[frame="7 80"][poem=font="Simplified Arabic,4,black,bold,normal" bkcolor="transparent" bkimage="" border="none,medium,gray" type=4 line=0 align=center use=ex num="0,black"]
قصيدة رثاء في فقيد قبائل سنحان

الاستاذ حمد بن ناصر ال شعاق السنحاني القحطاني

رحمه الله واسكنه فسيح الجنان

بسم الله ابدا واذكره واترجاه=عالم سرايرنا ولاشي يخفاه
عفو(ن)كريم(ن) يفرج الهم والضيق=ماخاب عبد في دجا الليل ناجاه
يالله تثبتنا على دين الاسلام=واغفر لنا والعبد ما اكثر خطاياه
يارب تلهمنا الصبر والقدر حق=ماضي(ن) قضاك وما كتبته رضيناه
يالله حسن الخاتمه واغفر الذنب=والله يهون روعنا يوم نلقاه
الموت حق وكل نفس تذوقه=والباقي اللي تسجد الخلق لرضاه
من بعدها ياهاجسي خاطري ضاق=والفكر هايم في ظلام تغشاه
تجمعت لاحزان والهم والليل=واهتز عرش القلب من كبر بلواه
والبال سج وتاه والعقل مذهول=واللي فجع قلبي ولاعه وعناه
علم(ن) لفاني صبح لاعاده الله=كدر فرحنا والحزن حل ممساه
من روعتي فزيت واطيح واقوم=اشنع خبر والشاهد الله سمعناه
قالو اذكر الله قلت يالله عسى خير=وش علمكم والعبد لله مشكاه
قالو حمد مات وعسى الله يبيحه=والموت حق وما قضا الله مضاه
يالله تهونها وتجبر عزانا=ياواحد ماغيرك احد(ن) دعيناه
واسئالك بسمك والصفات العضيمه=اتثبته يالله ومالنار تحماه
يارب وسع له ونور له القبر=واغفر ذنوبه وارحمه وسمح اخطاه
عساه في الجنه مع صفوة الخلق=في جنة الفردوس ويطيب مثواه
ون جا نكير ومنكر ليسئلونه=ان تلهمه للحق قدام يغواه
في القلب حزن ودمعة العين تذرف=والله يعيض بخير في من فقدناه
سعد الرفيق ومن يحل بمحله=له فرضة(ن) فينا وياكبر فرقاه
نبكي على الوافي شباب(ن) وشيبان=حزن(ن) على صبح دجا الليل غطاه
ونبكي على شهم النبا عزوة الضيق=امروض العسره لمنا نخيناه
ونبكي على اللي في المواقيف زيزوم=مثل الجدي من يقتدي فيه ما تاه
وتبكي الشجاعه واللوفا والمراجل= على عريب ماتوصف حلاياه
ويبكيه قصر للركايب مناخي=على اللكرم والطيب والجود مبناه
ويبكي عليه النجر والعود الازرق=ودلال رسلان بها الكيف سواه
ماصك بابه في وجيه المسايير=بيت الكرم مفتوح والضيف ينصاه
يضحك حجاجه للمسير تبهلال=لي جا المسيرماتعقد محياه
كريم سبلا منبع الجود والطيب=مابخل كف منبع الطيب يمناه
والطرقي اللي من عنا المشي تعبان= بعد التعب يرتاح من طيب ملفاه
بعد عنا الطرقه وحر القوايل=يروي ضما كبده وتروى مطاياه
الضيف ضيف الله وهداج تيما=يثني تراحيبه ويفرح لما جاه
ويقدم الميسور ويجود من جود=رب كريم ماحصينا عطاياه
هذا حمد لاهان ذكره وطاريه=عد النشاما ياصله ويتعداه
غالي وقدره عندنا ماتغير=حتى لوانه مات قدره رفعناه
ابو فهد نغليه بالحيل بالحيل=راعي الوفاء والطيب وشلون ننساه
اللي لما جارت علينا الليالي= وحمولها ثقلت علينا التهمناه
ون صاحت الريبه لنا عزوة(ن) فيه=رجم(ن) طويل من زبن فيه ذراه
ون ضاقت فجوج الوسيعه علينا=يجلا ظلام همومنا لي زهمناه
اصعب لمور تهون ويروض العسر=له وقفة(ن) لي خيم الهم تجلاه
ستر لبن عمه رفيق المسره=وجهه سميح ودربه السمح ماخطاه
محد(ن) تكفا الشر من راعي الخير=ستر ابن عمه مالمناقيد يدراه
يدمح خطاه وزلته ماحسبها=حتى ولو سبه ترفع وراضاه
حليم لي من ابن عمه غضب منه= يتبسم بوجهه ويصبر لعجفاه
شهم حسين اخلاق فيه التواضع=عفيف نفس والوفا من سجاياه
معدن ذهب ومعرب الجد والخال=امعرب الساسين عالطيب مرباه
درب الكبر والكذب والحقد والحسد=والعيب والمنقود ماهو بممشاه
ولا يعرف البغض قلبه ولا الزود=والصدق طبع اللي على الدرب باراه
ورا ابن عمه ما مشا بالمناقيد=وعن شوفته شوفه يغضه ولا ادناه
ما يختله في غرته بالرديه= ولا يهذري في المجالس ويقفاه
ولا الردي سوا(ن) به ان حي ون مات=يضحك بوجهك والغدر في نواياه
هذاك لايطرا ولا حي طاريه=ان غاب فابرك ون حضر ماحسبناه
ولاحمد وافي ولي حل طاريه=كل يقول ونعم يانايف الجاه
نوادره تبقا للجيال تذكار=ذكره يشرفنا ونفخر بذكراه
ولا مات من خلف ولا هان ذكره= بالخير نذكر طيب ماضي مزاياه
والحمد لله يوم خلف نشاما=فهد وخوانه من غلى الغالي اغلاه
اشوف فيهم من حلايا كحيلان=فيهم عزانا في عزيز فقدناه
وانا اشهد انه راح منا فقيده= كثرو من امثاله ومثله وشرواه
ولولا رضانا بالقدر والمقادير=مالموت بانفسنا العزيزه فديناه
مرحوم ياللي في ثرا نجد مدفون=ودع بني عمه وداره ودنياه
تذكرو ياغافلين اذكرو الموت=والعبد ماقدم بدنياه يلقاه
وختامها بزكى صلاة وتسليم=على رسول للهدايه تبعناه
الله لايحرمنا شفاعة محمد=شفيعنا يوم الحشر عند مولاه
بشيرنا نذير الامه ولا ظل= من يتبع السنه ولا خاب مسعاه
واخر كلامي لله الحمد والشكر=والله يهدينا جميعا(ن)لتقواه[/poem][/frame]