هيّة بين آل عاطف قحطان وآل فهاد يام على المساعره الدواسر .

أخواني الأعضاء
السلام عليكم ورحمة الله وبركاته صبحكم الله بالخير
أجتمعوا فرسان من آل عاطف ومعهم فرسان من آل فهاد يام وعقيدهم في ذا المغزى العقيد الفارس علي بن راجح بن القينه العطافا آل شريم آل عاطف قحطان .
وكان معه العقيد الفارس حشر الشهري آل فهاد والفارس صملول بن مسعود آل شريم آل عاطف المهم غزوا على المساعره الدواسر وكان الشيخ الفارس حسين بن مطحس بن قويد أحد شيوخ المساعره الدواسر قد تعاهدوا ماحد يمنع علي بن راجح وان يذبحونه لو كان منيع لشجاعته وفروسيته ولكثرة مغازيه عليهم .
وقد غزاهم العقيد الفارس علي بن راجح بن القينه بالفعل وخذ الابل من عرق الحمار اللي جنوب وادي الدواسر ولحقوا هل الابل على راس الشيخ الفارس حسين بن قويد وحصلت المعركه وكانت شرسه وقد فكوا الدواسر الابل.
وحاولوا يردونهم الا العقيد الفارس علي بن راجح طمر من فرسه وقام يرمي الدواسر بشجاعته المعروفه وقد فاته الجيش وحالوا بينه المساعره وبين ربعه .

وبالفعل لحقه الشيخ حسين بن قويد ومعه خيّال ويوم جاوه وخذوا سلاحه ومنعوه وما عرفوا شكله
ومنعوه ومنع معه ثلاثة فرسان من آل عاطف
وكان الشيخ الفارس حسين بن مطحس بن سمحان بن قويد وأخوه مسفربن مطحس بن قويد
معهم علي بن راجح ابن القينه آل عاطف منيع " اسير " وهم لا يعرفونه ولاكن شك فيه مسفر بن قويد فقال لاخوه حسين : [ هذا ابن القبنه وصف ابوي وإلا أنا شاك ]فرد عليه : [ ما أظن إنه إياه ] فأرادوا ان يتأكدون فذهبو إلى الفارس وقيان بن رويضان بن حبشان المساعره .
فقال حسين بن قويد : [وقيان ابشرك ذبحت ابن القينه]
وكانوا المنعى يسمعون الكلام اللي بين وقيان بن رويضان وحسين بن قويد .
فقال واحد من المنعى من آل عاطف وكان فطيناً ويريد ان لا يقتل عقيدهم علي بن راجح ابن القبنه : [ أنت ذبحت راعي السميراء الذي وصفه كذا وكذا ] قال حسين بن قويد :[ نعم ]فقال العاطفي: [ لا والله ماذبحته انت ذبحت عود " شايب " مسكين ولا عند امه ومرته وخواته ثنتين الاهو ولا انت لاقي خير ]

المهم في غفلة من الجميع وعندما حاولوا المساعره رد القوم عود عليهم كل من الفارس حشر الشهري ال فهاد وعقر له عدد من الخيل ومعه الفارس صملول بن مسعود آل شريم آل عاطف ونكسوها عليهم وقام الفارس صملول بن مسعود آل شريم آل عاطف وعطى العقيد الفارس علي بن راجح بن القينه العطيفي " جنبيه " .
وبعد ذلك رجعوا الدواسر وسلموا وجا الفكك على الله ثم عليهم
المهم بعد رجوع الدواسر وقالوا أوصاف الفارس اللي منعوه لواحد من شيوخهم قال : [ نعنبوكم ذا ابن القينه و يستاهل المنع (ولد راجح ) لكن والله إن يغزيكم مرة أخرى ] .


والمهم غنى العقيد الفارس علي بن راجح بن القينه العطافا آل شريم آل عاطف قحطان قصيدته المشهوره في ذا المغزى يقول :

[poem=font="Arial,5,darkred,bold,normal" bkcolor="transparent" bkimage="" border="double,thin,gray" type=2 line=0 align=center use=ex num="0,black"]
يالله لا تجعل على الفرض مايل =ويالله لاتشمت بعدواني عليه
انشدوا ردم الحمار من الدبايل=يوم قنف الصيف يرعد من عشيه
حلت الطرفاء على راع الفتايل =وانثنيا بالقصب عند الرديه
ليتني ماغرت لجمال العدايل =لين لحقوني عوال المسعريه
نعم اخو حبنه طمر والجيش مايل =ماحد(ن) عشّاه في عقر الثنيه
ال فهاد تطوع كل عايل =ماختلف رمايهم في المركبيه
ضاعت الجادات في راع الجمايل =كون ابو رفعه عطاني حضرميه
اتركيهم يامنقضة الجدايل =ترّكي اللي شافني مافزع ليه
ودك انها ماتمد به الرحايل =قاعد(ن)في البيت يروي للغضيه[/poem]


ورد عليه شاعر من فرسان الدواسر بهذه بالابيات:

[poem=font="Arial,5,darkred,bold,normal" bkcolor="transparent" bkimage="" border="double,thin,gray" type=2 line=0 align=center use=ex num="0,black"]
تستحق المنع ياذرب الفعايل =يازبون الجيش ياحامي الونيه
لو عرفك حسين بكبود غلايل =كان غنى الطير في ذيك العشيه[/poem]

## [ الحمار ] هو عرق الحمار جنوب وادي الدواسر.
## [ عوال المسعرية ] هم المساعره الدواسر .
## [ حسين ] هو الشيخ الفارس حسين بن مطحس بن سمحان بن قويد أحد شيوخ المساعرة الدواسر .
## [ أخو رفعه ] هو الفارس صملول بن مسعود آل شريم آل عاطف من فرسان آل عاطف المشهورين .
## [ حضرمية ] الجنبيّه " الخنجر " .
## [ أخو حبنه ] الفارس حشر الشهري آل فهاد يام .
# [ آل فهاد ] هم قبيلة آل فهاد إحدى قبائل الوعلة يام .


تقبلوا فائق الاحترام

المشاركة الأصلية كتبت بواسطة مرعي بن دواس الحبابي ابا الذموم مواضيعك مميزه ونادره بيض الله وجهك ونعم بكل الي ذكرت والقصيده معركه لوحدها مجمل ومشكور اخوك / مرعي بن دواس الحبابي

المشاركة الأصلية كتبت بواسطة مشاري بن نملان الحبابي بيض الله وجهك يا نسل الشيوخ .. ومليون نعم بصبيان آل عاطف .. متألق ومبدع في مواضيعك .. لاهنت يا ذيبان .. وفي انتظار جديدك .. أخوك/ مشاري بن نملان الحبابي