[poem=font="Simplified Arabic,6,black,normal,normal" bkcolor="transparent" bkimage="backgrounds/7.gif" border="none,4,gray" type=1 line=0 align=center use=ex num="0,black"]
يا الله يا مرسل تباشير وإنذار=يا اللي ما يخفى عنك مثقال ذره
تجعل لنا حظ مع الناس الأبرار=فان الحظيظ اللي بفضلك تبره
أنت الكريم المعطي النافع الضار=واللي تنوشه رحمتك ما تضره
من جرب الدنيا تجرعه الأمرار=ما مر شمطان النواصي يمره
نرتاح مر ونفقد الراحة أمرار=وتمرنا الأيام حلوه ومره
يوم بيوم وعادة الوقت دوار=ولا كل من غاص البحر جاب دره
يا الحاضر الغايب سلامات الأسفار=غيرك صواديف الليالي تفره
يكفيك موجز عن تفاصيل الأخبار=كل الوطن طفنا ببحره وبره
لا نخفي أسرار ولا نكشف أسرار=وعلومنا من سمع فيها تسره
عشنا في الدنيا على الفطرة أحرار=وأقدامنا تمشي على الأرض حره
نتعب ونتعبها على كل مشوار=وحنا القدر نؤمن بخيره وشره
نصبر ولو تحدنا النار للغار=والصبر حكمه والجهالة مغره
ونربط علاقتنا مع كل مغوار=اللي دروب المرحلة ما تغره
نختار بعض أنفار عن جملة أنفار=اللي لهم بالطيب كره وفره
وان اختلفنا بالنوايا والأفكار =كل يعود ماه في مستقره
ما تستوي رفقة فقارا وتجار=خمسة كواكب ما تسعها مجره
واللي يبي يختار له حق يختار=أما يهد الحبل وألا يجره
وأنا ليا شان الوفق والدهر جار=ماني على ما قيل قصاص جره
يسوقني سوق الجمل دمي الحار=لا ونست في قلبي من الهم حره
ما تستر من أهل المشاريه الأعذار=والله ما يخفاه مثقال ذره


عبدالله المشعلي[/poem]