[poem=font="arial,6,darkred,bold,italic" bkcolor="transparent" bkimage="" border="none,4,gray" type=1 line=1 align=center use=ex num=",black""]
أنا أشهد اني شفت لي يا سعد طير=ما شفت وصفه من عرفت الصقاره
مهجنٍ في دمه الحر و الجير=فرخ السنه توه على اول اطياره
أشقر عديمٍ نادرٍ ريشته غير=للنور فيها لا ضربه انكساره
في وجهه تشوف السعد و التباشير=وان شخّص بعينه تشوف الجساره
له عاتقٍ يعجب جميع الصقاقير=و الراس كنه رغوةٍ في غضاره
كن أظهره بشتٍ على عاتق أمير=مَرَزّه لصدره يزود وقاره
في دَقته من نقش بيض الغنادير=بنات بدوٍ ما ربوا فالحضاره
والخشم دون شوي من فتحة الكير=و اقحوفه أتوقف عليها الزقازه
أقطم و لا هو من طوال المناسير=كن منكبيه اعلام برج التجاره
صوايده كنها السيوف الشواطير=اللي تقص العظم قص الخياره
هَجْرٍ فخوذه بُرم و اكراعه اقصير=امسرولٍ يمناه تضفي يساره
شليله امزخرف بورد النواوير=زخارفه تدرس بفن العماره
مهديه ابو راشد لعودٍ من مطير=من قبل أسومه قال بيعه خساره
صديت منه و قلت يالله عسى خير=و القلب خليته معه فالغماره
و لا لقيت لغلطتي ذيك تبرير=السالفه ما كان تبغي شطاره
لألحين وانا أقول وش كان بيصير=أقلّها لو سمت بأسمع قراره
و لا قعدت أفر من صبح لأعصير=أدوره في كل شارع و حاره
لكن على الله لو تزيد المخاسير=ما أيست منه و لا تركت الدواره
جاتك وصوفه ياسعد دون تقصير=و إن جبت علمه تستحق البشاره
طيرٍ جعل له في خفوقي شناكير=تكفى يابن الاجواد شف وين داره
علّم هل الجيات و أهل المغاتير=إللي لهم فالصيد عِرف او مهاره
تراي مرخص في شراه الدنانير=من دون ما أصلي صلاة استخاره
يابوك طيرٍ فيه من سالم الزير=لو قيمته مليون ماهي خساره[/poem]