مشراف يا زبن المداخيل لجناب*** يرحمك ياعود على الطيب رباه

هذه قصيدة قالها منيف بن هباش العلياني القحطاني في مشراف بن عبدا لله بن مشراف آل درع ألجروي العبيدي القحطاني. ومناسبة القصيدة أن ألجروي وقف مع ابن عمه عندما فصل من عمله اثر ضروف عائليه صعبة مرت عليه فوقف معه وتوسط له وليست غريبة من صبيان ابن جاري
وأبو عبدالله من سكان قصور المقبل بالقرب من المزا حمية والقصيدة هي:

القلب من كثر الهواجيس ما طاب *** والحال من بعد المحاصيل ترثاه

يا سامع صوتي نبا نرسل كتاب *** رسمه سلام ونفحة الطيب مبداه

على الذي للطيب طالب و كساب *** نجل العبيدي عسى الأنذال تفداه

جيتك يا بن الاجواد والظن ما خاب *** ما خاب من يرجي منافيع شرواه

الوقت لا قفى مع كل الابواب *** عقب الولي محد(ن)سوى الذيب نرجاه

مشراف لا طابت سوا ليف الأصحاب *** اضحك وأنا همي مع بدى الصدر يقناه

مشراف يازبن المداخيل لجناب *** يرحمك يا عود على الطيب رباه

حيتك وأنا في مجلسك بشرح أسباب *** هذا قصيدي وأنت بالهون تقراه

لاصرت من جور المقادير مرتاب *** ماللك سوى ربع على العون تقواه

الطيب لأهل الطيب واضح ومنساب *** ولا الردي محد(ن) يحبه ويبغاه

الا الذي نفسه مع الهون تنتاب *** سالي مع كل المخاليق مجراه

كنت المجند على جثري وشباب *** سمع (ن) وطاعه مع الضباط لرضاه

ابدي خفاراتي ولاهمني حساب *** راضي ولا عندي من الشر طرياه

اخطيت والدنيا تجاريب واحزاب *** حتى الخطى محد(ن) من الناس عداه

صرت الجريح اللي تجافاه الاطباب *** وصارت مواويلي كوابيس ونعاه

ودارت علي دايرات الوقت بعجاب *** مثل السنابل مع تدويرة (ا)رحاه

ولا صارت الدنيا تجاريب وعتاب *** انا يميني خذت من وقتي اشقاه

وعدت وفاتت ولاصابت ولا خاب *** مادام عيني تشوف ابعاد مغزاه

واللي ترى مثلي تناسوه الاحباب *** ماله سوى شرواك وياسعد عيناه

انت الذي ينضرونه قرب واغراب *** صاحب وفاء واصل الوفا طيب مجناه

وشعري تباهى فيك واضهر لي اعجاب *** عجزت يديني تزود اكثر من اعلاه

مع انه من غير قصور في اخيه مبارك بن عبدالله وهذه ليست غريبة الفزعه من هذه العائله .....