الذيب
انا قبل فتره داخلت احد الاخوان بخصوص الذيب ولاحد قرا ماكتبت فحبيتكم تقرؤه والحكم لكم
خذ عندك
الذيب لايمكن يمارس الجنس مع امه واخته وله حليله واحده طول عمره وان ماتت صبر وقنب
الذيب مايهرول عبث واذا عدا وعرف انه اخطا تقدير العدو والمسافه ما ينكص الين ينيب الطارفه ولاهي بعادته عادته ينتقي السمينه الثقيله واذا صادف واصيب يقعي ويربص يبي خصمه في متناول يده ثمن يطيش باخر قوته اما كذا والا وداع
الذيابه يااخوان ماهيب مثل باقي الحيوانات كلا على بطنه ولصغاره لا- الذئاب لها مجتمع قبلي ولها شيخ وراعي وصياد ومراضع ودائما الذئاب قطيع واذا حظر الشيخ تلاوي الاعناق عند منحره احترام له واذا طلع منهم فتى عاصي وقوي لازم يبارز الشيخ والبقاء للاقوى
الذيب يااخوان من وجهة نظري ما يسميه حيوان الا جاهل فله من المميزات اللي تخلي الرجال العفاطير يحترمونه خذ مثلا- اذا احدهم صاد وهم في غزيه كلا يعطيها الاخر ايثار الين تعفن ما حدا كلاها وهذي عند الرجال الطيبين شيمت الطيب النادر من الرجال
الذيب هو اول من بشر راعي الغنم بظهور نبي الاسلام صلى الله عليه وسلم
الذيب اذا خالف شي من سلوم عشيرته ينفى ومن هنا جا القنيب اللي يقطع القلوب واذا كان ذنبه كايد تعدي عليه القبيله بعد الحكم وتقطعه صبرا
طبعا بتقولون ومنين هذي المعلومات ابشروا في امريكا الشماليه كولورادو هناك محميه للذئب الرمادي ودرسوا سلوكه لمدة ثلاثين سنه وطبعا اللي درسوه علمااااااااااء
ثانيا سنه من السنين كنا قنوص دون حزم الجلاميد وسارين لمعشانا وواحد من اخويانا اللي في الساقه يشوف الذيب وهو يرميه على الكشاف ونعود ويوم جينا الله يجيرك الا وهي مرضع وديودها كبار مثل ديود الكلبه اكرمكم الله وعلى ضوح ا لتريك كانت تمد عينها على رجما ما هوببعيد وانا اخذالتريك وامشي لمطاح نظرها والاقي ثلاثه جرا لحم ماعليهم وبر وعمي وانا اخذهم من زود الحميا الي عندها وهي تلحسهم واحطهم قريب من ديودها وهي تدر لهم ويرضعون ثمن ماتت واخذت جراها طبعا خوينا زعلوا عليه الرفاقه وانبوه واعتذر انه رمى سواده ولايدري المهم امسى في فروته
واخذت الجراء ولاادري مات اثنين قبل مانعود من مطرشنا وبقيت الانثى ورعيتها من قريب وعرفت اشياء كثيره منها اذا شافت اللي داخله جن تكلح وتجز وتنويه بالهجوم صارت على واحد من الربع قدام عيني وراح وسال وطلع لابسه جني
كل المخلوقات تشوف الجن الا بني ادم بعضها اي المخلوقات اذا شافت الجن تنهق وبعضها يجفل وبعضها تتلبسه الجن الا الذيب تنحاش الجن من الارض اللي عاويا ذيبها لان الذيب ببساطه ياكل الجن
بعض العامه من الخوافين يربطون الذيب بالخيانه والغدر وهذا ماهوب صحيح الذيب كائن حي عنده مشاعر وعنده كرامه الذيب الوحيد اللذي لم يستطيعوا تدجينه فقاموا بتهجين انواع منه بين كلاب وذئاب مثل ابن اوى وبعض السلق وخذ مثلا كلاب الدينقو في استراليا اصله هجين
وياويل من طاح في يدها لكن الذيب بايش اشتهر سؤال اتحدى احد يجيبه
للحديث بقيه والسلام عليكم