البرستيج عيّا ..

بسم الله الرحمن الرحيم

السلام عليكم ورحمة الله وبركاته

الله يسعد مساكم وصباحكم وكل أوقاتكم بالخير

كيف أنتوا ... طيبين ... ماجورين

شلووونكم الله مير يسلمكم

كيف حالَكم ... يا رب تكونوا بخير

شخباركوووم يوووبه

كيفكون ... إن شاء الله منيحين

بلهجات مختلفه


تذكرت ليش الغراب ما يعرف يمشي ؟؟؟

يقولون إنه بغى يقلد مشية الطاووس لا هو أتقنها ولا قدر يرجع لمشيته

ههههههههههههههههه مشكلة والله ..

في الحقيقة تعرضت لإنتقاد لاذع في كذا منتدى علشان مواضيع كتبتها باللهجة العامية

لهجتي اللي من عرفت عمري وأنا أتكلمها ..

يقولون ليش تكتب كذا .. خل عندك شوي برستيج .. لا تفشلنا بهذي اللهجة ....!!!

حتى لو ما توجه لي هذا الإنتقاد بطريقة مباشرة ..

وكأني مسوي عيب أو غلطت على أحد وما بقى إلا يقولون أقطع العلاقة أنت تفشل ..

لكن لو تخلينا عن لهجتنا على أرض الواقع .. !!!


من خلال إقامتي في جدة حاولت أواكب مجتمعها خصوصاً في اللهجة

لكن متأكد إني ما بأعرف ويمكن أضيع لهجتي وأصير مثل الغراب ..

تخيلت إني أرجع لأبوي في الديرة وأقوله يا بويا أش بك ما رديت البلاد بُر

علشان يشبك المشعاب في راسي ..

أو أروح لعمي وأقوله ايش رايك يا عمو نروح دحينه نتمشى في الهضب ولا القاعه

علشان يحلف لا عاد يشوف وجهي ويشهر بي عند العالم ..


حتى لو عشت بعيد عن مسقط راسي سواء عمل أو دراسة أو تجارة

هذا ما يعني إني أتخلى عن عاداتي وسلوكي ولهجتي اللي تربيت وتعودت عليها ..

كلنا نلاحظ التغير اللي يطرأ على الكثير يوم يسافر ويتغرب عن ديرته

سواء في اللهجة أو الطبايع أو حتى في الشكل صدق راعي المثل .. ( يا شين السرج على البقر ) ..

كل هذي التغيرات نقدر نقول إن لها مسببات ومن أهم مسبباتها من وجهة نظري

ضعف في الشخصية و عدم الثقة بالنفس

طبعاً هنا في مجالسنا البرستيج منقرض ويا زين الفطره ..

ملاحظه

تطرقت للهجة أهل جدة لضرب المثال فقط وليس للإستهزاء بما إني عايش في جدة

تقبلوا ما كتبت مع كل تقدير وإحترام

.