قبيلتي قحطان وابكي عتيبي

السلام عليكم ورحمه الله وبركاته



اعجبتني هذه القصه لما فيها من الوفاء عند القدماء احببت ان انقلها لكم مع القصيده


حدثت هذه القصه قبل اكثر من40 سنه حيث كان الشاعر حمد بن سعد بن سمعان القحطاني ساكن بجوار امير اللواء الثامن بالحرس الوطني سابقاً الشيخ / محمد بن مناحي الهيضل الدعجاني وفي يوم من الايام جاء حمد يمشي مع الشارع متجهاً لبيت الشيخ / محمد كعادته ( مسير)
وفي طريقه قابله من يخبره بأن محمد توفي وتأثر بذلك كثيراً . وبعدها ايام مر ابن سمعان على قبر الهيضل ولما راه تذكر ما مضى وقال هذه الابيات :










يالله ياللـي فـوق خلقـه رقيـبـي
يامدبـرٍ كـل المقاديـر بأسـبـاب

عنا على الدنيا والامـر المصيبـي
واغفر لنا يلي علـى العبـد تـواب

امس الضحى غافل وقلبـي مغيبـي
ووحيت حس مصيحٍ صاح مرتـاب

قلت الخبر؟ قالوا : فـراق الحبيبـي
قالوا محمد ميـتٍ والقـدر صـاب

فزيـت فـزت مستخـفٍ رعيبـي
وجضيت جضت من كلا رجله الداب

والصدر بالعبرات ينحـب نحيبـي
والدمع من عيني على الخد سكـاب

قبيلتـي قحطـان وبكـي عتيـبـي
ابكي على ريف النشاما ليـا غـاب

مرحـوم ياللـي ماشكـاه القريبـي
ولا شكوا منه الرفاقـه والاجنـاب

سهل الجناب ومحضـره مايغيبـي
له مجلـسٍ يـرده عيـالٍ وشيـاب

يامـر لهـم بمهيـلاتٍ وطيـبـي
دايم دوام وراعي الكيـف صبـاب

يدنـي خويـه بالمكـان القريـبـي
مايتركه محقور يجلس وراء البـاب

وليا هـرج كـلٍ لهرجـه يجيبـي
مافيه من بعض القشر زود وارهاب

شيخٍ ولـد شيـخٍ وساسـه عريبـي
والطيب له من ساس جده والانساب

عسـاه بالجنـات مالـه حسيـبـي
والحـور يلقنـه بفـزه وترحـاب

ولامات شيخ مـرث لـه عقيبـي
فرخ تنهض بين صايـح وجـذاب

خالد ترى كسب المراجل صعيبـي
يكود من عض النواجـذ بالانيـاب

حاذور من خطوى جليس غضيبـي
يودعك شيـن بالرفاقـه وسبـاب

مجالس اهل الشر ذنـب وعيبـي
ومجالس اهل الخير يدخلك الابواب

باب المعـزة وارتفـاع ا لنصيبـي
باب الهدى والرشد للخيـر كسـاب

وصلوا على سيد العبـاد الحبيبـي
اعداد ما خط القلـم حبـر وكتـاب


وسلامتكم