قصايد مختاره للـــشاعر حسين بن شتوي الحبابي

[frame="4 80"]

اخواني الكرام في مجالس قحطان السلام عليكم ورحمه الله وبركاته وكل عام وانتم بخير

الشاعر حسين بن شتوي الحبابي احد شعراء شبكه قحطان واحد شعراء قحطان الشباب

الذي لهم حضورهم القوي في المحاوره والنظم وانا من اشد المعجبين فيه

وحبيت اختصر لكم هنا بعض من قصائده في موضوع واحد واتمني

من الله العلي القدير التوفيق للهذا الشاعر الرائع ومزيد من الابداع والتالق

وكم كنت اتمني ان يشارك في شاعر المليون

[poem=font="Simplified Arabic,6,darkblue,bold,normal" bkcolor="transparent" bkimage="" border="none,medium,gray" type=2 line=0 align=center use=ex num="0,black"]
النوم حاربني وحاربته ولاجاني رقــاد=جتني هواجيس تطيـــــر نومتي وتحوســها
لين انشغل بالي وتفكيري سرى والهم زاد=في ليله قشراء يطير النوم من هاجوسهـــا
يســــــري خيالي واتنقل من بـــلاد لي بـــلاد =واصبحت في غبه بحرولا استطعت اقوسها
قلته وعندي في بيوت الشعر رغبه واجتهــاد=اقطف ثمربعض البيوت اللي غرست اغروسها
هاذي قصيده شاعر عاش وتعلم واستفـــاد =عاش وتعلـــم والليالي علمته دروسهــــا
لازلت في طور الشباب وعشت في الدنيا جهاد=عشت وتعلمت ولقيت اسرار في قاموسها
واكبر طموحاتي رضا ربي وتحقيق المراد=والا الطمع في الجنه الخضراء وفي فردوسها
وعليك يالله اعتمادي ماعلى الناس اعتماد=ولاعلى اصحاب الفلوس اللي تعد افلوسها
ونفسي عزيزه دائم في حر والا في براد=ولابارك الله في رجاجيل تهين انفوسها
وراعي الجميل يعيش في الدنيا مثل راعي الشداد=واهل الفعول فعولها بانت وترفع روسها
والا الردي وابن الردي كنه مقيد بالقياد=تقصر يمينه من هل الطاله ومن ناموسها
جعل المره تلبس علي الناقص ملازيم الحداد =وبقعاء عساه يصير بين انيابها وضروسها
والربع في وقت اللزوم اكثر من أسراب الجراد=والحكم ماهو في مظاهرها ولاملبوسها
ورفيقي اللي في اللقاء يقدح مثل قدح الزناد=هاذك ذخري في الليالي اللي تزيد حسوسها
ياسعد منهو له رفيق وسعد منهو له سناد =وليازهمته يعتزي للكائده ويدوسها
ياكثر هرج الناس ياقل الحقيقه والوكاد=واهل الوفاء تعرف بوقفتها وبعد رموسها
اطرب لخوه كاسبين الطيب والشور السداد= وممشاي دائم نفس منهجها ونفس هجوسها
الصبر مفتاح الفرج واقول لله المعاد=ولعابه المنكوس تستانس علي منكوسها
وان كان وصلت حدها ماللعناد الا العناد =لحيه نكرمها ولحيه مالها الاموسها
العمر تاليه الفنا والزرع تاليه الحصاد = والامطار ماياتي بعلم الخير غير عسوسها[/poem]

[poem=font="Simplified Arabic,6,darkred,bold,normal" bkcolor="transparent" bkimage="" border="none,medium,gray" type=2 line=0 align=center use=ex num="0,black"]
رحمك الله ياقلب بقى له ساعه ويذوب=ورحمك الله ياعين تهل الدمع وتصبه

صواديف الزمان مكدره وتكدر المشروب= وحبيبي غايب عني وانا ابغي اجيه وانبه

وقف دونه عدوي وانقصر من دونه المندوب=لكن وان قال الله ماعلي من ضايع الشبه

حسبت الوقت لكن مانفعني وقتى المحسوب=ومن يحسب زمان الحب يشقابه ويتعبه

انا مما حصلي من حبيبي ماعلى اذنوب=جرحني جرح حب ما يلاقي الصيدلي طبه

احبه حب مخلص واشهد انه غايه المطلوب=من اسبابه قضى حالي واحب اخوه من حبه

كلامه يشرح الخاطر وعنده معرفه واسلوب=وله خد كما القرطاس يقرابه ويكتبه

لما جيته تجيني فرحتي من كل فج وصوب=ولما روحت احس بخاطري نيران مشتبه

اظن اللي تولع في المحبه مستحيل يتوب=يقولون الهواء مثل البحر والموج والغبه

ضحي الاثنين وايش اللي جرالي والقدر مكتوب=نظرته في خيالي وابتدا قلبي يرحبه

ولقيت الجاهل اللي قام ينصحني من المحبوب= وانا فيني طبيعه لا امدح الجاهل ولا اسبه

يذكرني حمام الورق يوم يغني المسحوب=لما غنى علي غصن هبوب النود تلعبه

يذكرني الزمان اللي مضى والصاحب الرعبوب=يوم انه يمد لي فنجال شاهي واتعجبه

وغيره مامعي في الناس لاصاحب ولامصحوب=مغير اطلب كريم مايخاب اللي تطلبه

حبيبي كدر ايامي وحولها عنا وكروب=لكن مهما عمل مسموح والله ربي وربه[/poem]

[poem=font="Simplified Arabic,6,indigo,bold,normal" bkcolor="transparent" bkimage="" border="none,medium,gray" type=2 line=0 align=center use=ex num="0,black"]
ليله خميس وجات حظ وقسمه = قابلت لي ريم جذبني جسمه

جسمه كما عود ليان ناعم= جنب الغدير وحركته النسمه

هذا الجمال المنفرد من نوعه=والله رسم هاذيك باحسن رسمه

سلمت بيمنى ولدت عيني=وقالت هلا والله وهي مبتسمه

وبعد ابتسامتها فقدت شعورى=وابطيت اطالع خدها والبسمه

قلت اسمعي يابنت وقتي ضيق=العلم نبغي ننجزه ونحسمه

اقرب تفضل واستلم ياشاعر=وسجلي ارقام الهواتف واسمه

وبادلتها نفس الشعور برقمي=واقفت وروحي لاجلها منقسمه

فرصه عمر يازينها من فرصه= والله يبارك في الليالي الدسمه

هاذيك ماشافت عيوني مثلها=ياسعد منهي ياعلي من قسمه[/poem]

[poem=font="Simplified Arabic,6,deeppink,bold,normal" bkcolor="transparent" bkimage="" border="none,medium,gray" type=2 line=0 align=center use=ex num="0,black"]
البارحه سهران والناس نيام=واصبحت متراكي علي راس كوعي

اذكر زمان العام واللي ورى العام=واذكر موادعنا عصّير الربوعي

ياطير ياللي من ورى النو حوّام=تنفر علي كيفك نزول وطلوعي

وانا تهددني الطوارى والاوهام=وقلبي سجين في حنايا ضلوعي

من بعدها خذت الدفاتر والاقلام=واكتب بيوت الشعر من كل نوعي

يابوسعيد انا على الدرب قدام=لاتحسب اني يالعبيدي قطوعي

حنا معرفتنا علي طول الايام =ماهي معرفه يوم والا اسبوعي

ومعرفه هل المرجله تاج ووسام =اما من الاقصين والا الربوعي

تبقا معرفتهم لنا ذخر وحزام=لجاء نهار يكثرون الفزوعي

ما ألهاني الا طرد تحقيق الاحلام=اطرد ورى خلي حسين الطبوعي

من صاحب جاني علي شانه اهيام=اللي ملكني ملك غصب وطوعي

حبه بقلبي باني ابيوت واخيام=وله مزرعه فيها جميع الزروعي

من حبه انسى الناس وتزل الاقدام=ويطرى علي حتي بوقت الركوعي

انا وهو نشبه امريكا وصدام=خذ من السلطه وفّرق جموعي

من قبل حبه كنت فارس ومقدام=واليوم ضاعت الاوسمه والدروعي

ابو عيوني لي نظرنى بسلهام=احس قلبي من محله يزوعي

وجسم غريب ماهو مثل الاجسام=يشبه لغصن مائل من فروعي

ومن بعدهم حالي كما حال الايتام=وفرقاء الحبائب يالنشاما تروعي

الحب ياعائض سبب غيبتي عام=ابديت عذري وانت رجل قنوعي[/poem]


[poem=font="Simplified Arabic,6,blue,bold,normal" bkcolor="transparent" bkimage="" border="none,medium,gray" type=2 line=0 align=center use=ex num="0,black"]
الله من عين تكدر منامها=تسهر لياليهاولاادري علامها

لي ناموا العالم تزايدسهرها =كلن ينام وداومت في دوامها

تسهر طوال الليل والله يعينها=وهاذي طبيعتها وهذا نظامها

وان بان نور الصبح فزيت سارح=اطرد حضوضي واتحري قيامها

اتعبنى التفكير والهم والقلق=وروحي علي خلي تزايد هيامها

رعبوبه كن القمر لون خدها=وبنت الشويخ اللي رفيع مقامها

حبيتها حب من اقصى ضمايري=وابيع روحي ياسعد في غرامها

مصيونه دائم علي العز والنقاء=ولاتطريها الرجال بكلامها

ماهي بمثل اللي تخاوي صديقها=وترسل ولد عمه يوصل سلامها

والعين عين اللي تعلا بمرقبه=لي قرب الصيده وكسر عظامها

وثلاثه وعشرين عام عمرها=ومغيب حتي شهرها وعامها

مثل المهاه اللي من الصوت شارده=لي شافت البدوان تبني خيامها

يلعن ابومن لا مني في حبها=ياجعله اللي حشوها من حزامها

احبها حتي ولوما تهيت=واطرد وراها في يمنها وشامها

خطبتها لاكن مازوجوني=عيواقرايبها وعيواعمامها[/poem]

[poem=font="Simplified Arabic,6,red,bold,normal" bkcolor="transparent" bkimage="" border="none,medium,gray" type=2 line=0 align=center use=ex num="0,black"]

ياصـــاحبي يامنــــي روحــي وياشفّي = يافارس احلام قلبــي ياهـــوى بالي

لاتحسب اني بدون اسباب مـــتخــــفّي = ياوجد وجدى علـــيك ويـا بـرى حــــالي

ياونتــــي ونــّة اللي ابــوه متـــوفـّـي = ولاّ كما ونـّة اللـــي مـــاله عيـــالي

أبطيـــت منــّك ودمــع العــين ماجـفّي = من زود همّي ومن صبـرى وغربالي

ســوا .. ســـوا.. ماتأثـّر جاى ومقـفّي = غالي وتبقي علي طول الزمن غـالي

يابو عيــــون هدبـــها عكــّـفٍ صــفّي = ونظراتـــها تقـــتل العشــاق طوالـي

وخـــدٍّ ينــــّور بنــوره ماهـــو يطــفّي = اسري بنوره وانا في دربي لحالــي

مخلص ومكمل شروط الـــحب وموفّي = يفداك من ضيّـع عهــــودي ومعدالــي

وشوفك وعرفك شرف ويزود ويكفّي = وغــيرك يـــدور بدالي مــــاله ومالــي

من وطية الارض باشـــيلك علي كفّي = ومن شدّة الشــــمس باظـلّـلك بظـلالي[/poem]


[poem=font="Simplified Arabic,6,green,bold,normal" bkcolor="transparent" bkimage="" border="none,medium,gray" type=2 line=0 align=center use=ex num="0,black"]

يارفيقي والله اني منوي بالفراق=الفراق اللي يبعد صديق من صديق

قد تحملت المشاكل وصبرا مايطاق=واخر المده تعذبت والخاطر يضيق

ذقت مر الوقت لجلك لوانه مايذاق=واحتملت السب والشتم وازعلت الرفيق

كم وكم جاملت وانته تعديت النطاق=تكسب المنقود وتشب في القلب الحريق

وان حصل منك خطيه تزودها شقاق=قلت انا المخطي وكثرت هرجا مايليق

والصداقه بعتها بالمخادع والنفاق=بعد ماكانت معزه علي عهد وثيق

اختلفنا والتخالف يضيّع الاتفاق=وهرجك اللي تنطقه زود الجرح الغميق

ياخساره يوم اعزك معزه واشتياق=واعتبرتك درع جنبي مثل الاخو الشقيق

خوتك تحرم على بالحرام وبالطلاق=ما اتعزوابك لو اشر علي جال الطريق

مستحيله لويعود العراقي للعراق=ولويصير الحر مملوك والجندي فريق[/poem][/frame]

بيض الله وجهك يا ماجد الخنفري


على اختياراتك الطيبه


للشاعر الغالي على الجميع

حسين بن شتوي الحبابي


نسأل الله له التوفيق دائما

الله يبيض وجهك

ولا يهينك

احسنت الاختيار

ابن شتوي من الشعار اللي نعتز بهم


الله يوفقه ويسدد خطاه


تحياتي

__________________
سبحان الله وبحمد سبحان الله العظيم

بسم الله الرحمن الرحيم
السلام عليكم ورحمة الله وبركاته

صح السااااااااااااااااااااااااااااااااااااااااااااااا ااااااااااااااان الشاعر


والله يحفظ الجميع

__________________

اررررحب ياماجد وبيض الله وجهك


وصح الله لسان الشاعر الشاب والنجم الصاعد

حسين ابن شتوي الحبابي

شاعر رائع وشاعر بماتعنيه الكلمه

ولاهنت ياماجد وياليت تكون صوتيه وفي الديوان الصوتي

في انتظارك وانتظار النجم حسين لاهنت ولاهان

اررررحب ياماجد وبيض الله وجهك


وصح الله لسان الشاعر الشاب والنجم الصاعد

حسين ابن شتوي الحبابي

شاعر رائع وشاعر بماتعنيه الكلمه

ولاهنت ياماجد وياليت تكون صوتيه وفي الديوان الصوتي

في انتظارك وانتظار النجم حسين لاهنت ولاهان

مشكور ياماجد الخنفري على هذه الاختيار الموفق

الشاعر حسين بن شتوي الحبابي شاعر متميز ورائع
والحقيقه هذه القصائد دليل تفوقه فهو من الشعراء الشباب الذي نتمنى لهم مستقبل زاهر
وسبق أن طرق ميادين المحاوره مع شعراء عمالقه مثل رشيد الزلامي وعبدالله بن شايق وغيرهم
أجد المحاوره وعاد لنظم فجارا شعراء الساحه وشعراء معاصرين (شهد له شعراء بقوة المعنى )

نتمنى له التوفيق ونراه مع عمالقة الشعر عن قريب ونشكرك أخي ماجد ..........

ماجد الخنفري بيض الله وجهك عاجز عن شكرك يالغالي

__________________

السلام عليكم ورحمة الله وبركاته



ارحب يا ماجد الخنفري


صح الله لسااااان الشااااعر حسين بن شتوي الحبابي

شاعر مبدع وجزل ونجم ماشاء الله عليه



والله لايهينك والله يعطيك العافيه على الطرح


تقبل تحياتي وتقديري

بيض الله وجهك على الاختيار الجميل ياماجد

وصح الله لسان الشــاعر حسين بن شتوي الحبابي

جزل ومتمكن ومافيه حيله

تسلم يمناك ونترقب أكثــر

الله يوفقك