العقل بيت شيوخ والحلم جاسوس
النفس .. يقطع من تركها ثواني
خذني وطلعني ولو الهوى كوس
اباتنفس شي صافي و هاني
داخل تصادم فكر و مزاحم نفوس
على فتافيت الغوى و الغواني
في هاللوبي كل شي ضايع ومعكوس
ماكن في هالكون رب وأماني
أثاثه الغامق و تصفيفة الكوس
تدل على ذوق راقي و داني
شفهم وشف كيف الفشل يجعل الروس
أشياء كماليه مابين الأذاني
وشف كيف هذا ثمل ويعثر ويدوس
على مسمى .. جده الأولاني !
وشف كيف هالشايب برغبته محبوس
تحت شعار إن آخر العمر فاني
أحس عنده عيله وبنت(ن) عروس
تخجل من ابوها كثير و تعاني
وشف هالجمال اللي مدثر ومحيوس
مثل الكلام اللي بليا معاني
فتاه تعرض جسمها الغض بفلوس
ويبيعها فاليوم عشرين زاني
وشفت الثنين هناك تراهم جنوس
إرجال .. بس رجال من نوع ثاني
ضحايا نفط وقل طاعه وناموس
والأم كانت طيش .. والأب اناني
كل الزوايا طافحه قبح ونجوس
تسبح وفالركن الأخير المواني
واحد يغني وعنده حثاله جلوس
كأن مافي هالحياه إلا أغاني
ياوخز قلبي وخزة الجرح بالموس
ياعالم(ن) مافيه حلم و تفاني
في هاللوبي مافيه ريس ومريوس
الكل بايع نفس والكل جاني
والكل عنده عذر واهي ومدروس
لوقلت ليه انته كذا قال اعاني
أنا اللي أعاني من القوس إلى القوس
هذا ماهوب جوي ولاهو مكاني
بركض وابي يركض معي ألف فانوس
إلى صباحات الغلا و التفاني
روح معي .. والواقع احيان كابوس
وانا ما احط اللوم على زماني
أحمد ربي كل مادق ناقوس
واعرف حدودي واستحي من كياني
واصمت ليا من جا للحكي روس وعسوس
واضحك ولو وجهي من البكاء حاني
لو كل شي محسوس بالفعل ملموس
طلعت آخر جرح بين المحاني
الشاعر / سعد علوش