[poem=font="Simplified Arabic,4,black,bold,normal" bkcolor="transparent" bkimage="" border="none,medium,gray" type=4 line=0 align=center use=ex num="0,black"]
ابتدي باسم المهيمن رافع السبع الخبير=العظيم اللي بيوم الحشر يحشرنا عراة
كافل ارزاق الخلايق من غني ومن فقير=الكريم اللي جعل الاسلام نهج للثبات
ابتدي به غصب عن من قال ذكره ما يصير=يبتدا به يوم ذكره بالبيوت الماضيات
بعدها يا غيم فكري سيل الوادي الكبير=عل سيله يحي الابداع بامخاخ موات
اجعله سيلن غزيرن يسمع لجريه هدير=غزر سيله غزر نيل أرض الكنانه والفرات
يجرف اللي ما يفرق بين أشعار وشعير=كل من بدل جزال الشعر بأشعار الحتات
خاين عهود الفضايل تابع طبوع الحقير=مستخف بالعقول اللي أهلها في سبات
ناظم شعره على فجره ولا عنده ضمير=يرضي الفجار ساس العار أهل المعصيات
يرسل القيفان والشيطان له فيها خشير=يغوي الجهال كل ما قال له ابليس هات
تحت تعبير الحداثه يجعل الماكون طير=ويقلب التاريخ والعادات والاربع جهات
يسمح لنفسه ببدع أبيات تدخله السعير=ويتغزل فالحبيبه بأفسق أنواع الصفات
غادي للفسق والاسفاف والهزله سفير=كل ميدان يطبه تنعدم فيه الحياة
جعله افدن للسديري والنصافي والمدير=الحبابي والسبيعي اهل سبك المحكمات
تل قلبي تل قلب اللي فقد ابنه صغير=ناطره عشرين عاما من بعد عشرة بنات
داسه المسكين بالموتر وهو توه يسير=ما درى به لين سمع لعظم راسه قرطبات
تل قلبي من زمان يعتبر الاسلام ضير= جل ابله شفتها صوب الرذايل سارحات
جيت ناصح غير فاضح ارتجي للناس خير=انصح الجنسين منهم مسلمين ومسلمات
تمت القيفان والمذكور للعاقل نذير=يتوضأ كان في نيته يمشي للصلاة
وختمها صلوا على اللي أرسله ربي بشير=عد ما ضوت حداثتهم بيوت خاملات[/poem]