[poem=font="simplified arabic,6,black,normal,normal" bkcolor="transparent" bkimage="" border="none,4,gray" type=0 line=0 align=center use=ex num=",black""]
الضيقه اللي خيّمت داخل البال=تصهل صهيل العاديات الاصيله
اللوم فارس في ظهرها و خيّال=و حروف شعري و القوافي قبيله
و إسلاحها شرهات مالجال للجال=لين اختلط دمّي و دمها فصيله
و على لساني صغتها بدع و أمثال=إبيوت شعر(ن) زندها عالفتيله
و اسبابها ياللي نشدتوا عن الحال=ضاع الوفا بين الزميل و زميله
في ذا الزمن عوّد هل العرف جهّال=ما يفرقون الواجبه و النفيله
على النفايل مستعدين و عجال=و الواجبه كنها عليهم ثقيله
وجه الحقيقه كان مخفي بطربال=و شمس المصايب بيّنت لي دليله
الأقنعه طاحت و ميّزت الأشكال=و بانت وجيهٍ لطّخت بالفشيله
ميزانها بين الرجاجيل ميّال=للمصلحه و المنفعه فيه ميله
إفلان عنده مصلحه جوه فالحال=و الكل منهم يرتجي للحصيله
و فلان الآخر ما ملك قيمة ريال=محد(ن) درابه لو غمرهم جميله
الظرف واحد لكن إردود الافعال=متخالفه بين الجزل و الهزيله
من عزّنا نرخص له الحال و المال=و من كبّنا يجزآ لفعله مثيله
و الشرهه اللي حذفها حذف نبّال=تحذف عليكم يالعقول النبيله
إكبار سن و فالملازيم جهّال=ولحاكم أطول من جديل الكحيله
عزّو لحاكم من هزيلات الاعمال=ولّا احلقوها جعلها للرذيله
يا لحيةٍ ما هي على وجه رجال=أستر لها تلبس على الوجه شيله
[/poem]