بسم الله الرحمن الرحيم
(هو ... وهي ... وهم ... وماذا بعد؟؟!!)
هو:
أحبك .. والله العظيم ما اقدر انام الليل حتى أسمع صوتك.. حياتي قلبي روحي ..انا مش عارف من غيرك وش راح يصير فيني ..احس احلامي كلها تحققت من يوم عرفتك..تكفين اجبري بخاطري سولفي لي غني لي قولي أي حاجة..
وربي انك كل شي في حيااتي..
ياغلاهم كلهم ..يابعدهم كلهم..
اه هني اللي يشوفك ويسمع صوتك ويعيش معك،، احسه عايش في نعيم..
حبيبتي تكفين تعبنا من كثر الكلام ابي اشوفك
اتحدث معك،، افضفض كل اللي بقلبي لكـ..
احس انتي الوحيدة اللي راح تفهميني..
ماحد راضي يفهمني..احس اني عايش بغربة..
احبك احبك احبك احبك ومو احبك بس الا اموت فيك ،، بس لوتفهميني بس ،، راح تعرفين حقيقة حبي ليك ..تكفين تكفين..
......
هي:
ليش حبيبي تقول كذا ..حرام عليك قطّعت قلبي..
انت مش عارف انت وش بالنسبة لي انت دنيتي كلها ..
والله انا محسودة فيك..
واو قلبي حرام عليك ماتقول كذا بعدين..
فديتك...
خلاص كل اللي تطلب مني راح اعمله من عيوني بس المهم ماتتضايق وماتزعل..
والله ماتهون علي فديت روحك يالغالي..
ياربي متى تتحق امنياتي بس..
احس اني طايره في السماء من الفرحه...
حبيبي كلمني اليوم..
حبيبي ارسلي رسالة اليوم...
.............
(يامسكين ... يامسكينه)
......
المهم :
هم اصحابه اقرابه:
وشفيك نحسك متغير علينا هاليومين
عسى ماخلاف..
هو: لا والله بس تكفون وقعت..
هم : كيف ..
هو: حبيت ومو أي وحدة "على فكرة هو ماشافها اصلا"
هم : افا قم بس قم السهرة بتفوت خلك من الخرابيط ذي...
هو: انتو دايم كذا ماتبون تفهموني ياناس اقول
حبيت ..عارفين اش معنى حبيت..
هم : يااشيخ احنا اللي مانفهم طيب يامستر: حبيت .. وش ناوي بعد هالحب ان شاء الله زواج صح ...بس لاتنسى تعزمنا <<هههههه
هو : يووووووه زواج ايش ياعم...
اقول حبيت تقول زواج...
هم:ليش وهم مايقولون نهاية الحب بالزواج...
هو: ليه شايفيني امثل فلم انا ووجهي ..
والا نسيتو انا ولد من؟!
هم : يادين الله ..نبي نسالك بس سؤال واحد ياقيس زمانه... وش يمنعك ماتتزوجها..
هو: والله اذا سالتوني يمنعني اشياء كثير...
انا لما ابي اتزوج ابي وحدة موكل يوم على سماعة الجوال والا على نافذة المسن...
بعدين يامجانين انا وش يدريني انها تكلمني انا لوحدي..ماهي يمكن تكلم معي الف واحد..
انا بس ابي اطقطق معها احبها تحبني
اهديها اغنية تهديني...
المهم تسولف معي بنت وتجبر بخاطري..
اصلا لوانكم سمعتو صوتها وهي تغني لي
ماقلتو هالكلااااام...
لكن الزوووجة غير ..والا نسيتو ان وراي تربية العيااال ..
بالله عليكم اقدر اعتمد على وحدة كلمتني قبل الزواج ومن ورى اهلها << تربي بناتي...
هم : خلاص خلك زي منت بس انتبه تطب في الغلط تكفى..والله مافيه فايدة من الكلام معك...
.............
الحبيبة بتاعة رسائل الجوال والمسن
تفخر امام زميلاتها في الجامعة او صديقاتها من الجيران اوغيرهم..
وتقول:
حليلكم والله انتو عايشين في جحيم
انا ما اتخيل نفسي بدون واحد اسولف معه افضفض كل اللي بقلبي له...
بنات ترو الموضوع سهل ياتنزلون الايميل في الفيس بوك والتويتر وغيرها او تشوفون لكم كم منتدى كذا حلو
ومع الايام راح تكتشفون انكم حبيتو بجد..
والله الحب كل شيء في الحيااة (معك حق بس مو كذا)
انا ما اتخيل نفسي بدون حب..
المهم..
هم : اشفيك انتي ماتخافين؟
هي: واخاف من شنو كلها اتصالات ورسائل
وحتى اسمي الحقيقي مايعرفه..

هم: بس لو حسيتي انه من كلامه يبي يتزوجك اش موقفك لو دروا اهلك بعدين انتي بتوافقين...
هي :هههههههههههههههههههههههاااي
والله انتو على نياتكم...
زواج ايش<< نفس الفكرة..
هذا يكلم غيري الف اش معنى انا اللي يتزوجها ..
هم: وانتي اش دراك...
هي : ياحبايبي انا اصلا عرفته من النت /الجوال
وبعدين..
هو مايعرفني اصلا .. بالله عليكم فيه واحد مجنون بيرضى يتزوج وحده بس تراسله على الايميل والا تكلمه في الجوال...
وهو اصلا مايعرف هي حلوة والا لا..
هي ست بيت والا لا...
هي دينة وفيها اخلاق والا لا...
وعلى طاري دينة...
حتى لو كانت دينة صدقوني ماراح يقتنع به الفكرة.. مدام كلمته من ورى اهلها ...
هم: اجل وشو له هل الحب..
صدق بلا حب وبلا وجع قلب...

هي : ما الومكم..
اصلكم ماسمعتو صوته وهو يكلمني..
ولا شفتو صورته اللي حاطها في المسن/المنتدى
صدق بيجننننن.....
ولا قريتوا الكلمات والخواطر والأشعار اللي يرسلها لي...
انتو اصلا اش عرفكم بالحب من اساسه...
هم : بس بجد لو وافق يتزوجك بتزوجينه...
هي: والله مو انا بنت ابوها اللي ترضى تنزل راس ابوها وتوافق تزوج واحد مثل ذا
ياخذ معها شهر وبعدين يطلقها لمى يسمع صوت وحدة ثانية تكلمه احلى من صوتي..
هم : اجل خليكي زي منتي ...بس المهم تكفين لا تطبين في الخطا وتفضحينا ...
...............................
ياناس ياعالم ياهووووه وبعدين معكم
انا الان اللي اكلمكم
ياشباب يابنات...
تكفون مو كذااااا
تعبنا من الكذب على البعض...
خلوني اقولكم وش نهاية هذا الحب :
ثلاث امور:
ا/ ينتهي زي ما بدا ويروح كل واحد عن الثاني
وهذا الأمر اهونها ولو ان هناك عدة سلبيات فيه وهي:
• ذنوب تم ارتكابها نسال الله العافية..
• حسره بعد الفراق وربما تكبرعند الزواج فالزوج يريد ان يكون تفاعل وكلام زوجته مثل حبيبته السابقه والعكس صحيح..
• ضيقة في الصدر ملازمة والحب يفعل هذا صدقوني يفعل هذا
2/ ينتهي هذا الحب بزواج ولو ان وجوده قليل ولكن هذا الزواج ينتهي بامرين:
• طلاق
• هم ابدي ونسيان للحب الفائت وخوف قسري من كلا الطرفين..
لان الوضع سوف يكون هكذا:
هي : البارح تاخرت ليه فين كنت فين
لا تكون عادت حليمة لعادتها القديمة،،،،
اشوفك صرت ناسي حبنا فين كلامك فين هداياك ياخوفتي انك طبيت مو غريبة ذيل الكلب عمره ما ينعدل..
وووووو....وووووو
هو: وبعدين خلاص ذبحتيني طقيتي كبدي،،، وبعدين تعالي اشوفك اربع وعشرين ساعة على اللابتوب وش هالمنتديات الكثيرة اللي انتي مسجلة فيها ،،، وبعدين تعالي وشفي شحن الجوال الجوال كل يوم يخلص ،انتي من تكلمين، اعترفي انتي من تكلمين كل هالمكالمات...
هي : والله اذا انا على المنتدى فمن الفضاوة اصلي ما اشوفك الا ساعة وساعتين في اليووم...
وبعدين تعال انا احسن من اللي واضع ايميله بالخط العريض على الفيس بوك والتويتر... ولا كمان فاتح صفحة على النت لوق..
هو : وياربي وبعدين انتي مش عارفه انا عندي اشغال اشغااااال ...
المهم والله ان الحياة صارت تنعاف معك...
انا وش اللي وهقني وتزوجتك....
ووووووو....
وهذه حياتهم (خوف قسري)
3/ ينتهي هذا الحب بفضيحة ونسال الله العافية وهذا اكثر الامور الثلاثة حدوثا.
..............................
صراحة تعبت وانا اكتب...
تكفون ياعالم...
والله ان هذا الكلام..
(من القلب الى القلب)
هذا هو حال الكثير من شبابنا وفتياتنا
في مجتمعنا الخليجي ...
حب كذب في كذب....
نعم راح اقولها بالفم المليان
(الحب قبل الزواج كذب في كذب)
كفاية نضحك على انفسنا قبل نضحك على بعضنا....
هذه رسالتي الى الجميع كانسان قبل ان اكون شاعر اوكاتب....
....
ولكن عندي رسالة الى نفسي كشاعر
والى الشعراء والكتاب
والى الانسان الذي يستمع للكتاب والشعراء...
.......
رسالتي تتضمن مايلي:
الكلام في الحب من شعر او خواطر او قصة او رواية او مقالة اوغيرها...
ليس عيباً ...
ان فهم كيفية التصرف فيه...
لايستطيع الشاعر اوالكاتب منع نفسه من الكتابة في الحب والغزل....
ولكن ليعلم الجميع ان هذا الكتابة رسائل
يجب ان تستغل الاستغلال الامثل...
انت ايها الانسان او الانسانة
الذين تسمعون مثل هذا الكلام
الذي تنبض له القلوب...
لا تحسبوا الشعراء والكتاب اولي عشق وغرام وهيام...
ليس عيبا ان تحفظو هذا الكلام عن ظهر قلب وتعجبوا به..
ولكن يجب ان تعرفوا متى تتحدثوا به..
وهذا عندما تحصلو على الحب الحقيقي والذي يكون بعد الزواج...
امطروا احبتكم بهذا الكلام الجميل..
ليلا نهارا ولكن بعد الزواج...
فهنا تكون المحبة الصادقة النابعة من القلب....
لا تكسبوا الشعراء والكتاب الآثام باستغلال ابداعهم في حب زائف..
هم لايرضونه لكم قبل ان ترضوه لانفسكم...
......
اما انتم ايها الشعراء والكتاب
أنا شخصا منكم واعلم انكم لن تستطيعوا
التوقف عن الحديث في الحب والغرام...
فهذا ديدن الشعراء والكتاب من عصور مضت...
ولكن اعلموا ان ماينطبق على غيركم ينطبق عليكم...
انتبهوا ان تستغلوا ابداعكم في حب زائف...
لا يمنع ان تظهروا الابداع قبل الزواج...
ولكن يُمنع ان تستغلوه قبل الزواج في حب زائف نهايته كما ذكرت سابقا.
.....
واحتسبوا الأجر اذا كتبتم فلربما بكتابتكم
تم التأليف بين قلبي زوجين قد طال الفراق بينهما....
.........
رسالة اليك انتي يا(هي):
انتبهي ان تقولي انا معجبه بالشاعر او الكاتب الفلاني...
ولكن قولي:
أنا معجبه بشعر الشاعر الفلاني..
او كتابة الكاتب الفلاني...
لان الإعجاب قد يتطور الى اكثر من ذلك...
وكثيرا من الشعراء والكتاب لا يريد
ان يكون سبباً في دمار حياة انسانة ما.
.....
ما ينطبق على (هي) ينطبق
عليك انت يا (هو)
اذا كان الامر يتعلق بشاعرات او كاتبات.
....................
أخيرا:
لقد كنت مقتنعا بنظرية (الحب قبل الزواج)
ولكنني غيرت قناعتي تماما
وليس عيبا ان يغير الانسان قناعاته
اذا كان يرى ان التغيير
يكون من الأسوأ الى الأحسن...
لا أريد منكم سوى الدعاء لي بالتوفيق
والثبات.. وهذي دعوتي القلبية للجميع
بالصلاح والتوفيق والسداد والثبات..آمين
ورسالتي هذه اعتبروها (من القلب الى القلب)
أخوكم:
فهد محمد آل هبّاش القحطاني،،
6/6/1432هـ
......