صح لسانك وبيض الله وجهك واستلم مني وصية :
ما كل من يركب على الخيل خيال ¤¤¤¤¤
ولا كل خيل تعجبك هي اصيلة
ولا كل من يعجبك هرجه برجال ¤¤¤¤¤
بعض العرب ملسون ويدة بخيلة
الكل يلبس ثوب وشماغ وعقال ¤¤¤¤¤
وعند اللزوم افعالهم هي قليلة
الرجل تثبت له اقاويل بافعال ¤¤¤¤¤
لاقال شي ونفذة هو دليلة
والرجل لاشفته مع القيل والقال ¤¤¤¤¤
ابعد هذا صفاته عليله
والكذب خله عنك ما فاد لو طال ¤¤¤¤¤
قول الصدق ياصاح غنم وجميلة
وخلك شجاع وذي صفات للبطال ¤¤¤¤¤
خلك معه وان مال دور بديلة
واصبر ترى الدنيا تبدل بها احوال ¤¤¤¤¤
وما كل صافي تشوفة تجيلة
وبعد الكدر تشرب صفا عذب وزلال ¤¤¤¤¤
هذا زمان فيه استقامة وميلة
وصاحب خليل لوا جفا الوقت ما مال ¤¤¤¤¤
ترى الجل يعرف بقيمة خليلة
واقفل على سرك بكتمان واقفال ¤¤¤¤¤
بعض العرب يسمع وينوي بحيلة
وخلك امين اذا توليت الاعمال ¤¤¤¤¤
من خان يوم الحشر يا حليلة
خل التواضع فيك واضح بلافعال ¤¤¤¤¤
ترى الكبر يردي بيوم وليلة
ولا تحسد اللي عنده مال واعيال ¤¤¤¤¤
واش ينفعك لو كان حسدك يزيلة
ولا تزور تقلب الزين بطال ¤¤¤¤¤
الله عليم بالنوايا الدخيلة
وخلك رزين ترى المخفة للاطفال ¤¤¤¤¤
واصفح عن المخطي ولوا زاد قيلة
واحمل همومك ولوا تزن وزن الاثقال ¤¤¤¤¤
بكره تروح وتنجلي لوا ثقيلة
وصل الفروض ولا تنسيك الاشغال ¤¤¤¤¤
محدن في الدنا درى وش بقيلة
وزور الاقارب للرحم كون وصال ¤¤¤¤¤
وخلك عظيم الشان وسط القبيلة