قصة وقصيدة (صبي وزلت عجاريفه ) شايع الامس من الرمال من شمر

احد ابطال ومشاهر قبيلة الرمال من شمر

وهو / شايع بن مرداس الرمالي الشمري

القصـــــــــــــــــــــــة :-

شايع بن مرداس بن رمال المعروف بالأمسح من الرمالات من شمر, عقيد ربعه وكثير الغزو على العربان اللي متحالفين مع ابن عريعر حلف ابن عريعر أنه أن مسكه غير يسجنه ويخليه بالسجن ياما يموت به, وهو يسجنه أمير الإحساء : سعدون ابن عريعر بله غرفة من غرف القصر هي الطرفانية وعليها حارس يحرس السجين شايع الأمسح, وشايع قبل سجنه له وليد توه صغير أبو ثلاث أو أربع سنين, وهذا هو كل ليلة يهيجن ويقصد ويتمثل به كل ليلة والحارس يتسمع له ما ينتصف الليل وأخذ على هالسواة قطعة سنين حول الثلاث وعقبها وهو يبطل القصيد وهو ينشده له مرة حارسه الخالدي وليه يبطل القصيد بولده عقب كل هالسنين, قاله شايع الأمسح :-

أيه لي صبي وزلت عجاريفه .

ويمضي شايع بسجن ابن عريعر بالأحساء حول تسع سنين, وولده اللي يقاله عميره بحدى هالأيام وهو يتهاوش مع له ولد بسنه من ربعهم اللي قال له : لو بك خير ما أبوك مسجون عند ابن عريعر, ويروح يم أمه اللي قبل قالت له أن أبوه مات ويومنه حلفها وهددها بذبح روحه كان ما علمته بالصحيح قالت له لا بالله أبوك حي وبسجن ابن عريعر بالأحساء, وهو يعزم الولد على رايه ويجهز حاله ويأخذ معه هاك الدليلة وينحر ديرة الإحساء, ويومنه وصلها وهو يخلي الدليلة عند الركايب ويغير هدومه ويهدرس حاله ويدخل الأحساء ويتهجس العلوم يما وصل للقصر ودخله وأودع حاله درويش من الدراويش, وهو يعرف مكان سجن أبوه وبله ليلة تتقى من الحارس وخلاه ياما ينام وهو يجي يم الدريشة وياخذ ويقرط بها من الحصى ياما أنتبه له أبوه ويعلمه أنه هو ولده عميره وأنه جا منشان يطلعه من سجنه ويهربون وأن معه دليلة وركايب بالمكان الفلاني برا الديرة, ويظهر أبوه أيديه مع حديد باب السجن ويتلمس ولده اللي صار رجال وجاه من أقصى الديار عقب كل هالسنين, قال شايع الأمسح لولده عميره : ما هذا الرأي وأنا أبوك الرأي عندي أنك تقريب للأمير وتصير حوله وتخدم بالقصر دواش وده وجبه ياما يأخذون عليك ويبخنونك زين, والأمير سمعت أن عنده له وليد هو أصغر ضناه وله حول سنتين وهذا هو عمرك يومنه يأخذني منك وأبيك تخطفه وتحطه تحت عباتك بلك ليلة ظلماء وما يردك غير الشمال وما عليك مني أنا أجيك أنت خذ العيل والباقي عندي, أبيك مثل ما سوى بي تسوي به وتخليه يحس لوعة فقدان الضنا وهو صغير .

وينفذ الخطة عميره ولد شايع الأمسح وبحدى الليالي يتعلل الأمير ابن عريعر هو واللي عنده وهو لك ينام العيل بحضنه وطولوا بالتعللة وهو يصوت للدرويش مبارك وهذا اسم ( عميره ) تعال خذ العيل وده لأمه, وياخذه مبارك ( عميره ) والنية أنه وداه لأمه وهو يحطه تحت عباته ورجله ما تخاطي باب القصر ويظهر به بهالليل ولأخويه اللي وصاه ما يغير مكان الركايب لو ياخذ عنه مدة حول من البطى, والأمير النية أن العيل نام عند أمه والأم النية أن ولدها عند أبوه الأمير مثل عوايده كل ليلة .

يوم سروا الرجال وأنصف الليل وجاك ابن عريعر يبي ينام عند مرته وهي تنشده عن الولد وين هو وليه ما جا معه قا ل لها وليه هو ما هو ينام عندك قالت أمه لا بالله الليلة ما شفته, وهو يقوم ابن عريعر مثل المقروص تالي هالليل وهو صياح وتصاويت وين مبارك وين مبارك, والمرة وراه لها بكى وليه مبارك وولدي وش جاه, ويجتمعون اللي بالقصر من عبيد وحرس وأهله ويدورون مبارك وما لقوا له أثر أبد, ويطلع عليهم الصبح والولد ما بين, يوم اصبح شايع الأمسح يوم ما هي بالعادة باب سجنه ما عنده أحد والناس رايحة جاية بالقصر دري أنه صار اللي يبي, وهو يصوت لأحدى العبيد وينشده وش اللي صاير بالقصر قال العبد : البارح خطف مبارك الدرويش ولد أميرنا وما حد يدري وين هو, قال شايع الأمسح رح لعمك وقله السجين يقول كانه يبي علم ولده يجي يمي, ومن راح العبد وقال لأبن عريعر ياهذا هو جايك يجر زبونه والناس وراه وياقف عند باب السجن ويصوت لشايع اللي قاعد بالغرفة وما رد عليه وهم يفتحون الباب ويدخل ابن عريعر على شايع ويمسكه ويهزه قل عندك علم عن الولد, قال شايع أنا السجين تصير عندي العلوم وأنت الأمير ما هي عندك, قال الأمير اليوم ما بها أمير أكيد عندك علم عن ولدي, قال شايع أيه هاللحين صرت أبو وعرفت لوعة الضنا يابن عريعر, قاله الأمير أجل صحيح عندك علمه, قاله شايع ولدك بخير وما يجيه شين وهو عند ولدي, قاله ابن عريعر وش تقول قال اللي سمعت, قال ابن عريعر مبارك الدرويش ولدك أنت يا شايع, قال نعم هذا ولدي عميره اللي أنت ما خليتني أتهنابه ولي ثلاث سنين وأنا أتلاعب وياه بالحكي بهالدار, وخلك تمضي كثر ما مضيت وتشوف اللي أنا شفته, وأنا هاللحين رجل شايب مابي خير وأن ذبحتني ما تشوف ولدك طول عمرك والحل والربط ما هو بيدك بيد ولدي ما أرسل له شف وشن طلايبه, وهو يرسل ابن عريعر لعميره مرسال ويوم جاه المرسول قاله : قل لأبن عريعر هاذي طلبتي منشان يجي وياخذ ولده :-

الأوله أبي فرسين من مرابط الخيل الأصايل وحدة فوقها أبوي وهو يلبس الجوخ الحمر والثانية تمشي وراه ويتبعهن مية ناقة وضحى والخيل تمشي على الزل من مكانه بالأحساء ياما ياصلني بديرته بالشمال, وإلا ما له عندي ولد وأبوي عنده بكيفه به, يومنه وصل المرسال لسعدون ابن عريعر تعجب من شروط ابن رمال وما قدر يحصل على فرسين أصايل من مربط خيل, وجهز عوض عنهن عشرين فرس زود على المية وضحى, وجوا لطلبه أن الخيل تمشي على زل من الأحساء ياما تصل الشمال وما قدروا عليها ودريوا أنها من التعجيز لهم, وصلت الأخبار لشايع الأمسح وهو بسجنه وهو يطلب شوفة الأمير سعدون ابن عريعر وقال من شان طلب ولدي الزل هاتوا الحداد حذاي الخيل وخلوه يلبس حذوة كل فرس قطعة زل كبر الحذوة وعقب يسمر فوقها المسامير وهلون تمشي الخيل على الزل ياما تصل, وهو يسوي ابن عريعر بشور شايع الأمسح, ويركب هو الخيل والبل والوضح وياصل شايع ديرته معزز مكرم وياخذ ابن عريعر ولده وينكس لديرة الأحساء ....................... )

وهذه أبيات تم نقلها من مكان اّخر


مضالي ثمان سنين في حبس خير = وبالتاسعه جاني صدوق الفعايل


جاني غلام مابعد خط شاربه = ولاجال في قلبه من الخوف جايل

ودنق علي مضنون عيني وحبني = ودموع عينه فوق وجهي شلايل


وانا الحديد بساق رجلي مغلق = ربيط كما حر شبك بالحبايل


تعيش ياشبل سطى في حالك الدجى = على ولد شيخ عمل بي هوايل


سطى وجاب الورع من ربعة امه = ومن حضن زين اللون شقرا جدايل


سطى وزم الورع ومر وحبني = واطفى بصدري حاميات الملايل


هديته على درب صعيب وما هبى = ونهب ورع من هدا جميع القبايل


ومن عقب ماني حافي الرجل عندهم = جوني بعد ذلك يبون الجمايل

جتني حليلة ليث هجر وشيخها = تشلق هدوم الغي والقلب جايل


قلت ابشري بابنك مع ابني وديعه = ويذريه عن لفح الشتا والقوايل


وفكوا حديد وسم ساقي بحجله = تحملت شيله من سنين طوايل


ودنوا لها حمرا من الهجن عيره = وشالوا وركبت فوق زين الظلايل


وانا فوق قبا يوم أحلي وصوفها = ريمية وان ذيرت من خمايل


فرس من حمى بيض النعام عن الملا = شيخ تخضع له شيوخ القبايل


من عقب مثباري ضهيد بينهم = اليوم يصلى كبودهم بالغلايل


يعيش بن شايع تقاضى بمطلبه = من الجيش وايضا من خيار السلايل


واخذ بثار ابوه وعمه وعزوته = وطال وطمن راس من كان طايل


عسى غلام مافعل فعل والده = تبكي عليه منقضات الجدايل


،،،،،،،،،،،،،،،،،،،،،،،،،،،،،،،،،،،،،،،
اختلفت الروايه عن المدة هل كانت ثمان او تسع او ثلاث او ست..

الحقيقة هذه القصة والروايه نقلتها عن الراوي الشمري رحمه الله / فهدبن قنون الشمري رحمه الله

علما انني نقلت واقع القصه من منتدى لان القصة مشابهه تماما
وتم انزالها هنا وفي منتديات صديقه تربطنا بهم علاقات اخويه


اخوكم ابو راكان الحرقي

(صبي وزلت عجاريفه )

لاهنت اخي الكريم

على ايرااد مثل هاذي القصه

__________________

أرحب يابو راكان

وش حالكم يااهل حائل عساكم طيبين

وبيض الله وجهك على ايراد القصه لفارس من فرسان

شمر وحنا وياهم الحال واحد

قصه وأبيات معبره وفيها من الفوائد الشئ الكثير

لاتحرمنا جديدك

تحياتي وتقديري

__________________

بارك الله فيك اخوي رائدالحبابي..