(( قالوا مطوع ويش حدك على الغزل ؟!))

[poem=font="Simplified Arabic,5,black,bold,normal" bkcolor="transparent" bkimage="" border="none,medium,gray" type=1 line=0 align=center use=ex num="0,black"]
روحي عليها يا هل العشق هايمه = ولوصلها شد المولع عزايمه
اخفيت عشقي لكن الشوق فاضحي = وازريت من كتم الغلا في كظايمه
قالوا مطوع ويش حدك على الغزل = وش لك على دروب العنا والمزايمه!؟
قلت المطوع طاح في الحب وابتلش = الله يلوم اللي من الحب لايمه
حبيبتي عن ساير الغيد تختلف = وهي للمولع مبتغاه وغنايمه
ومن لا يفكر في غلاها ووصلها = راعي طموحه ما تعدى بهايمه
عشقتها وماني برغبان غيرها = وكبدي ليا جا طاري الغير حايمه
هي نور عيني وانشراحي ورغبتي = وخلاصة العمر الجديد وقدايمه
لامن ذكرت الورد في الخد واللما = يذوب قلبي وتثنى دعايمه
بكر وكاعبها كما طعس في فلا = مقصورة عن شوفة الغير شايمه
عيناء عين وامتلكني سوادها = لا هي بيقضانه ولا هي بنايمه
والشعر ليل تحته الشمس نورت = سبحان من سوى الجمال وتلايمه
لبيه لا غنت وجرت بصوتها = من يرسم النؤته يلخبط (قوايمه)
ولبيه يا عاج ارا فيه فضة = ولبيه يالجسم الفريد (وقوايمه)
انا اتحدا ان كان في الغيد مثلها = لا في جبال الطين ولا تهايمه
لا هي تحيض ومالها قسم في الدنس = ولا هو يلايمها ولا هي تلايمه!!
ولا هي تصلي رغم هذا احبها = ولا هي لما صاموا المخاليق صايمه!!
ولا هي بجنيه ولا هي من البشر = ولا بصنعة ساحر في تمايمه!!
هذي حقيقة بنت والموت دونها!! = وباذن الله ان روحي على العهد دايمه
امر عظيم لنه الموت يا بشر = ومن اجلها تصغر بعيني عظايمه
رهج السنابك عند من رام وصلها = احلى من ورود الربيع ونسايمه
يا زينها في حزة الحمد والثنى = لا لاغية تسمع والاجوا ملايمه
من لقيها مرة فهذي سعادته = لا عاد به فرقى ولا البعد ظايمه
وصفتها وانا بعد ما نظرتها = وشلون لو هي نصب الاعيان قايمه
ماني بجازم انها لي وانا لها = هذا بيد الله وهذي قسايمه
انا احاول اجمع المهر والمهر!! = ما هو بذهب وانا بالاسواق سايمه
المهر روحي فوق يدي اقدمه = واطرح لها الكافر واشقق شكايمه
يا لايمي مادام هذي حبيبتي = معذور لو روحي من العشق هايمه[/poem]

اررررررررحب يا محمد

يسعدني ان اكون اول من يمر على هذه الرائعة صح الله لسانك

قلت المطوع طاح في الحب وابتلـش
الله يلوم اللـي مـن الحـب لايمـه

ههههههههه الله يلومه اللي يلومك يالقرم

تقبل مروري

الله الله عليك يابن نغموش

قصيدة رائعة جدا ً

اقتباس:

لا هي تحيض ومالها قسم في الدنس ولا هو يلايمهـا ولا هـي تلايمـه!!

صدقت يابن نغموش



اعجبني البحر و القافية و الفكرة و سبك و حبك القصيدة

تذكرني بالقصايد الجزله القديمة



ابدعت ابدعت

صح لسانك يابن نغموش

و ترانا متعطشين لجديدك




.

__________________

ارحب مليون يابوعبدالرحمن ..


شهادتي فيك مجروحه يالأصيل

قصيده جزله ..


والله يجعلها من نصيبنا ونصيبك ..


لاهنت

__________________

لسماع قصائد الشاعر : سعيد بن مانع
اضغط هنا

أبو عبدالرحمن


لله درك كما عوتنا بإدااااااااااااااااااعك تأسر قلوبنا بهذه الشامخه

صح لسانك ورحم الله شيبانك

المهر روحي فوق يدي اقدمه = واطرح لها الكافر واشقق شكايمه
يا لايمي مادام هذي حبيبتي = معذور لو روحي من العشق هايمه

أعجبتني هذه الابيات
صح لسانك يابو عبدالرحمن وننتظر جديدك

الكبير يضل كبير

لا هنت وبيض الله وجهك شاعر متمكن ونا اجيزك بقوه

اخوك

اررررحب يابوعبدالرحمن


تصدق تفاجيت ووقلت المطوع يحب من جد

لكن هين طلعت حوريه وان شاء الله يرزقك من حور الجنه ان شاء الله


وصح الله لسانك طرق هلالي فريد لايجيده سوى العمالقه امثالك

__________________

صح الله لسانكـ وبيض الله وجهــك


لا لا معذووووووور والله تكتب قصيد غزل


والله يجعلهآ من نصيبك ونصيبنا ..



والله يجعل الجنــة دارك ودار كل مسلم



تقبل مروري المتواضع امام ابياتك الشامخــه