[poem=font="simplified arabic,6,black,normal,normal" bkcolor="transparent" bkimage="" border="none,4,gray" type=2 line=0 align=center use=ex num="0,black""]

يقول الملاطي قاف والقاف له مطواع=ولايختلف لاقام يبدع قوافيها
تفكرت واثر الفكر له بابٍ ومصراع=ومن يخطي الافكار يخطي مراميها
وانا بعد ما فكرت قلت الرجال انواع=ولو كانت ثياب الكرامه تغطيها
ولا يستوون بلبسة الثوب والاطباع=ولا يستوون بمرجلتهم وما فيها
ومنهم رجالٍ مثل وصف السباع سباع=تنومس بفزعتها ونفخر بطاريها
سواليفهم بالطيب تشهر مع الارياع=والاخبار عنهم تفخر براس راعيها
ومنهم رجالٍ تنقر العلم والاسناع=وتبذل جهدها بس تخطي هقاويها
تحاول جهدها بس ما تا صل المرباع=والى جابت اخطا عودت في مقاديها
وبعض الرجال سوات الامراض والاوجاع=عسى الله من عسرات الامراض يشفيها
يحسب انه مقدم على الناس فالاطباع=وهو فآخر صفوف المراجل وتاليها
يحسب انه الشبعان وان الرجال جياع=وعلته للعقال بانت مواريها
ترى فيه رجلٍ ماينومسك فعل ذراع =ضعيف الهقاوي ما يعبر مباديها
ليا احسنت له باعك وهو للخوي بياع=وتعطيه جزلات المراجل ويفنيها
وبه رجل لامنك تعزويت به شعشاع=ينومسك في فزعته لو كنت تبغيها
لكنه يمن بها بعد شغل المذياع=يسولف بها مع كل ناسٍ يفاجيها
وبه رجل يفزع لك وآلاخر ماهو فزاع=وبه علةٍ ماحدٍ بيقدر يداويها
وبه من لبس ثوب الصداقه وهو خداع=والاحقاد في قلبه تبين مواريها
وبه رجل لاشافك شكالك وهو رماع=يكثر شكاويه ويطرق مماشيها
وبه رجل للدنيا وللمرجله جماع =لكن في لزومك تقصر ايده ويرخيها
بخيلٍ على الدنيا ولو جات بالاجماع=يكدّس فلوسه بس ما هو يزكيها
وبه رجل في فقرٍ ويغرف لها بالصاع=ولا يحسب حساب الخساير ويعطيها
ورجل لامن جاه اجنبي يبذل ونفاع=ولو جوه ربعه صك دونه ملاويها
وبه رجل متصيقر على ربعه وطماع=يحسب المراجل في علومٍ يسويها
وهو فالردى والذل والمحقره خماع=سواة الثعاله يوم تظهر خوافيها
وبه رجل لامنك زهمته يطيح بساع=كما خرقةٍ لاهبت الريح تسفيها
قليل الحلايا ما يذريك فالافزاع =ضعيف الهقاوي كلمته ما يبديها
معى حرمته تلقاه مستانس وسماع=والى شاف الاجواد انحصر ما يقريها
وبه رجل مخذول ولسانه بعد لذاع =عسى علته في وسط بطنه مماريها
وبه رجل ضايع وان ذكر قيل والله ضاع=عسى الله يرده عقب غيبات يبطيها
يقولون المعرفه لها شاجعٍ ينزاع=مثل حرٍ منزله في حجا مراقيها
لامنه حضر يبت فوق الجميع شراع=وسد اللزوم اعن الجماعه ونا بيها
وختام القصيده للاوادم كثير انواع =ولوكانت ثياب المراجل تغطيها [/poem]