قصيدة الشاعر : زيد وازع الظلافيع الجرابيع رثاء في الامير : نايف ابن عبدالعزيز "رحمه الله"
رمز الأمن قصيدة رثاء للشاعر زيد الظلافيع
رمز الأمن
اليوم يوم السبت محدٍ بناسيه
تاريخ مؤلم والخبر في الصحيفه
واللي ما يقرا يقول ياناس وش فيه
تنبئه بالحاصل دموعٍ ذريفه
ركن الوطن آسف أكيد إنه بانيه
رمز الأمن محزم ملكنا وسيفه
عوق الخصيم وسم كبده ومعميه
كل الأعادي من فعوله كفيفه
نايف ليا من قيل نايف تكفّيه
إسم على مسمى معاني وشيفه
كلٍ بعهده نام والنوم هانيه
وكلٍ يبي في الداخليه وظيفه
الله يرحمه عداد ممشى خطاويه
في منجزات كالجبال المنيفه
عساه في الجنات يلقى محبيه
دعوة صدوق والنوايا نظيفه
الله يعوض العود في فقد غاليه
وعسا الصبر دايم دوامٍ حليفه
ماكتب لابن آدم فلا بد يآتيه
ما تنفع الآهات والا الحسيفه
مادام خلف بعده اللي يحاليه
ذكره سما لاجلٍ محمد خليفه
الشاعر / زيد بن وازع الظلافيع الجرابيع القحطاني