أخوي وتد جزاك الله خير المشكلة إنك يوم تجئ تناقش تصرفاتهم مع المسئولين عنهم من ضباط يقولك لا تلومهم كل ذا التصرفات ويقول لا تلومهم ..
أخوي خذ ذا القصة اللي صارت معي شخصياً :
كانت معي سيارة لوحاتها خليجية وطالع معي عيالي إثنين صغار سن وزوجتي و قوفتني سيارة مرور وخذا العسكري إثباتي وقال ممنوع إنك تدور بسياره لوحاتها خليجيه أنا الحقيقه ما ادري هل فعلا فيه نظام كذا وإلا مافيه قلت خلاص يابن الحلال أنا والله ما ادري و إن شاء الله أشوف حل لموضوع ذا اللوحات قال الحين تلحقني للمرور قلت الحقك ليش؟قال علشان نحجز السياره و انت تروح بعدها لبيتكم قلت وعيالي اللي بالسيارة وش أسوي بهم قال صرفهم شف لهم حل أو وانت في الطريق إتصل على أحد من جماعتك ويجئ يأخذكم من عندنا قلت والله لأني بمتصل و لأني برايح معك و أنت مع إحترامي لك اللي تقول خذ زوجتك وعيالك و إلحقني لإدارة حكومية ما فيك خير وأنا بتحرك الحين وبروح أودي عيالي للبيت و بعدها أرجع أتفاهم أنا و أنت قال ترى ببلغ عنك إنك هربت منا قلت وشلون أهرب وبطاقتي معك وجالس أتكلم معاك ساعه قال المهم لا تكبر المشكله والله أنا إرتفع الضغط عندي قلت والله لأروح و ماني بمودي عيالي لمرورك لو تنط وتوقع و اللي تبي تسوي سوه و أقسم لك بالله إنك لو تحاول تكبر المشكله إن تنفجر على رأسك و إلا تراني مثلك ... وحركت من عنده وهو واقف يتفرج فيني . مالك بتطويلها انتهت المشكله بإعتذار منه وكالعادة لا تلومنا من الضغط اللي نشوفه..