ما يبرد حرة القلب هبات الشمال !!
السلام عليكم و رحمة الله و بركاته
اسعد الله أوقاتكم بالمسرات
[poem=font="Simplified Arabic,6,darkblue,bold,normal" bkcolor="transparent" bkimage="" border="none,medium,gray" type=2 line=1 align=center use=sp num="0,black"]
ما يبرد حرة القلب هبـّات الشمال=حتى لو هبـّاتها من ثلوج و من جليد
كل ما هبت علي زادت النار اشتعال=حسـّها مثل الهوا لاصفق خضر الجريد
في خفوقي و المحبة مثل نسج الخيال=تربطك مع من تحبه ولو داره بعيد
اتصال الروح بالروح مافيها حبال=المشاعر تلتقي و الموده فالوريد
يا خليط من الترف و النعومه و الدلال=يا نسيم الصبح. والورد. و الطلع النضيد
ياخرافات الروايات. يا أجمل مقال=يابتسامات الطفوله. يافرحة كل عيد
لو شفاتك سحر هاروت والسحر الحلال=لو عيونك سيف عنتر وسيف ابن الوليد
اشهد انك لذة النصر من بعد القتال=لالقيتك و انقطع كل شرط وكل قيد
اعشقك عشق التجارة من شيوخ الريال=في زمان ٍ يحكم المرجله قدر الرصيد
واعشقك عشق البدو للخيام وللرمال=في زمان ٍ راس مال الكفو رأي ٍ سديد
جيت يمـّـك ناوي آخذ من احلامك مجال=واتغانم ما بقى واحيي الحظ السعيد
واكتشفت اني مثل من يبي لمس الهلال=وانصدمت بواقع الود والعلم الاكيد
وش بقول ان صارت الأجوبه مثل السؤال=و ان ذهب هم ٍ قديم ٍ بدا هم ٍ جديد
غربلتني رحلة الوقت و حمول الجمال=و المسافات الطويله و شرهات العبيد
في ظروف ٍ عيت تشيلها متون الرجال=شلتها من قوة العزم و الباس الشديد
اي نعم. لا ما استغثت بعمام ولا خوال=لا وقفت تقول كني على الدنيا وحيد
لي طموح. ولي شموخ مثل شم الجبال=والليال تدور. والوقت ياخذ ما نريد
وانتي أغلا مابقالي و حكيك لايزال=يستثير العاطفه واسبك بيوت القصيد
مادريت ان الهوى ضيق صدر و بري حال=و الموادع مثل نار ٍ يذوب بها الحديد
ودي اقول الحقيقه ولا فيها جدال=اسمعي مني الحقيقة عسى عمرك مديد
مايبرد حرة القلب ياكود الوصال=ان بغيتي زبدة الهرج و العلم المفيد[/poem]
و سلامتكم
أخوكم مبارك بن حاضر
.