اللي بليا ربع واعزّا له
ما فيه ظلمٍ عابرٍ ما طاله

يرجع على دنيا الفلس يشتمها
وبيت المذله صايرٍ مدهاله

لي كبرت ظنونه وقلّوا ربعه
قام ايتمشى في العروق الحاله

مقدام لكن واجب يحسبها
يحسب حساب الحمل والشيّاله

ايجالس همومه ودمعه راهي
ويذوق حتى الغبن في فنجاله

يا وجد حالي لي لقيته ساهي
حط الحواجه كلّها ببياله

اقول له عان الدلال قبالك
ويقول حمل الوقت ما نحتاله

مصيبته يا كبرها في عينه
لي لد عينه في عيون اطفاله

لابد يلحقهم صلف شايبهم
لو هو عقيمٍ يمكن انْه اشلاله

هذا وهو ما قد شكا لي وضعه
يخاف ينقص عندنا منزاله

قريت في عينه كلامي هذا
وقلته وهو في ذمتي ما قاله

__________________
الحمد لله