صروف الوقت

السلام عليكم ورحمة الله وبركاته

الله يمسيكم بالخير جميعا وأحب اشاركم بهذه القصيدة المتواضعه ولعلها تحوز على استحسانكم



صروف الوقـت

على المضيـوم هبي ياهبايـب .. مدام الوقت شــح بمـا يليقــــه

يدور الوقت وتشـوف الغرايـــب .. خيـال وعاشها الغافـل حقيقــه

وفيت ولا كسبت الا نشايـــب .. جلب صدقي لصدري كل ضيقـه

نكور الجاحد اقسى من الحرايب .. وعمــاة القلـب مافيها طريقــه

مصيبه كان جات من القرايــب .. يهـون الجرح من باقي الخليقـه

مالـوم العين دام القلـب ذايـب .. عيـون الحـب ماتنقـل حقيقــــه

مشاريه الغـلا افـراد وكتايــب .. حقايقهـــا لها اوجيه(ن) طليقــه

وراء المـقفيـن بركنـا الركايـب .. ومــن يلحـق عسى ربي يعيقـــه

وحب(ن) بالوصل يجلب مصايب .. مالي نفس(ن) على وصله شفيقه

ليا حدك زمانك على الكرايب .. وزبـد موجـه تــزايـــد من صفيقــه

تجيك علوم عنها الفكر غايب .. تعيــد حسابهـا من اول دقيـقــه

وصعيبه ذا الزمن تلقى حبايب .. محاني صـدورها لسرك غليقــه

صروف الوقت روتنـا عجايــب .. وحـدتنـا علـى مــا لا نطيقـــه

ياصبر الجوف من حر اللهايب .. وسحاة العين من دمع(ن) تريقــه

على المضيوم هبي ياهبايب .. وعلى الوالي الفرج من كل ضيقه

وسلامتكم .. أخوكم / حامد بن مزهر