ويـن ماروح عوايـل عوايــل .... قســـم بالله ملينــا !!!

شفوووووووووووووووووووولنا حـــــــل اجل خلو البنات بعد مايروحون الا معهم رجال زهقنا

قدر الله علي وبدت إجازتي الصيفيه

هذا لسان حال كل شاب اذا بدت العطله الصيفيه او اي اجازه

صارت العطله الصيفيه هم وكابوس لكل شاب

وين يروح ووين يجي ووش يزين

والمسأله المهمه هي :

كيف يتخطى العوائق اللي يحطها المجتمع
واللي يحطها بعض المسؤولين

طلعت من البيت الساعه اربع ونص العصر ومريت عزوز ببيتهم الكائن في حي منفوحه القديمه

دخلت منفوحه وأشوفلك اول مادخلت أربع بياجر يمشون على رجولهم فتحت عيوني وقفلتهم وانا ماني

مصدق أول مره اشوف بيجر يمشي على رجوله وفي الأخير لقيت انهم أربع خوال تشاديين منحاشين من الجوازات بعد

ماباعو كل الكميه اللي معهم من المويا والله العالم وش كان معهم بعد يبيعونه عند هالإشارات والمشكله إن الجوازات

ماعندك أحد خصوصا اذا كان المنحاش منهم أسود اللون (( وهذا مو تعصب بقدر مااصبحت ظاهره لدينا اننا

نشوف الخوال وخاصة اللي من أفريقيا يسرحون ويمرحون في بلدنا ولا حسيب ولا رقيب ))اذا كان هالمنحاش منهم يخش

لمنفوحه خلاص كنه في مأمن من الجوازات والدوريات وكل من له صله بأمن الوطن والمواطن

مشيت وكملت طريقي وانا اتنافض من الخوف وأدعي الله ان سيارتي اللي توني مطلعها وكاله ماتجيها حصاة او علبة

ببسي او يوقفني أحد ويقولي تبي (( حبوب أو شراب او بنات لأن هالشي صار عادي جدا في بعض الأحياء في

العاصمه ومن ضمنها العود والفيصليه ومنفوحه بطبيعة الحال ))

الحمدالله ربك سلم ولا صار شي من اللي ببالي لكن سيارتي انعدمت للأسف والسبب هو الشوارع في هالحي أنواع

الحفر وأنواع المطبات شوارع لها سنين طويله يمكن من عهد الملك سعود مااحد قرب يمها وفكر انه يزينها (( شلون

يزينونها وهم مازينو طرق دوليه يموت فيها العشرات يوميا واذا احد انتقدهم قالو من انت حتى تنتقدنا وهالشي قريناه

من وزير النقل بعد ماانتقده علي الموسى في صحيفة الوطن ))

قلت ماعليه الحمدالله ان الشي هذا صار في السياره ولا صار فيني انا شخصيا

وصلت عند بيت عزوز ودقيت عليه بوري وطلعلي ولد جيرانهم يأشر بيديه بطريقه بايخه ووصخه وماودي اوصفها
بصراحه حركه مالها داعي زينها قمت انا نزلت من سيارتي وقلت آسف ياعمي والله ماعاد أعيدها دخل ولد الجيران

لبيتهم وطلعلي عزوز وهو يبتسم وكأنه يبي ينتقم مني في شي سويته له من زمان قلتله وش فيك تبتسم قال عارف كل

اللي صارلك قلت ماعليه اركب وبعدين نتفاهم

ركب معي عزوز ومشينا وانا نافخ صدري وكن مااحد قدي لأن عزوز راكب معي وإبن أمه ينفس علي وقتها

طلعنا من منفوحه وقلتله هاه وين تبينا نروح قال رح العليا او السليمانيه او اي حي من أحياء الشمال قلت

وليه قال ياخي ابي احس اني طالع من السعوديه قلت ومنفوحه وينها فيه ؟ قال منفوحه عاصمة تشاد ضحكت

ومشينا ولمن وصلنا لنص طريق الملك فهد كانت هناك أنواع الزحمه قعدنا نسولف شوي الا ونجيب طاري السفر قلتله

ورا مانسافر حالنا حال الشباب قال وين تسافر له قلت نبي نروح هالسنه لتركيا قال قدام بس أنا طفران قلت

معذور في منفوحه ولا تبي تكون طفران قلت طيب شلون نسافر وحنا مامعنا ملابس نلبسها حتى قال وش رايك أجل ندز

للبطحا ألحين ونشتري من هناك أغراضنا ونروح لأقرب مكتب سفريات ونحجز قلت وش البطحا انت روقنا بس قال وين

تبي قلت ياخي العالم تطورت وصار الناس مايشترون الا ماركات عالميه تبينا نرجع لزمن أول ونشتري من البطحا ؟ على

كذا اذا اشترينا من البطحا مانبي نروح لتركيا نبي نروح لأبها ولا جده ولا الطايف قال ياخي رح البطحا أنا انصحك وانت

بكيفك قلت قم بس قم ومشيت بالسياره الين وصلت عند الفيصليه وجيت عند المدخل حق السيارات وقفني السكرتي قال

وين ياشباب قلت ابد نبي نسافر برا البلد ونبي نتسوق قال تبطي عظم والله تطلع من السعوديه وأنا منلطع هنا قلت

وشو قال لا أبد بس ممنوع قلت وشو اللي ممنوع قال ممنوع دخول العزاب قلت وليه قال كل شي هنا

للعوايل قلت وليه حنا ماناب عوايل ماتشوف معي عائلتي الكريمه هاللوح اللي جالس جمبي هو كل عائلتي قال

السكرتي روق المنقا يابو الشباب ودز يم أهلك لاتخلينا ننادي مكافحة الإرهاب الحين وبعدين نقول ان معك قنبله

ونخليك من جد تنسى شي اسمه سفر قلت اصلا من قال اني ابسافر ورجعت على طول ريويس وانحشت وكني منحاش

من ابليس قال عزوز ياخي خلنا نروح البطحا قلت اقول انثبر عندي مكان ازين من الفيصليه قال وين قلت بتشوف الحين

وصلنا للمملكه وقلت شف العالم اللي تقدر مهوب حقين الفيصليه قال والله ان البطحا يقدرون ازين من ذولي قلت اقول

على شحم مشيت وانا نافخ صدري وكني مخسر حقين الفيصليه مليون دولار لمن مادخلوني وأول ماوقفت عند المدخل

حق المواقف طلعلي سكرتي ثاني وقال وين يابو الشباب قلت أبد ابي اسافر برا السعوديه وابي أتسوق قال أقول

طس بس انت وجهك وجه برا السعوديه يمدحون أبها والشرقيه قلت وشو قال ممنوع قلت وشو اللي ممنوع قال ممنوع

دخول العزاب كل شي هنا عوايل قلت وليه كل شي عوايل ياخي مناب حقين غزل ولا راعين خربطه قال

أقول أها بس ناظر جوالك وشف من اللي مرسلك بلوتوث ناظرت بجوالي الا وجايني طلب استقبال بلوتوث من وحده

اسمها (( تكره العزاب )) استقبلت البلوتوث وطلع تصوير لسيارتنا وحنا قاعدين نقردن السكرتي حق الفيصليه

وعليها موسيقى حزينه رجعت ريويس ومشيت قدام قالي عزوز ياخي يمدحون البطحا قلت اقول انثبر بس عندي مكان

أطلق قال وين قلت يمدحون أسواق (( جيان )) بطريق خريص قال أول مره أسمع فيهم قلت انت حدك أصلا الحراج وش

يدريك قال والله الحراج انهم أطلق على الأقل كل الناس تدخل مهوب فيه تفرقه عنصريه بين العزاب والعوايل

قلت انثبر لااحد يسمعك وبعدين يجونك المباحث ترى نص البلد مباحث سكت عزوز وهو ينتفض قلت ماعليه لاتصيح بس

ترى امزح معك

وصلنا لجيان ووقفنا بالمواقف ومشينا الين وصلنا للبوابه حقت الدخول الا وواقف عندها سكرتي قلت دامه ماوقفنا عند

المدخل حق المواقف مهوب موقفنا هنا شوي الا ويقول وين ياشباب من قالها رجعت ريويس برجولي ومشيت يم

السياره قال عزوز وش فيك وهو يضحك قلت ممنوع العزاب قال طيب يمكن يبي شي ثاني منك قلت ناظر وجهه بس

واغسل يدك شغلت الموتر ودزيت على طول وبدون مايقولي عزوز تراهم يمدحون البطحا دزيت يم هالبطحا واشتريلك

ملابس بألفين وخمسية ريال ورحنا نجربها أنا وعزوز في البيت وأول بنطلون لبسته انشق والثاني طلع

مستعمل وفي الأخير قررت إني اشتريلي بلايستيشن وأستأجر شقه في شعيب بنبان لأني سمعت ان العزاب

ممنوع سكنهم داخل الأحياء المأهوله بالسكان

ليه كل هالشي يصير؟

ليه كل شي للعوايل ؟

ليه مافيه عندنا سينما مخصصه للشباب ؟

ليه مافيه عندنا اي شي يخلي الشباب يقضون فيه أوقاتهم ؟

والله العظيم لاتلومون الشباب السعودي لمن تشوف بعض التصرفات اللي مالها داعي منهم في الأسواق وفي الأماكن اللي فيها عوايل

شباب مهضوم حقه في كل شي

وكل شي مخصص للعوايل وبس

لاتلومون شبابنا اذا راحو للبحرين وخربو أم الدعوه هناك

لاتلومونهم لمن تشوفونهم يتابعون هاللبنانيات وهم مفهين وانواع السعابيل

انا ماابي اختلاط ولا ابي شي من هالأمور ولا ابي شي يغضب رب العالمين

لكن هل اللي يصير في حق الشباب من المسؤولين وولاة الأمروغيرهم يرضي رب العالمين ؟؟؟؟؟؟

قسم بالله اني مقهور من جد ومولع

والصيحه تقرقع بصدري وودها تطلع الى الحين وانا كل مااروح مكان قالولي انقلع كل شي هنا للعوايل

في الأخير

لاتلوموني على طول الموضوع وعلى هالسالفه البايخه اللي حطيتها

يمكن الموضوع يناسب الجاده

بس طرحته هنا لأني أحس ان حقين الجاده اذا سولفت معهم بيفتر مخك وانا مانيب ناقص عقب اللي صارلي اليوم

تحياتي


منقووووووووووووووووووووووووووووووووووووولللل

حياك الله اخوي كحيلان

وكيف حالك وهذا اللي تقوله كلامك انت ولا احد حاكي لك معاناته ،

وقبل كل شئ ليه ما شفت التوقيع اللي مسويه لك ولا اعطيتني رائك فيه ولا ما اعجبك ،

نبدأ في موضوعك اللي الحقيقة يستاهل المناقشة والنظر فيه ،

فما قلته حول منفوحة كله صحيح وصادق من حيث المباني والشوارع والاحياء والسكان وكل شئ فيها يدعو
الى التعجب والاستغراب والسوال الى متى هذا الوضع ؟!!!!!!!!!!

اما بالنسبة للشباب فليس هذا عذرا لهم للانحراف والسفر وارتكاب المعاصي !!!!!!!!!!
فهناك اماكن كثيرة لهم لقضاء وقت الفراغ عندهم مثل الاندية الرياضية والمراكز الصيفية والرحلات الشبابية وغيرها الكثير من الاماكن المخصصة للشباب .
ولا لازم يروحون عند اماكن العوائل ، واللي يبي العوايل ياخذ اهله معه ويرتاح ولا يقوم يتعذر ،
لكن شباب اليوم يبي يأخذ رفيقه ويا لله مشاوير بين ذا العوايل رايح جاي لا ارتاح ولا خلا الناس ترتاح واشغل العالم واقلقهم وطفشهم ،

يعني بالمختصر المفيد انت تبي تقول فكونا مع ذا العوايل وخلونا نرتاح ونروق ولا بروح البحرين واخرب ابو ام الدعوة !!!!!!!وهذا الكلام لايقبله لا عقل ولامنطق ولايقبله اي مسلم غيووووووووور !!!!!!!!

والحمدلله انه متوفر في اي مدينة من مدن المملكة اماكن مخصصة للشباب يروحون فيها عن انفسهم في وقت الاجازة وليس لهم عذر فيما تقول بأنه مهضوم حقهم ،
فكل من فعل المعاصي قال ايش اسوي حدوني عليه !!!!! اين الوازع الديني واين الايمان ؟ هل اماكن العوايل اجبرتك على نزعه !!!!!!!!

وفي الختام اسأل الله العلي العظيم ان يهدي شباب المسلمين لما فيه خير للاسلام والمسلمين ،

وجزاك الله كل خير اخوي كحيلان .

واسف للاطالة ،،،،،،،،،،،،،،،،،ن

__________________

ههههههههههههههههههههههههههههههههه
معك حق ماعليك الا ان تردد دائما سم طال عمرك ولا تكثر اسئله هذا وهذا ماعندي لاني فكرت في اكثر من حل لكي افيدك فلم اجد الا هذا (انا متزوج يعني من العولئل لذلك ادخل اي مكان في السعوديه لان عندي حق الفيتو)

موضوع فيه اشايء تستحق النقاش
وفيه جمل مبالغ فيها ولو اني عايش خارج الرياض شكيت في الوضع
ولكن انا في الرياض عمري كله وهذا الشي ليس صحيحاُ مثل قولك:

وين يابو الشباب شايف نفسك في لندن والا شوارع نيو يورك


صل على النبي واعد صياغة الموضوع

شكراً لك اخي الكريم على هذا المشاركة

نبدأ بالترتيب يا شباب

اخوي ابو ملاك

اي انديه اي رياضه

الربع الشباب يبون ترفيه يبون يدخلون الاسواق يتقضون حق الصيف يبون مطاعم
وش هاذي الانديه الناس يبون يسافرون وانت تقول انديه وسباحه وش ابيبها ثلاث ساعات يوميا ولا خلصت ثلاث

ساعات وين اروح
الواحد يبي يسافر اقول كل ماقول سوووووووق ابها وبس ولا الاماراااااااااات يالسنايدي

__________________________________________________ ________________

ابو وهف لا تعليق

هههههههههههههههههههههه كل ماقوله يا حضيضك

اقول والله شكلي داز البحرين ههههههههههه

____________________________________________

اخوي هنا الرين

تو الناس يبوي وين انت فيه يبوي ليه البقالات قامت اتبيع حبوب في علمك

قسم بالله ان فيه بقاله اتبيع حبوب من نوع المخدرات والمسركرات

اخوي هنا الرين

مارحت الشرقيه

الهفوف الاحســاء هناك حاره اسمهــــا

الصــــــالحيه واضن بعدكم قد سمع عنها

والله العضيم تمر اتشوف البنات تتراوح اعمارهم 15 الى 29 كلها سكر في سكـرانات

قسم بالله اتمر اتناديك وانت تقطر سعابيللك وانت تطمر عليها

لانهم مايبون شي الا خمر التجيب خمر تجيه تنام عندها اسبوعين والعياااااااذ بالله اللهم اصحلهم كل اللي اقوله

الله ان تصلحهم ولا الله ياخذهم

يبوي فيه حوراي في المناطق اتشوف المحرمات

والفضل لله ثم رجال الهيئه الله يجزااااااااااااااهم الف خيرررر رجال الامر بالمعروف والنهي عن المنكر

الله يجزاهم الف خير ويدوم لهم البلد

هم صح والله الرجال .......

على العموم اطلنا عليكم

ومشكورين على الردود والله يجزاكم الف خير على الردود

تقبل تحياتيـ

اخوووكم / كحيلان

كحيلان
اريد ان افيدك بمعلومه جيدة ممكن تخليك ترتاح
بلامس وانا خارج للتسوق (طبعا ليس بالسعودية بحكم تواجدي خارجها للدراسة ) مررت فوجدت محل ماتدخله النساء الا اذا كان معها رجل ؟؟؟؟؟ انقلب الوضع

اشهد بالله انك صدقت

بس يرجال احكرونا قسم بالله احركونا

طيب ليش مايسون

ممنوع للفتيات والله العضيم

ممنوع ممنوع تعالي معا اخوك ولا ابووك وادخلي

اذا قالت ابوي داخل عطها الجوال وقلها ياللله خليه يجي

والله ياشيخ يصير فيه انضباط

طيب فيه رجال ماعنده لا ام ولا ابوه يروح يجيب مره عمه على شان يدخل مايصير

البنت تقدر تجيب اختها عمها سواقها على الاقــل

كل اللي اقـــوله اللـــه يعين بــــس

كحيلان --- لم اتوقع ابدا ان تكتب انت بالذات مثل هذا الموضوع لأن جميع مواضيعك تتسم بالإلتزام والغيرة وفعلا تفاجأت من عنوان موضوعك حتى انني قرأته حرف حرف لأتأكد منه

اخي الكريم // الأسواق التي تتكلم عنها اسواق عائلية بحته ولا داعي لوجود الشباب العزاب ... اصحاب تلك الأسواق لو علموا ان العزاب فعلا سيشترون لما عمدوا بعدم السماح لهم بالدخول بل لديهم يقين بأن العزاب بطفشون الزباين

لو كان اهلك معك هل ترضي انك تشوف اغلب من في السوق من العزاب المتسكعين بدون حاجة ؟؟

المعذرة اخي كحيلان