المشاركة الأصلية كتبت بواسطة حسين الحارثي

اخواني واخواتي
مراقبين ومشرفين واعضاء هذا الصرح الشامخ
السلام عليكم ورحمة الله وبركاته وبعد
اليكم هذه القصيده المتواضعه وارجو ان ترقى الى ذوائقكم الرفيعه.
.



[poem=font="Simplified Arabic,5,black,bold,normal" bkcolor="transparent" bkimage="" border="none,medium,gray" type=2 line=1 align=center use=ex num="0,black"]
مادام حظي سن رمحه وسيفه=وكمّل لباس الحرب والشر ناويه
الدررع والخوذه وعِمه كثيفه=والطاس واحزامه وبصطار رجليه
واسرج مهارٍ كلبوها عسيفه=تطرد وتحرف دون صيحه وتوجيه
وجمّع عتاده للحرايب وقيفه=من الحظوظ القشر قيفٍ يحاليه
صمٍ وبكم وبعض عور وكفيفه=لا والبلا قيفه كفيفٍ يقديه
ماهو حليفٍ لي ولاني حليفه=يلقى من العربان غيري يخاويه
من صد عني من مزاجه وكيفه=والله ليبطي عظم مارحت اراضيه
مادمت وافي والنوايا شريفه=وش يزعله مني وينفخ علابيه
رزقي على المولى وثم الوظيفه=والراتب اللي باخر الشهر نرجيه
ان كان قول الحق عيب وكسيفه=الحق قوله لو على النفس مااخفيه
من غط كلمة حق عمره حسيفه=لاطايعٍٍ ربعه ولاطاع واليه
وان كان طيبي في مراح ونكيفه=يحسب ضعافه عند من لايسويه
الطيب وهبه والجمايل كليفه=ماكل رجلٍ ياخذ الطيب يعطيه
طيبي موَرثه السلف في خليفه=من جيلٍ اول وارثه صار تاليه
ماهمني قوم العقول الخفيفه=اهل الطمع والحسد والكبر والتيه
الكبر طبعٍ للنفوس الضعيفه=اللي تبيع الخير والشر تشريه
من لايخاف الله حياته مخيفه=لاتامنه لوقدم الشحم بيديه
يبا الشداد اليا وضعته رديفه=بالضحك والحيله وحقدٍ مخفيه
اما تجي حَسَب ربيعه وصيفه=والا يحملك العتب والمشاريه
اعوج ولاينفع نديمه وليفه=ان مالقا عنده مصالح تسليه
دنياه بعد الوسع تصبح قصيفه=اقصف من القبران تقصَّف براعيه
عقب اتصاله كل ساعه يعيفه=يقطع علاقاته وينسى لياليه
وجدي على اللي كالجبال المنيفه=بيض القلوب وعز منهو تماشيه
اهل الصفا واهل النفوس العفيفه=واهل الوفا واهل النقا ماتخليه
واهل الكرم واهل العلوم الطريفه=واهل التقا والطيب متمسكه فيه
سعد الخوي والجار يعنى بضيفه=ان غاب مافكر بظيفه وعانيه
وجدي عليهم فالسنين الحفيفه=اللي بها الخوه مصالح وتمويه[/poem]