شبكة قحطان - مجالس قحطان - منتديات قحطان

السلام عليكم ورحمه الله

كيفكم ياشباب

والله الاستراحة لها طعم حلو

الواحد ينبسط هنا ....من جد مجلس رائع والبركة فيكم وفي مشرفيه الرائعين

المهم انا الأسبوع الماضي سويت لي مقلبين زي العسل وكان ودي اسولف معاكم واعلمكم

بسم الله نبدأ

الثلاثاء 16 / 03 / 2010 م

واحد من الشباب كان عندة شغل وقال تراي ماني جاي

عاد صرفني من ابو عبدالله

وابو عبدالله هو المدير

قلت رح ولا يهمك

المهم داومنا وعدت الأمور عادي وماهناك مشكله

والساعة 11 تقريبا نزلت للبوفيه

الا وابو عبدالله واقف عند البوفيه وقاعد يسولف مع واحد من الموظفين

عادت سلمت وجلست اسولف معاهم

قال لي وين بدر ماشفتة ( بدر هذا خويي اللي قال صرفني )

قلت وش فيك يابو عبدالله

ماشفتة رافع يدة يسلم عليك وهو طالع مع الباب

وانت سحبت عليه وطنشت

قال متى

قلت قبل شوي

الرجال رافع لك يدة فوق يسلم

قال والله ماشفتة

قلت له : على بالي مارديت عمد ماتبي ترد عليه

قال لا والله بس مانتبهت

ومشى الموضوع زي الألف

لا والرجال داوم يوم الأربعاء والمدير ناداة واعتذر له عن سلامة

وحلف له انه ماشافة ولا انتبه

عاد جاني خويي قال والله يا ابليس بنفسة مايتجرأ يساوي كذا

قلت له واحد يمشي مع علي ال جعبان وابن عياف وابو ريان

وش تبيه يصير ؟

************************************************** *******************************************

الأربعاء 17 / 03 / 2010 م

الساعة تقريبا 11 نزلت من المكتب وقلت بروح اريح شوي

وشغلت السيارة وطلعت لبقاله جنب الشركة

علشان اخذ بايسون ولا عصير طماط

المهم نزلت من السيارة ودخلت البقاله

وخليت السيارة شغاله

وكنت على سيارة الشركة وعليها شعار الشركة

الا شوي ويوقف جنبي فورد قديم شوي

وينزل منه واحد تقول طالع من رمادة

وينط على سيارتي

ويطفيها ويأخذ المفتاح

طلعت قلت له سلامات وش فيك

قال والله لأعلمك يا ملاعين ؟؟؟؟؟؟ مطفين عني الكهرب وانا مسدد الفاتورة

ومن الساعة 7 وانا اطاردكم واترجاكم

قلت ياخوي وش دخلني انا الحين

انا شغال في ادارة ثانيه وذول اللي يفصلون ما اعرفهم ولا ني يمهم

قال كلكم عيال كلب

يابن الحلال

قال اقول وخر وراك

والرجال شكله منتهي ...سجن الحاير مرسوم في وجهه

بغيت أدق على الشرطة ؟ فبتأخر وسالفة وممكن يقول شيء ويقولون تعال للقسم

قلت يالطيب

عندي لك حل

قال وش هو

قلت له انا اعرف مديرهم اللي يأمرهم يطفون ويشغلون

وش رايك لو جبتة لك هنا

قال هاتة ان كنت صادق

قلت بشرط بركبه معاك السيارة وخلك ساكت

واول مايركب ودة لبيتكم وهو بيدق على الكهربائي حقة ويجون يشغلون على طول

قال اوكيه

المهم وادق على واحد من العيال اللي في المكتب

قلت تكفى يا ياسر

قال سم

قلت تعالي عند البقاله اللي جنب البوابة حقت الشركة

قال طيب دقايق وانا عندك

وشوي الا وياسر محضر

المهم رحلت له

قلت تكفى يا ياسر

ابيك تروح مع هالرجال في سيارتة

الرجال هذا أطلبة فلوس ويالله واعدتة وقابلته

والحين يقول بطاقة الصراف حقتة منتهي تاريخها ولا تشتغل

ولا معاة فلوس كاش في جيبه

فقال اطلع معاي للبنك ونسحبها من الفرع وخذ فلوسك

والمشكله ابو عبدالله ( المدير ) ينتظرني الحين

ولو تأخرت تعرف بيقعد يساوي سالفة

قال ابشر ولا يهمك

بس كم المبلغ

قلت 3000 ريال

يالله اركب مع الرجال وهو بيرجعك عند سيارتك

قام ياسر وسلم على الرجال وركب معاة

وعلى طول الرجال شغل ومشى بعد ما عطاني مفتاحي

واطمر وانحاش من جنب البقاله

وثلاث دقايق الا وياسر يدق ويدق ويدق

واسحب عليه

المهم ياسر مارجع للمكتب الا الساعة 2 الظهر

وجاني وهو يضحك ويقول حسبي الله عليك

والله الرجال مافكني لين جو حقين الفصل وشغلوا الكهرب

والبلا كل ماقلت له شي

قال كذاب انت مديرهم يالملعون

المهم طالع فيني وهو يضحك مع شوي قهر فيه

وقال طيب والله لأردها لك زين

قلت يا ياسر انا ماحطيتك في هالموقف الا علشانك

ما تربط حزام الأمان وانت تسوق

قلت لازم اعطيك درس

المهم ياشباب انتبهوا

ولاتنسون تربطون حزام الأمان لا يجي واحد ويوهقكم في شيء

ولا يساوي عليكم مقلب ساخن

الحين ياشباب

انا خايف من سواياي حقت الأسبوع الماضي

فدعواتكم لي انها دائما سلامات وعوافي

تحياتي لكم واستودعكم الله ....يالغالين

------------------------------------------------------------------------------------------

أخوكم / منصور العبدالله ( واااااادي الغلااااااا )