قصة الخطوط السعودية و معتمر كويتي

لااااااااااااا تعليق



السلام عليكم ورحمة الله

الموضوع التالي من بريدي

أنشره كما استلمته

-----------------------------------------------------------------



الاخوان في السعودية الله يكون في عونكم على خطوطكم الجوية



كنت دائما أقرا عن سوء الخطوط السعودية وكنت اظن الأخوان يبالغون لأنه لم يسبق لي السفر على متن الخطوط السعودية...

في الأسبوع الماضي قررت السفر لأداء العمرة وحاولت الحجز عن طريق الكويت لكن الطيران كان محجوز إلى نهاية الشهر الكريم.

اتصل فيني ابن عمي واخبرني انه حجز للعمرة على متن الخطوط السعودية وعن طريق الدمام لذالك فكرت السفر عن طريق مطار الدمام

وبالفعل استطعت حجز مقعدين عن طريق الانترنت كان موعد الرحلة الجمعة 14-10-2005 الساعة 7.30 وكان خط سير الرحلة

الدمام ------------< جده الطائف--------------<الدمام

لكن كان فيه ملاحظه يجب شراء التذاكر قبل يوم الجمعة 14-10-2005 الساعة 5 مساء وإلا سوف يتم إلغاء الحجز، ومع إن موعد إقلاع

الطائرة كان الساعة 7.30 ألا إني تحركت من الكويت الساعة 1 بعد الظهر ووصلت الدمام الساعة 4.15 رحت لكونتر الحجز ولقيت قدامي

تقريبا خمس مسافرين وكان فيه موظف واحد كان الموظف بطيء جدا لدرجة انه خلص واحد فقط خلال نصف ساعة طبعا انأ اعتبر غريب ومالي

حق أتكلم على الرغم إني اعتبر السعوديه بلدي وعشت فيها فترات طويله من حياتي لكن تبقى جنسيتي كويتي ويا غريب كن أديب. واحد من الأخوان

إلي قدامي ما تحمل لما مر عليه واحد من موظفين السعودية ناداه

قال له : الأخ مسؤل هنا ؟.

رد عليه الموظف لا لكن امر.

قال الأخ :مايصير كذا الكونتر أربع كراسي ما فيه إلا موظف واحد.

رد عليه الموظف انتم الغلطانين ليش ما تخلصون شغلكم بدري ..

هني عصب الأخ وقال انتم عملكم 24 ساعة من اجل خدمتنا عشان كذا كيفنا نجي الوقت إلي يعجبنا رد عليه الموظف خلك مؤدب ووقف في الدور

قال الأخ أنا مؤدب غصب عنك بلا بشكلك أنت ومؤسستك

رد عليه موظف الشباك وقال وش قلت

قال الأخ ما كلمتك أنا اكلم الأخ

رد عليه الموظف وقال له أنت غلطت على الخطوط والخطوط مثل بيتي ما أرضى احد يغلط عليها

قال الأخ بيتك خربان متهالك لازم تعدله قبل دافع عنه هنا فتح شباك ثاني ولحسن حظي كنت ثاني واحد عنده قدمت له رقم حجزي رمى الورقة

بوجهي وقال ملني رقم الحجز أخذتها ومليته رقم الحجز بعدين أعطاني التذاكر قال الموظف روح لجهاز بطاقات الصعود واخذ بطاقاتك قلت

طيب اشكرك جدا

كان المطار شبه خالي مساحات شاسعة بدون أي خدمات ما فيه الا كافتيريا وحده يشتغلون فيها بنجالية أكلهم بايت المهم أخذت منه المقسوم

وأفطرت وبعدين صليت المغرب والعشاء جمعا.

صعدنا الطائرة الساعة 7.15 وتأخر الإقلاع 45 دقيقه قلت عادي معودتنا الكويتية على التأخير اقلعنا الساعة 8.15 في الطائرة كان كل الطاقم

مكشرين وشكلهم معصبين توقعت انهم متاخره رواتبهم لكن بعد كذا عرفت إن التكشير من العادات والتقاليد الاصيله للخطوط السعودية جاتني

المضيفة وقالت تحب لحم أو دجاج قلت دجاج لو سمحتي عطتني الوجبة وفرحت فيها جدا لأني واقع من الجوع فتحتها لقيتها مكرونيه وعند بعض

الناس معكرونيه ما كنت أحبها ابد أشوف إلي جنبي لقيت عنده عيش ولحم (رز) قلت خسارة لو طالب لحم كان جبولي عيش لكن مو مهم بعد

ساعة نصل لجده والمطاعم واجد .

وصلنا جده وبالفعل كان مطارها قديم جدا وذكرني بالمستشفى الصدري عندنا لكن كان أحسن من مطار الدمام فيه حركه وخدماته أفضل بكثير

وان كانت ما تقارن بمطارات الدول المجاورة للسعودية طلعت من المطار ورحنا لمكة حرسها الله وأخذنا سكن ورحنا للبيت واعتمرنا نسأل الله

القبول خلصنا الساعة 3.15 بعدين تسحرنا وصلينا الفجر ثم نمنا الساعة 6 وضحينا الساعة 11.30 وصلينا الظهر وجلسنا نقرا قران حتى

الساعة 1 ظهرا طلعنا من مكة الساعة 3 بعد الظهر متجهين للطائف وكانت رحلتنا الساعة 6.30 وصلنا الساعة 4.30 رحت اخلص اجرائات السفر.

قال الموظف رحلت الرياض

قلت لا الدمام

قال هي نفسها

قلت لا مو نفسها أنا حاجز الطائف الدمام دايركت وهذه التذكرة ما فيها الرياض

قال معروف ان طائرة الطائف الدمام لازم تمر على الرياض

قلت معروفه عندك بس أنا ما اعرف وكان لازم يبلغوني

قال ما فيه دايركت نبي تسافر ولا لا

قلت أمري لله أسافر

أثناء الانتظار كان جنبي واحد كبير في السن معه زوجته وكان باين عليه مستاء جدا قلت وش فيك حجي عسى ما شر قال حسبي الله عليهم متى

بطير ذا الطيارة من الساعة 2 وأنا انتظر

قلت وش الي جايبك الساعة 2 الطيارة الساعة 6.30

قال لا الطيارة الساعة 5 ومكتوب في التذكرة شوف

وفعلا شفت تذكرته وكان موعد الرحله الساعه 5 قلت حجي ما بلغوك ما اتصلو فيك
قال ابدا ما احد اتصل

قلت اجر وعافيه الله اصبر واحتسب الأجر صراحة غريبة تذكرتين لنفس الرحلة بوقتين مختلفين أول مره أشوفها أقلعت الطياره من مطار الطائف

الساعة 6.45 متاخره عن وقتها الموجود بتذكرتي .15 دقيقه وعن موعد تذكرت ألحجي 1.45 دقيقه

في الطائرة جاتني المضيفة قالت لحم ولا دجاج . وبدون تفكير قلت لحم قالت بس اللحم خلص عندنا دجاج بس الحم خلص قلت لا دوري يمين شمال

قالت والله خلص ما عندنا تريد دجاج قلت الشكوى لله عطيني دجاج فتحته لقيته مكرونيه لالالالالالالالا ما أحبها . (والله الذي لا اله إلا هو إن

هذا إلي حصل)

وصلنا الرياض الساعة 7.30 تقريبا أعلن الطيار عن الوصول وطلب من المتجهين للدمام البقاء في الطائرة حتى نعطى التعليمات ، بعد 15 دقيقه

طلبوا منا النزول للصعود لطائره أخرى . نزلنا سئلنا احد الموظفين عن موعد إقلاع ألطائره قال والله ما عندي علم انتظروا إلى ان تأتيكم التعليمات

سئلنا ثاني وثالث نفس الكلام. جلسنا ننتظر كان المطار كئيب جدا ما فيه أي خدمات باستثنا محل هدايا وكم كشك للمشروبات والسندوتشات الخفيفة

الساعة 8 أعلنت لوحت الإعلانات عن موعد أقلاع الرحلة للرياض الساعة 9.30 . الساعة 9.45 أقلعت الطائرة وصلنا الدمام الساعة 10.15

وبدأنا الهبوط فجأه رجعت الطائرة تصعد مره ثانيه صراحة خفنا وش إلي حصل بعد خمس دقائق أعلن الطيار إن الرؤيا في الدمام صفر ولا يمكن

الهبوط لذالك يجب العودة للرياض وبالفعل رجعنا وكان قرار حكيم ولا اعتراض عليه

وصلنا للرياض وبدت المعاناة أول ما وصلنا سئلنا احد الموظفين إن كانوا بيعطونا سكن إلى موعد الإقلاع رد علينا بعصبيه لا أصلا انتم ترانزيت

إحنا مو مسئولين عنكم قلت عفوا إحنا جايين من الطائف للرياض على الخطوط السعودية كيف مالك شغل فينا ما انتظر لما اكمل كلامي تركني

ومشى الإخوان إلي معانا بالطائرة تجمهروا قدام الكونتر كلهم معصبين لكن ما كان فيه احد معبرهم وكل واحد يقول مالي شغل. طيب متى ممكن

نروح للدمام الجواب الوحيد الي نسمعه ما ادري مالي شغل.

طالبنا بمقابلة المشرف المناوب وبالفعل حظر واحد حبيب كان اسمه وليد العبيدلي على ما اعتقد ولأول مره أشوف موظف في الخطوط السعودية

يبتسم ولكن الظاهر ما كان بيده شي بدا يهدينا ويوعدنا وكل ما نطلب منه طلب يقول حاضر . بس خلوني اكلم جده لان كل شي عندهم غاب شوي

وخبرنا إنهم ينتظرون تقرير الأحوال الجوية الساعة 1.15 دقيقه بعده يتخذون القرار اما التوجه للدمام أو إعطائنا سكن إلى أن يحين موعد الرحلة.

انتظرنا وكان الانتظار ممل جدا إلى الساعة 1.15 دقيقه رجع لنا المشرف وليد وخبرنا إن الأحوال الجوية في الدامام سيئة جد ولا يمكن المغادرة

لذالك أجلت الرحلة إلى الساعة 4.15 دقيقه قلنا طيب نروح للفندق قال لا ما نقدر نسكنكم الا اذا كان التأخير أكثر من 6 ساعات

قلت يا أخ وليد معروف الضباب ما ينقشع الا إذا طلعت الشمس يبدأ الماء العالق بالجو يتبخر . قال عفوا هذا مو بئيدي ما اقدر أساعدكم ..

قلت طيب ممكن الغي الرحلة واحجز على رحلة الساعة 5 العصر

قال لا أنت تذكرتك عن طريق الطائف لا زم تروح تعدلها مناك

قلت طيب ممكن اخذ عفشي وأروح عن طريق البر

قال الساعة أربع لو ما تحسن الجو راح ننزل العفش

فيه إخوان احتجوا واصرو على السكن وبالفعل كان الأخ وليد متعاون جدا لكن مثل ما قلت ما كان بيده شي طلب منحه فرصه لأخذ الموافقة على

حل مشكلة السكن كلم الشفت كنترول عن طريق الجهاز إلا سلكي رد عليه الشفت كنترول على ما اعتقد كان اسمه أبو هيثم ............ كان الأخ

يغني الظاهر كان مبسوووط كثير
الحقيقة أنحرج وليد وسكر الجهاز وراح يكلمه عن طريق التليفون لكن الظاهر حتى الشفت كنترول ما كان بيده حاجه قال أرسل برقيه لجده وانتظر

الرد وبالفعل جا الرد على تسكينا في فندق المطلق........

قال احد الإخوان يووووووووووووووووه المطلق

قلت يوووووووووووووووووه المطلق وش السالفة

قالو لي المطلق فندق بوسط الرياض نحتاج ساعة على الأقل للذهاب وساعة للعودة يعني الساعة هلحين 2 ما فيه وقت نروح ونرد ..............استمر

الاحتجاج وكان الاخ وليد متعاطف معنا لذالك كلم المشرف وطلب انه يحول حجزنا على رحلة الساعة 10 رد عليه الشفت كنترول وقال أرسل برقيه

لجده اسئلهم بعد شوي رد المسئول وقال لا مانع من تحويل حجز 50 راكب على رحلت الساعة 10 وإسكانهم الأخ وليد تجاوزا اخذ 56 راكب وما كان

لنا نصيب أنكون منهم (الله كريم)
المهم انتظرنا الى الساعة 4.15 قالوا الساعة 5 نوافيكم بالتفاصيل واستمرينا متسمرين بكراسينا الساعة 5 قالوا الإقلاع 6.30 الساعة ست

رحت للموظف وسئلته انشالله بعد نصف ساعة نغادر قال لا والله تأجلت الرحلة قلت إلى متى . مثل العادة ما اعرف مالي شغل
الساعة 7.15 طلبوا منا الصعود للطائرة وبالفعل إقلاعنا الساعة 8.15 بعد 9 ساعات انتظار على كراسينا بدون نوم .......... وفواصل من سوء

الأخلاق والتهزيء لكن صبرنا ونحتسب الأجر عند الله

صراحة أشفقت على الإخوان في السعودية وخصوصا إلي يضطرون للسفر مع السعودية وأصبحت على يقين إن كل ما قيل وكتب عن السعودية

اقل من الحقيقة بكثير

الخطوط الكويتية يحصل فيها تأخير لكن ما حنا مضطرين للسفر معها لأنه لا يوجد طيران داخلي والطيران الدولي يوجد له بدائل كثيرة .....