من اروع قصايد حامد بن علي بن مايقه الحبابي

قصيدتنا هي للشاعر المعروف حامد بن علي بن مايقه الحبابي وهو يعتبر الشاعر الاول بقطر كما انه عضو بمجلس الشورى القطري
وهذه القصيده تعتبر من قصايده المليئه بالحكم والنصح ويقول شاعرنا :


يالله يلي من فضايلك تعتاش @كل البشر والبر تسقي عطاشه

يلي خلق الانسان يارب الادباش @رب الظعيف الي عليك انتعاشه

فرج لمن قلبه غدا فيه وشواش@من وقتنا الي زايد(ن)حس واشه

وقت به النمام لو كان غشاش@يرفع مقامه غادي(ن)كنه باشه

من جاه قدم له معاميل وفراش@لوكان مايسوى متاكي فراشه

متكبر(ن) عند الرجاجيل ببلاش@عظم(ن)لمن ناشه قليل(ن)عراشه

وان شاف ظيف(ن)ناصي(ن) بيته انحاش@خلى الظيوف ويعتبرها طماشه

يم العيون السود جوزي من الاش@لوكان ميسور(ن)وكثير معاشه

شومي لمنه للمواجيب حواش@رجل(ن) اذا جا ذكر الامجاد حاشه

لا وهني الي الى ظاق ما طاش@صدره وسيع وزايد(ن)برد جاشه

همه قليل وللهواجيس ماناش@ونفسه طيعه في ظروف انكماشه

والهم غم وصاحب السو منقاش@مثل الجريح الي يحك البشاشه

والعلة الي بالجسد دمها باش@تبطي بعوق وجرحها في خشاشه

والحلم زين وراعي الصبر لو عاش@على خصيمه ينتصر في هواشه

ليصار حلم وخالطه قوة الجاش@والرجل ودك فيه لين وحراشه

والصدق نور ولونه ابيض من الشاش@والكذب زور يتكشف قراشه

حبله قصير ومارد الكذب معطاش@تقصر حباله قبل ييبس مشاشه

والزود نقص ومن تكبر على ماش@اما ردي الساس ولا خباشه