[poem=font="Simplified Arabic,5,orange,bold,normal" bkcolor="transparent" bkimage="" border="none,medium,gray" type=1 line=0 align=center use=ex num="0,black"]
انشدوني كيف وضع الساحة الشعبية = قلت ساحه بس بعض احيان ماهي ساحه
ياكثر شعارها فالوزن والقافية = لا يهمك لو تجيك عطورهم فواحه
ابلشونا اهل الغزل والوصف والمرثية = وابلشتنا الزمرة الذمامة المداحه
مابقى الا يلعبون الدبكة الشامية = والمسيحي كل سبت يشاركون افراحه
يصنعون من السوالف سالفة وهمية = والقوافل سايرة وكلابهم نباحه
مادروا ان الغرب صنع قنبله ذرية = والبلا من تحت راسه والسلاح سلاحه
عزتي للعالم اللي مالهم شخصية = قفلوا باب الحديد وضيعوا مفتاحه
الحوال مصلحه وبيوتهم مبنية = وافئدتهم ميته وسدودهم بياحه
لو تهب الهبة الغربية الشرقيه = خيله كبايةٍ وخيولنا جماحه
والخلل والمشكله فالبنية التحتية = في لسان الشاعر اللي صجنا بصياحه
قال انا من ياكل اكتاف الذبيحة نية = ويوم جاه الصدق ما قدر ياكل التفاحه
ماخذٍ بالهيلمه شهادةٍ فخرية = وان تضايق راح براة البلاد سياحة
يتغانم فرصته فالعطلة الصيفية = لين صارت روحته تشره على مسراحه
ماقعد ينشق هبوب الديرة المسقية = ويتسمع للشعر في قرية المفتاحة
والقناة اللي نتايج بثها سلبية = يجتنبها ويتفرج في قناة الساحة
فالدوا ماهو بشرب الخلطة السحرية = المهم الشاعر الخربان كيف اصلاحه
اغلب الشعار عنده حالةٍ نفسية = وين تلقى شاعر نفسيته مرتاحه
لو عرضنا حالته للجنة الطبية = كان مازادت جراحه ماتطيب اجراحه
فافزعوا لي يانشاما هاتوا الجنبية = اقطع حبال الشراع اللي تهب رياحه
استلمت البارحه برقية سرية = تحتوي علم خفي لابدّ من ايضاحه
حذروا القناص لا يقرب من المحمية = لا يزهب شوزنه ولا يسن رماحه
لاتقوّت نيته واشتلّته دورية = والله ان يبطي عظم مايطلقون اصراحه
فلا تهوز الروس ياراس بلا طاقية = توك بدنياك سارح والعرب رواحه
قد صبرنا واجد وصبرك علي شوية = لا تقارن لولو البحر الحمر باملاحه
احرقتني الشمس وانت مكوعٍ فالفية = والبليد اليا تعذر عذره المساحه
قلتها والسالفة مكشوفة مخفية = كل رجال يولع ليته ومصباحه
القصايد كان ماجت بالذهب مطلية = سكروا فم المقوصد واقطعوا مسباحه
واول شروط التأهب لامسية شعرية = من عزم له في حفل ياجب عليه انجاحه
ولا انا مترت تصف الكورة الارضية = وعابرٍ بحر المحيط الاطلسي سباحه
واقطع فجوج الصحاري القاحلة رجلية = طير حر عزوته في مخلبه وجناحه
ابدوي عايش في منطقة نائية = عشت في جو الشمال وعشت جو الباحه
من قبيلة نارها وقت الملاقا حية = اقحطان اهل الفعايل للعدا ذباحه
سلمنا سلم قوي واقامته جرية = لانوت به قوة المارنز ما تجتاحه
مايكيف راسي الا الدلة البرية = وفالمثايل ماعرفت الا الصراحة راحة
يوم غيري كيفته القهوة التركية = والردية في ثراه عروقها نضاحه
ومن نشدني كيف وضع الساحة الشعبية = قلت سلم لي على صاحب قناة الساحة[/poem]سعد بن شفلوت

__________________