خمس النصايح
الكلمه اللي تجرحك من رفيقك
راحت ويلقفها طريق السلامه
دامه على الدنيا طريقه طريقك!!
فـ ان طاب راسه ما يضرك كلامه
والمجلس اللي هرجته في صديقك
يلحقك منّه يا السنافي ملامه
يمّا تنشّف لجل عيناه ريقك
بالذبّ عنّه.. يا تحوش الندامه
واحذر رفيقٍ مزحته ما تليقك
يمزح معك من شان يرفع مقامه
لوّك تقول انّه بحسبة شقيقك
معليه.. لكن لا يمس الكرامه!!
واللي ليا شافك.. فلا هو يطيقك
خلّه يروّح.. لا اتّنشّد علامه
واليا لقيته لا تورّيه ضيقك
سلّم .. واذا سلّم .. فرد لسلامه
واللي عن اهدافك يحاول يعيقك
هذا عدوّ لك تحذّر سهامه
حذراك لا تعطيه فرصه يذيقك
كاس الفشل.. بسم الغلا والشهامه
__________________
الحمد لله