف اللي تقووول .. اجل طلااال الرشيد هااااه .. امحق طلااال اللي تشبهله انت .. ( صااادتني ان عيووني مثل عيووون خااالد الملا ... وجسمي مثل نبيل شعيل .. وخشمي مثل عبدالمجيد عبدالله ... )
قلت لهاا : لا انا فعلا مثل مااا قلت .. بس صاااار لي حااادث وهو اللي اثررر على وجهي .. ولا انا كنت حلوووو .. (اييييييييه هيييين )
قالت : مو مشكله اهم شي اسلووووبك اعجبني ..
قلت لهاا : اشوى ان اعجبك شي فيني ... وطلبت منها توريني وجههاااا .. قاالت : طيب .. بس لا يشوفنا احد .. وانا اللي اغطي عليهااا ... قلت : يالله بسرررعه .. وهي اللي ترررفع الغطووووة ... وانا اللي اضحك ...
قالت لي : وش فيك تضحك ..؟؟
قلت لهاا : يالله عاااد بدون استهبااال .. قاالت : وش فيك هذا وجهي ..!! قلت لهاا: يالله بسرعه شيلي القناااع اللي على وجهك لا تستهبلين .. وهي اللي تقول .. هذا وجهي الصدقي يالقرررررد ...
وانا اللي انصدم واحس ان الارض تدووور فيني .. وش ذا الوجه الشيييييين ... اول مررررره اشوووف وجه يطله منه ريحه مخيسه .. لعن ابوووها حتى الشجرة اللي كنا واقفين جنبها رافعت ثوووبها وانحااااشت .. وكل الشجر اللي كاااان حولنااا انحاااااش وراااح وقف في مكااان ثاااني بعيد من شيييين وجههااا ...
وانا كنت حاااط في بااالي كلاااام رومااانسي جلست عشرين دولاااار يوووم وانا احفظ فيه .. عشااان اذا شفتهااا اقوووله لهااا .. بس يوم شفت وجهها اللي كنه واحد جااالس في مجلس رجاااجيل وعنده اسهاال ... وضيعت كل الكلام اللي حفظته وقمت اللخبط في الكلاااام .. سألتها : ليش الغمص سااكن عيونك ..؟؟
جاوبتني .. من الارق .. سألتها : طيب وش هالبيبسي اللي مكبووب على ثووووبك ؟ جاوبتني : هذا موووب بيبسي .. هذا مرررق ..!! سألتها : طيب ماا عندك غير هالثوووب ..؟؟ جاوبتني : الا كااان عندي بس انسرق ..!!!
سألتها : طيب ما داامك شينه وشهوله تغااازلين ..؟؟ جاوبتني : اناا كنت حلوة .. بس وجهي انحرق ..
سألتني : وش رايك فيني .. ما اشبه بااسكااال ..؟؟ جاوبتها : انتي جسمك جسم بااسكااال .. بس الوجه الله خلق وفررررق ...
المهم اني ماقدرت اتحمل وجهها .... وقلت لهااا : انتي جدك الاكبر كان غووريلا ..؟؟
قاالت : لا تطنـز انت ووجهك .. انا من اول كنت مصدقه ان الديناصورات انقرضت .. بس من يوم شفت وجهك عررفت ان هالكلام اشاااعات ...قلت لهاا : شوفي ياآنسه جرااااده .. انا ودي اجاااملك واقولك كلااام حلو .. بس وجهك يقووول مااالك امل ... قالت لي : والله حتى انا بعد ودي اقولك كلام حلووو بس وجهك ما يساااعد .. وجهك كنه دعاااية لاااا للمخدراااات ..!!!
المهم .. ان كل واااحد مااا تفل في وجه الثاااني ورحناااا .. وانااا من الصدمة توقف تفكيري .. كل آمالي واحلامي راحت ادرااج الدواااليب ... وركبت السياره ..و ورجعت للبيت وانا متحطم .. كنت متخيلهاااا مثل مايا نصري ولا اليساااا ... وطلعت مثل فطووومه .. لااااااا خلاص ما عاد ابي اتعرررف على بناااات ( تكفى آخر مررره .. حرااام تحطم قلوووب المعجبااات ياراااغب علاااامه ..) <<اقول انطم بس >> الوكااااد .. اني سكرررت باااب الغرفه .. ونمت نومة عدوووكم .. ( مسوي علوووم رجااال )
وما دريت اليووم الثاااني الا باللي يرفس الباااب .. وانا اللي انقز من فراااشي .. وش السااالفه يالربع .. الا وهوو ابوي يصااايح ... افتح ياااالسمرمدي .. لا بارك الله فيك .. وانا اللي افتح الباااب .. الا وابوووي وجهي ووجه ما يطمن .. ويطلع ذيك العجررررااا من ورااااه ... وانوااااااااع التلحيط ...
واخواني وامي واقفين يتفرجووون عند الباااب ... من لقاها .ز مصارعه على الطبيعه .. المهم ان ابوووي شغااال ضرب فيني ويقووول تتزوج من ورااااانا يالخسييييس .. قلت له .. والله ما تزوجت .. قااال .. لااااا .. لان الشاليهااات اتصلوااا علينااا وقااالو خلوا مصيول يجي ياخذ زوجته اللي نسااااها .. وانا اللي تضيع علوومي .. ابي افهم ابوووي السااالفه .. بس ان شغاااال ضرب فيني .. ما ترررك لي فرررصه .. وبعد جهد جهيد قدرت انفك من ابوووي .. ورحت لآخر الغرفه .. وياخذ ابوووي نعاال ويرميهااا علي .. واناا اللي اوخر عنهااا بسررررعه وامسكها بفمي ..
( متأثرررر بالأفلام ..) واخواااني يوم شافوووني سويت هالحرررركه وهم اللي يصفقووون ويصفرووون لي .. وانا اللي اتحمس .. وانط على ابوووي وامسكه مسكه منووووومه ( خربها الغبي مع ابووووه )
وينط وااحد من اخواااني ويمسك يد ابوووي ويرفعهااا اول مره وطااحت وثااني مررره وطااااحت .. ويرفعهاا ثاالث مره وطاااحـ..لااااا لاااا لاااا غير معقووول .. رفع ابوووي يده ويأشر بأصبعه يعني لاااا تراني مانمت !!..
ويووم شفته ما نام .. واناا اللي اقووم وامسك رجوووله ... واسويله حررركه مقصيه عشااان يستسلم ... بس مااستسلم ... واخوااااني يقنعونه انه يستسلم بس هو عنيد يحاااول يزحف عند الحبااال ... بس انا ما خليته يتنفس ...
وفجأه ... اوووووه ... لاااا تدخل خارجي .. امي جاااابت المقلاااة ومحطتني على جبهتي محطه مدووووويه ... وتدخلوااا اخوااااني ومسكوا امي وطلعوووها براا الحلبه .. ( عائله دلووووخ )
المهم اني دخلت وماااعاد ادري وين انا وطحت مكاااني .. ويزحف ابوووي بشووويش ويحط يده على صدري ... ويعدووون اخواااني ... واااحد .. اثنين .. ثلاااثة ... فاااااز ابووووي هيييييييييييييييه ( الحمدلله والشكر )
المهم اني فهمت ابووي السالفه ( ماصلح في جريااات ابد اعللللم واكع على طووووول ) ونمر بيت ابو عبدووووش ونعلمه وانوااااااع التمحييييييييط فيني ...
المهم انا وصلنا الشاااليهاااات وقلت لعبدوووش معي لك مفاجأة ..!! وهو اللي يضحك ويقول : والله اني خااابرك ذيب مااتترك خويك كذاا الرجال ولا بلاشووو ... وانا اقول في صدري ايييييه هييين ...
وهو يقوول : اكيد بتعرفني على وحده من خواتهااا .. قلت : ايه انا بعرفك على وحده صحيه .. وهو يبي يشووف المفاجأه وبيفضخ العباااه .. قلتله خلهاا عليك .. ( انواااع النذاااله )
وصلنااا السياااره .. الااا وابووو عبدوووش ماااسك مفك عجل في يده ويحتري ولده ..
وعبدوووش من هووول الصدمه ماعاااد شااالته رجليه .. طاااح مكااانه وقام يصيح ويولول .. واستلمه ابوووه انوااااع تفقيع الوجه وانوااااع التررررفيع والتـنـزيل ... وانا جااالس اتفرررج ومبسوووط ... وما دريت الا وابوووي ماااسكني وانوااااع الررركب ... وانا اللي اصيح فيه .. هيه يابو الشباااااب .. حلى هي .. !! توك طاقني قبل شووووي!!..
قااال ابوووي : ايه صحيح .. بس عيب الرجااال يطق ولده وانا جااالس اتفررررج .. لااازم اسوي شي اناا بعد ..
( لا صراحه ابووووي فاااااهم في الاصووول ... طالع لي )
المهم .. عقب الطق اللي كليته انا وعبدوووش .. تزاعلنااا مع بعض .. واناا حررررمت اتعرف على بناااات .. ومثل ما قال المثل ... ابعد عن الشر ياااعمري وغني لوووووه ... وداد دان لدااانه دااان واااويلوووه مشكلني حبك يارووح الرووح مشكلني .. يااالبيه يالبنااات اللي مع راااشد في الفيديو كليب .. اروووح طحينيه معهم ...
( شكله ماتاااب ناااوي ينطق مره ثااااانيه ) .


آسف على الاطاله واتمنى انا اعجبتكم ...


اخوكم
ذيابة قحطان

هلا وغلا أخوي ذيابة قحطان وألف شكر على طرح هالموضوع الحلو ولكن أود أن أخبرك بأن الموضوع قد تم طرحه من قبل أحد الأعضاء على هذا الرابط
http://www.qahtaan.com/vb/showthread...CF%E6%E6%E6%D4

ولكن أيضا لا يمنع أن نقول لك ألف مليون شكر ويسرنا تواجدك معنا

__________________

شاااااااكر جدا مرورك على الموضوع
والله ياخوي اني قاعد يومين وانا اكتب فيهاا ولو ادري انه موجود في المنتدى ماتعنيت بس تعرف اول مره ادخل منتديات وهذي بالنسبه لي اول مشااااركة في اول منتدى


على العموم آآسف على تكرار الموضوع


اخوك
ذيابة قحطان

ذيابة قحطان

بيض الله وجهك وجهد تشكر عليه


وإذا كان تبغى تعرف موضوعك الجديد مكرر ولا لا سو عملية بحث ويبين معك هل هو موجود أم لم يتم طرحه بعد


تحيتي لك حتى لو كان الموضوع مكرر


آل معمر

أسلوبك رائع وجميل وخالي من أي تجريح عسى عمرك طويل

__________________



ممصمنا المبدع
تركي العلياني
ألف شكر لك

حدباء قذله ادري إن أسلوبي زين وحلو المفروض تعرف هذا الكلام من زمان مو من الحين

__________________

آل معمر

يابن الحلال ما اخطينا أنت تدور الحرش بالي هو به الله يفكنا من شرك


مشرف ومهبول يالله اني في وجهك

__________________



ممصمنا المبدع
تركي العلياني
ألف شكر لك

الله يسامحك يا حدباء قذله كيف تخطي على المشرف تو الشباب مهبول مره واحدة

وش رأيكم يا شباب

ومع هذا كله ما أقول إلا الله يسامحك <<<<< أموت الأخلاق هخهخهخهخه

__________________

ليش تعدل مشاركتك يا سعادة المشرف


ولا عشان ما يقولون كلام حدباء قذلة صح


>>>>>>>>>>>>>>>>>>>>>>>>>>>>>> لقاها فرصة عليك


تسئل الشباب ........... أكيد بيفزعون معك عشانك مشرف مجلس الخبال والرجة

__________________



ممصمنا المبدع
تركي العلياني
ألف شكر لك

الحمد لله والشكر
انت ماتستحي .... تراه عيب عليك تقول او بالاحرى ( تنقل مواضيع من منتديات ثانيه ) وتحطها في منتدى الرجال الطيبين .
ترى مانت متربي تربية شوارع .... ولا انت جاي من طريق ثانب
الواحد لازم يدافع عن اعراض المسلمين ويكون عنده ولو ذره من الغيره
سبحان الله الواحد ذا الزمان يكتب وينقل شي ماهو يدري عنه
خذني جيتك ..... لاقالوا العرب مشينا مشى ولاقالوا عودنا عود .....
اخاف ينطبق عليك المثل اللي يقول ( ابد راسك ولو بخزوه ) ؟
الواحد يعقل ويتركد ويخلي عنده شوي غيره .... وينصح الشباب في مثل ذي الامور .... وبيوتنا جميع كلها فيها بنات وهذولا البنات اخوات ولا امهات ولا على الاقل محارم .... فالواجب الدفاع ولو حتى بالكتابه .... ماهو تعليم الصغاعر كيف يسوون ويش يقولون و وين يروحون
الله يهديك ويدلك على الطريق الصحبح
قل آمين