تعزيه للأخ جعفر بن هادي بن شري وإخوته و المسارده عموما
 

احسن الله عزاكم وتقبل الله ميتكم
الشيخ هادي بن جعفر بن شري


يالله لطفك يـا عزيـز الجلالي
امرك وتدبيرك على حكم الأقدار
ربي ملاذي من هموم الليالي
ترمي لنا الاحزان والوقت دوار
فرقا مياسمها على صلو صالي
عادت طواريهـا على شبة النار
يا تل قلبي من رحيل الرجالي
شيخ ن صميدع له معزه ومقدار
هادي ولد جعفر زبون الثقالي
عسى له الغفران والرب غفار
هادي الفخر ساسه عمام وخوالي
أقولـها بالصدق ما نطلب اعذار
نعم الشجاعه كاسب ن للجزالي
عقله حصيف فالمواقيف ما احتار
يقدح فعوله سيرته للمعالي
كسبه نواميس المراجل والأذكار
مجده مشيد فوق رؤوس الجبالي
ابن شري مذكور مابين الأخيار
اولاد مسرد محتمين التوالي
اهل الرماح ملاعبة قحص الامهار
في ساحة الطولات بين الرجالي
تشهد لهم بافعالهم كل الأقطار
العين تدمع فالضمير اشتعالي
لكن رضانا بالمقادير صبار
باسم آل جمانٍ كتبت المقالي
إلهامنا للحرف مارد ومصدار
لاجل الرفق وخوة كريم السبالي
ثم النسب ياهل الحميا هل الكار
نايف خوي ن مايعرف الجدالي
فيه الخصائل الطيبه سر وجهار
بلغ تعازينا كرام السبالي
واسلم وسلم لي على الربع والدار
الله يجبر كسركم يالغوالي
ورحماك يالله ربنا خير غفار


ناصر ال جمان
برلين