السلام عليكم ورحمة الله وبركاته
اسعد الله مساكم جميعاااااااااااااا
احب ان أضع بين يديكم هذه القصيده وهي في الاخ/ شليويح بن حمد آل عاطف القحطاني واخوه صالح ( آل حمير )وهادي بن ربيع ال سعد القحطاني كانوا جيران لي واخذت انا وياهم فترة طويله وحنا جيران بالابل وكانت ونعم الجيره وطاح الربيع العام الماضي وتفرقنا وكلً راح يتبع هواء ابله ومشاغلي وظروفي العمليه ابعدتني عنهم وسويت هذه القصيده
وهم يستاهلون اكبر منها لا أريد أن اطيل عليكم اترككم مع القصيده
[poem=font="Simplified Arabic,5,black,bold,normal" bkcolor="transparent" bkimage="backgrounds/6.gif" border="none,medium,gray" type=4 line=0 align=center use=ex num="0,black"]
البارحه شبيت ضوي من عصير =ضوً على السارين يجذب سناها
وعلى منارتها دلالً مباهير=بريت(ن) يبعد خواء الراس ماها
واخذت لي فنجال واحد ولا غير =والنفس كزت شربها من عناها
وهجوس قلبي بين ورد ومصادير =هجس(ن) يريضها وهجس يحداها
ادافع اهجوسي لو انها طوابير =واردها لا من هوت عن هواها
واسلي الخاطر بنظم الاشاعير =وروحي تغني من خلاها بخلاها
وساير العالم على الكيف وتسير =والناس ما كلً بيدرك رضاها
وراجع الماضي وادير التفاكير =افكر بدنياً قليلً حلاها
دنيا العنا دنيا التعب والمخاسير =لا وخسارة ياعلي من رجاها
دنياً تفرق واعرف انها مقادير =والله يكافينا خوافي بلاها
يا والله اللي شد منا مناعير =روس الرجال اللي يذري ذراها
عشاقت(ن) للطيب تعرف بال حمير =قومً رفيعً يا علي مستواها
فيهم كرم ماله حدود ومعايير =وبالطيب ماوالله يلحق جزاها
جاذبهم اللي يعشي الذيب والطير =وان جاته الخطار تلقى عشاها
نادر زمانه ما يحسب المخاسير =كفه نديه من جزالة عطاها
مرحوم يا مرث حرارً نوادير =افعالهم بالعين كلً يراها
ومعهم حكيم الشور بالشور لا شير =اللي ليامن قال كلمه حماها
رايه يحل الكايدات العواسير =تمشي به اللي ضيع الله قداها
شاعر واعده من كبار الشواعير =شوق الهنوف اللي كثيرًً سحاها
ابوربيّع فالليال المعاسير =منصى الرجال اللي كرامً لحاها
والنعم بالجيران ذا شيخ ذا امير =ماخاب من ضاقت عليه ونصاها
جحادر(ن) لا جاء عجاج ومعاصير =تاقف وياكم قوم تاقف وراها
تهتز من هيباتها حضن والنير =وحتى الجبال ايذوب فيها حصاها
اليا زعلت تزعل وشرً بلا خير =وليا رضت يا طيبها في رضاها
وليا بطشت تبطش وقومً مشاهير =وليا عطت تعطي ويعرف عطاها
ولياوقفت تهتز منها الطوابير =ولياهرجت محدً بيهرج معاها
واليا غزت كلً براسه سعاطير =قومً من الماضي بعيد مغزاها
قحطان قحطان الحسب والنسب مير =ياقشر حظ اللي يجي في رحاها
مدحتهم واصور الوضع تصوير =ابغي ليا من كل شخصً قراها
يدري ان دمعي يوم حول شخاتير =كله سبب عينً تحب اقصراها
احس فيها مثل ضرب المسامير =حتى ازعجت من حولها في بكاها
تبكي على فرقاء الوجيه المسافير =وعين القريني دمعها من وفاها
يا ما دعيناهم وجونا مسايير =وياما دعونا واستجبنا لدعاها
وأن جيتهم عينت حفوه وتقدير =وسوالفً يفخر بها من رواها
وفنجالً أشقر ينعش القلب لا دير =يبعد عن الروس الخويه خواها
وحيلً تقلط مع حليب المصاغير =سلمً لهم واللي بغاها لقاها
اقفت بهم سود النياق الاباكير =جرد الرقاب اللي طوالً خطاها
سودًً وفيها من ضهور المغاتير =فنس الخشوم مزين الله حلاها
وساع النحور وكلبوها على بعير =سلايل وريك المسمى علاها
الله يعديها عيون المطايير =تستاهل اللي راح يتبع هواها
يتلون براق المزون المزابير =يمين عن جبهه شمالً وراها
يذكر به العساس نبت النوايير =ترتعبه الفاطر وتشبع ضحاها
وانا لشوفتهم بسوق التباشير =بسوقها بسوقهامن غلاها
يسقى على عيني رجوع المناعير =وان جدد ايام عطتنا قفاها
والله يامن بشرني ان يبشر ابخير =وبشارته ذودي جميع ابعصاها [/poem]
وسلامتـــــــــــــــــــــكم
اخوكم الشاعر/ غنام بن سعد آل بديع القريني