محمد الفهيد الروقي من عتيبه وقصة زواجه على مطيره

توجه محمد بن فهـيد الروقي العتيبي الى قرية ( قصيبه ) ليحضر بعض الغريس وبعض انواع النخيل وفى الطريق جلس هو وأخوياه لتناول الغداْ وكان غداهم عبارة عن قرص مدهون بالسمن وكان بقربهم امرأة ترعى بغنمها لا يعرفونها قدموا لها قطعة من القرص ولكنها رفضتها , فتركوا لها القطعة على شجرة وذهبوا وبعد شهر رجعوا من نفس الطريق ووجدوا قطعة القرص فى مكانها لم تلمسها فتعجب ابن فهيد من أمرها وكيف شـامت نفسها مما يدل على أنها من بيت رفيع , فسأل عنها فـأخبروه انهـا بنت بن سبيله من عبده من قبيلة شمر , فخطبها وتزوجها وبعد الزواج ولاها كل أمور الطعام والضيافة...وفي يوم من الايام لفا عليه ابن سليم من عنزه ومعه خمسين رجلا فجلس معهم طيلة الوقت ولم يتحرك صاحب الدار من مكانه حتى قلط الغداْ... وبعد عامين مر ابن سليم ومعه خمسة من الرجال على ابن فهـيد ولكن ابن فهيد على غير عادته فكان يجلس عندهم ثم يذهب الى داخل الدار ويرجع يجلس شوي ويذهب الى داخل الدار وبعد أن أكرمهم قال ابن سليم : يا ابن فهيد أنت مختلف عن أول كنت فى السابق تجلس ولا تقوم من مكانك حتى تقلط ضيوفك والآن كل شوي تدخل وترجع وش السبب؟ ..قال ابن فهيد أنا اقول لك : زوجتي السابقه توفت وزوجتي الثانية ما تعرف تدبير البيت الا لما اقول لها سوي كذا وسوي كذا ..


ومن ثم أنشد هذه القصيدة :

أطلب عسى الجنه منازل "مطيره"
حيث انْ بها طبع ٍ على البـِيض ما صار
ما معجبن زينه ولو هي نظيره
قصدي تنومسني الى جَون خطـّار
مع زينها الوافي بها زود سِيره
دبْره وعرْف وكل شي ٍ بمقدار
لا جَو على هجْن ٍ من ارض الجزيره
تعومسوا عنـْهم ردييِّن الاشوار
إنْ جيت للمطبخ الى فيه نـِيره
تلقى الحطب عندها تقل شغل نجّار
ماهي مثل هالدعله المستديره
يجي العتيم وطامي القدر ما فار
يا دْلاك وين اللي خطاها قصيره
من جيّته ما قط طلـْعت من الدار
يا عنـْك ما يسمع نباها قصيره
وْلا قط شفت الغيض منها والاكدار
إلاّ ومعْ قصْرة اخطاها ستيره
جتنا وراحت ما سمع صوتها الجار

__________________