منيره في فرنسا؟؟

منيرهـ في فرنسا ..!!

قرر الأب اذا نجحوا كل عياله يوديهم في الصيف لفرنسا..

أنبسطت منيره مره لما سمعت هالخبر لأنه صار لهم زمان ماسافروا..

المهم شدت البنت حيلها في المذاكره وأخوانها مثلها،،وجت نهايه السنه نجحوا كلهم وسافر
بهم
أبوهم مثل ماوعدهم..

كانت منيره مستانسه بس في شيء منكد عليها كل السفره،،ومخلي الأخلاق في النازل..

أبوها شرط عليها ماتشيل العبايه.. ياعبايه يامافي سفر..

رضخت منيره لأبوها راحت بالعبايه والطرحه "محجبه" بس ،، (يحمد ربه بعد)..خخخ

البنيه أول مره تسافر بعد ما كبرت..كانت ماخذه راحتها أول لكن الحين خلاص"البنت كبرت"..

تمشوا وراحوا وماخلوا قرنه في فرنسا مادعسوا فيها..
المهم العيال شبوا على أبوهم يبون شاطىء يسبحون ونزلت الطامه الكبرى على منيره..!!

وشلون تروح الشاطىء بعبايتها..؟!

كيف تشوف أخوانها يسبحون وهي لا..؟!

طبعا مالها الا تستسلم وتطس معهم...الزبده راحت خويتنا وهي مطنقره بينما العيال يسبحون ويمرحون"الله يفكهم من شرعينها"..خخخ

راحت هي على جنب قعدت لحالها من زين الأخلاق.."خبركم راكبتها أم العبيد"
وقامت تمقل بخلق الله بينما هي كذلك "قلبت عربي"
لمحت ذاك الشاب الفرنسي اللي يموووت ويجننن طوييل
ووسيييم جسمه عضلات ولونه برونز"لابس مايوه"وشعره متروس جل ولابس ذيك النظاره الشمسيه الماركه..
طالعها هو وأبتسم بغى يغمى عليها يوم شافت صفت اسنانه..أبتسمت هي الأخرى قام و من باب الميانه قرب قرررب لين أرتز جنبها..



وهي تسألون عن حالها مسيكينه مسبهه.. متنحه..في نفس الوقت مستحيه.
.وبعد متوهقه خايفه يشوفها أبوها تحاكي ذا الأطخم يقوم يسفرها لديرتها دايركت "حرام عليه أبوها مايكفيه ركز دميجته وحكرها بالعبايه يقوم يتفلسف"

التفت عليها أبوالشباب وانفلت بالحكي طبعا هي ثور الله في برسيمه ما تدري وش
قاعد يرطن هو شافها توزع هالأبتسامات عرف ان ماعندها دبره..

قام سألها:do you sbeak english..
هو سأل ولا ماسأل..بغت تحب راسه البنيه..على طول :
ييييس..
وداربينهما الحوار التالي:

أبوالشباب:أنت من وين شكلك مو فرنسيه"أنواع المجامله أجل هذا شكل فرنسيه تتشمس بعبايتها"..!!

منيره:أنا من المملكه العربيه السعوديه "مكبره بالخلاقين" طبعا لاتنسون أن كل هالبربره بالأنجليزي..!!

أبوالشباب :وهو متحمس كيف وصلتم هنا..؟!

منيره:وصلنا من كم يوم عادي!

أبوالشباب:بس كيف عبرتو البحر..؟!

منيره:أي بحر..؟!! مامرينا على أي بحر رحلتنا كانت دايركت الرياض باريس..

أبوالشباب مستغرب : يعني ماجيتو على بعاريين ..؟!

منيرة كن أحد مدغدغها: أي بعارين أنت تمزح جايين بطياره ولا بالجديده بعد أم شاشات.."ياشين السرج على البقر"

أبوالشباب:عندكم طيارات..؟!

منيره:أي عندنا ليه وش فاكرنا..؟!

أبوالشباب:أنا اللي أعرفه عن السعوديه أنها صحراء قاحله والناس يتنقلون فيها بالجمال والحريم يركبون وهم متغطيين على الجمال والرجال وراهم شايلين براميل البيترول!!

منيره:وين ياعمي..؟!وش ذا أحنا عندنا كل وسائل التكنولوجيا في ديرتنا..سيارات وطيرات وأنترنت وشوارع متطوره وترى عندنا فيصليه ومملكه..!!

"هذي موب احسن تنطق وتقابل فيصليتها ولاتفشلنا براا" خخخ

أبوالشباب:أجل آسف أنا فاهم شيء بس الواقع طلع شيء آخر بس أنت ليه ماتسبحين...؟!

منيره:ماقدر أسبح لأني محجبه..

أبو الشباب: أشوه أنت مو منهم..

. منيره: من مين..؟!

أبوالشباب: اللي متشوهين..!!

. منيره:أي متشوهين..؟!

أبوالشباب:الحريم اللي يغطون وجيههم عندكم متشوهين صح..؟!

منيره: لا طبعا أي متشوهين..؟!الموضوع موتغطيه بس ديننا هو اللي فرض علينا كذا درءا للفتن"أبو الفلسفه"أنا هناك أغطي وجهي.. مثلا انت الحين شا يفني مشوهه..؟!

أبوالشباب: لا أبد أنت جميله ولونك حلو بس موحرام جميلات مثلكم يضطهدون..؟!

منيره : ليه يضطهدون ,, من قال أحنا كذا ..؟!

أبوالشباب: مثلا ممنوعين من السواقه..!!

منيره:مين قال لك أحنا نبي نسوق كل حرمه وبنت لها سواقها الخاص نسوق ليه..؟!
"شطحت البنيه وتكبر بالخرق"

أبوالشباب: طيب مايقبلونكم بأي وظيفه..؟!بس مدرسه صح..؟!

منيره:الدوله الله يعزها ماتوظف بناتها الا في وظايف تناسب قدراتها بس موبس تدريس..البنت السعوديه طبيبه صيدلانيه وسيدهـ أعمال وموظفه حكوميه بس الأغلب في قطاع التربيه لأنه هوالأقرب لطبيعتنا البنات..

أبوالشباب:بس مانعينكم عن المناصب الكبره مخلينها للرجاجيل ولاتقولين لأ..؟!

منيره أخذتها العزه وقامت تألف : من قال كذا أصلا أنت ماخذ فكره مرره سيئه عنا المرأة تتقلد مناصب كبيره حتى أنا خالتي وزيره..!!

أبوالشباب: متأكده أنا أعرف أن السعوديه مافيها حرم في حكومتها..

منيره:كل معلوماتك غلط قلت لك خالتي وزيره.

.أبوالشباب: شكرا على تصحيحك لمعلوماتي وبهالمناسبه أنا عازمك الليله على خرجه
"قلط أبوالشباب"
منيره:وين عازمني..؟! "متشققه.."

أبوالشباب: في بار جنب بيتنا أمرك ونروح له..

.منيره:وين أحنا..؟! هي ترى ماعندنا هالشغلات أحنا موبحقين بارات..ديننا محرم علينا الشرب والأختلاط والتبرج..وبعدين حرام أطلع أنا وأنت بروحنا..
هذي تسمى خلوه..

أبوالشباب:يعني أيش خلوه..؟!

منيره: يعني بنت وولد مايعرفون بعض ولا محرم لما يجلسون في مكان لوحدهم..

أبوالشباب:طيب وانتي الحين قاعده معي..؟!

منيره:لا هذا مكان عام ومليان ناس..

أبوالشباب:على العموم انا أكررعزيمتي .

.منيره:وأنا أكرر رفضي..

أبو الشباب:ترى اذا قمت مافي تغيرين رايك..

منيره:لا أبد..

قام ابوالشباب ومشى خطوتين وبعدين رجع لمنيره..
وهي على جلستها انحنى عليها ونزل نظارته على طرف خشمه طالعها بعيونه وقال لها بالسعودي ..

أجل خالتك وزيره هاااا ..؟!!!




وكل بنت لها سواق وعديتها لك ..لكن هذي قوووويه..

هههههههههههههههههههههههههههههههههههههه ..





أتمنى تكوون عجبتكم ،، وما تكوون مكررهـ ..

.