|
الرحله رقم Sv 1696
السلام عليكم ورحمه الله
أولا : كل عام وانتم بخير ( صح متاخره بس مشوها ) ثانيا : ابشركم اني رجعت وبكون معكم ( يعني أبتدا التعقيد والحش ) وبصراحه انا اللي فرحان برجوعي ومن كثر ماني فرحان برجوعي ودي اقوم احب راسي مليون مره لأني مشتاق لي ( لا تركزون يا جماعه ...واحد فاضي ) ثالثا : العلم سلامتكم .....بس وين القهوة والتمر والله كنت في الجنوب عند الوالد وكانوا عيالي هناك والمهم رحت اعيد هناك ومعاهم ....طيب خير وش عندك والمهم حجزت على طيران ناس ولأول مره في حياتي اركب ناس وطبعا مالقيت حجز الا بواسطه واحد من الأتحاد قصدي من الشباب شغال في ناس وراتبه 6548 ريال ( حلوة راتبه ) المهم رحت المطار طبعا متاخر زي العاده ووصلت قبل إقلاع الرحله بربع ساعه بس ودخلت الا والعالم طوابير ويوم شفتها قلت ايه عز الله سافرنا والله واطمر على كاونتر الحجز والناس يقولون لو سمحت يالشيخ امسك سرى قلت اذا عندك سرى عندي خمسين وانا اللي افرش ( من زمان عن البلوت ) وصلت للكاونتر قال ارجع وامسك سرى وما اعتقد تحلق الرحله قلت له ياخوي لايكون موت وخراب ديار قال شلون قلت ياخوي جاي من الساعه 8 وصار علينا حادث واذا مو مصدق اتصل على اي احد واسأله عن الحادث اللي في مدخل المطار وترى خويي اللي وصلني طلع في الأسعاف بس اني لازم اسافر جدتي في العنايه المركزة في مستشفى عسير ( الله يرحم جدتي ميته من تسع سنين ) المهم قلت لاتكون انت والزمان علي قال طيب والمهم طلع كفوء ومشاني وسافرنا بالسلامه ولله الحمد الحين تقولون : هذا مريض ولا وش فيه المهم الرجعه كانت يوم الأربعاء ( قبل أمس ) على نفس رقم الرحله اللي في العنوان على الخطوط السعوديه وكان عيالي معاي وكان الأقلاع الساعه 7:40 مساء وجيت المطار وسلمت السياره وشحنت الشنط ودخلنا الصاله وجلسنا مؤدبين نشرب نسكافيه والعيال جنبنا ياكلون بطاطس بهدوء والمهم جاء موعد الأقلاع وما احد جانا قلت لايكون تضايقوا من البطاطس ..عاد قمت وخذيته من العيال ورميته علشان مايكون علينا حجه ...والعيال يبكون يبون البطاطس والساعه 8:30 اعلنوا ان الرحله بتأخر لحد الساعه 12 وبيكون الاقلاع 12 طيب وش اسوي الحين المهم اروح واستاجر سياره ونطلع من المطار ونروح نتمشى وتعشينا في احد المطاعم ورجعنا الساعه 11:30 وسلمنا السياره من جديد وشوي ويعلنون ان الرحله بتأخر لحد الساعه 2 الله لايوفقهم ونروح للمشرف ولقينا مشرف الدجه حتى كلام مايعرف يتكلم والمهم قالوا تعشوا في الصاله على حساب السعوديه والعشاء عصير أو شاهي مع قطعه كيك لا والهندي اللي يعطي الناس الطلبات شديد يصارخ على الناس هي انت وين هذا تذكره مال طياره روه الرياض انت مافيه جده يبغى عصير هذا بس ولا خلي ولي والله وارتفع ضغطي وقلت مالها الا عيالها رجعت للشباب وقلت ياعيالي ياعيال العون ( وأقصد نواف وريماس أولادي ) قال سم يا بابا ...قلت وجع لاتقولون بابا ...قولوا يبه قالو وش تبي آمر تدلل بس قلت حوسوا المطار ولاتخلون شيء الا وتخربونه وقاموا الذيابه على شجره كبيره جنب كاونتر الخطوط حق المغادره وهذي الشجره موضوعه في وعاء كبير وحولها أحجار صغيره دائريه حمراء ويجونك ويأخذون هالأحجار وينثرونها في المطار وويعبون الأرضيات من هالأحجار ويجي موظف الخطوط ويقول بس ياولد لاتخربون والله وترد عليه ريماس وقالت بكل شموخ وفخر وبصوت عالي يسمعه اللي في المطار : أنت قع وبابا حلو قلت كفوء يابنتي والله والمهم يقوم موظف الخطوط يصيح يقول منهم عياله ذول واسحب عليه ومارديت ويصيح وين ابوهم وين امهم واسحب ومارديت عليه والمهم يقوم ويسأل نواف قال وين ابوك قال نواف هذاك أبوي.... ...الذيب اللي جالس هناك والمهم جاني قال ياخوي ماتشوف عيالك وش يسوون ؟ أمسكهم الله يهديك ؟ شف كيف حاسوا الصاله ؟ قلت الله يهديك انت تبي تمسكهم انت أمسكهم أنا مسكتهم 3 ساعات وتعبت والحين لي 7 ساعات علشان رحلتكم المشئومه مليت وتعبت وزهقت وانا امسكهم... وجاي الحين لكم وجه تقول امسك عيالك ياخوي انتم وين عايشين رحله تتأخر 8 ساعات والوضع عندكم عادي جدا وحنا كرهنا انفسنا وطفشنا وملينا وحنا كبار ...أجل شلون الصغار؟ آسف والله ما امسكهم بعد هالأستهتار والمعامله اللاإنسانيه منكم مافيه خطوط في العالم وحتى السودانيه والصوماليه تسوي كذا وترى كيلنا طفح والمهم خل العيال يتنفسون شوي بدل ماينفجرون من هالصاله قال : هديء نفسك الطياره جايه بعد نصف ساعه قلت : وش هالطياره اللي 8 ساعات جايه ...شكلها ناسيه انها طياره وجايه بر ولا الكابتن حقها جاي من النقل الجماعي وعلى باله باص والمهم جت الطياره الساعه 2 وماوصلت البيت الا الساعه 6 بعد رحله مشئومه في خطوط متخلفه وعايشه في عصر حجري المهم الحين عندي خيارات كثيره وامور أبسويها وابي رايكم 1 - وش رايكم أفصل الرئيس التنفيذي للخطوط السعوديه؟ أو 2- أقفل الخطوط السعوديه كلها واكتب على المطار للتقبيل ؟ ولا 3 - أغير مجلس الإداره ؟ أو 4- أنقل موظفي الخطوط للنقل الجماعي وموطفي النقل الجماعي اوديهم المطار ولا 5 - أقوم أتروش واروح اصلي واطلع الحلقه اشتري خضار وفواكه للبيت ؟ المهم أبي شوركم ومابطلع من شوركم للعلم انا بقوم أجهز للصلاه واطلع للسوق بس هذا مايعني اني ما اقدر أنفذ اللي قلته بس علشان البيت فاضي ولازم أجيب أغراضه ولا لوكان وريتهم شغلهم وما أقول في النهايه الا حسبي الله عليهم ونعم الوكيل وتحياتي لكم وفي رعايه الله وحبيت أجيب هالموضوع علشان اسولف معاكم شوي واهاوش واحش في رعايه الله بالمناسبه الموضوع مكرر على هذا الرابط http://www.qahtaan.com/vb/showthread.php?t=48119 |
رد : الرحله رقم Sv 1696
كل عام ونت بخير
موضوع رائع واعتقد ان الامر طبيعي وانا عندي تفسير ثاني يمكن ربي عاقبك على كذبك في الراحله الاولى فتسببت على المساكين الي معك في الرحله وانلطعوا 8 ساعات وانا عندي حل لك اشتر لك طياره خاصه احسن من التأخير:) :) :) لانه طبعا آخر الحلول دمت بود |
رد : الرحله رقم Sv 1696
الحمد لله على السلامه يابو نواف
بروح أصلي الجمعه ذلحين وبنعود عليك |
رد : الرحله رقم Sv 1696
تركي العلياني
هلا وغلا والله ممكن انه ذنب الذهاب طلع في العوده المهم بعمل بنصيحتك وبشتري طياره جهزوا انفسكم ...نبي سلف لاهنت ياتركي وشكرا لمرورك المميز دائما ------------------------------------------------------------------------- أبو جابر هلا يالغالي والمعذره في التأخير وتقبل الله منا ومنك |
رد : الرحله رقم Sv 1696
الفقعــسة وماتسوي ... كان شغلت الجيب وخذيتها بر ... وش الفلسفة الزاااااايدهـ ...
اقتباس:
نبي المواضيع اللي مثل كذا وانا اخووووكـ ... مانبي الرومنسية ... :) اقتباس:
تقبل مني فـائق التـقـدير و الأح ـترام ... حسين بن فارس الفح ـوس . |
رد : الرحله رقم Sv 1696
أولا : كل عام وأنت بخير
ثانيا: حاجة تعودنا عليها احنا بس أهل الجنوب وخاصة في مطار أبها (الدولي) === قووويه ألا وهي تأخر الرحلات سواء القادمة أو المغادرة لكن مانقول غير حسبنا الله ونعم الوكيل وإن شاء الله تعالى في الخطة الخمسينية القادمة راح ينظرون في هذا الوضع المزري.. ثالثا : أشك والله أعلم إن موضوع الذهاب طلع في العودة. تقبل مروري محمد ال قوت |
رد : الرحله رقم Sv 1696
هلا اخوي حسين بن فارس الفحوس
سرني مرورك وتدري لولك ولولا ردك كان تصرفت بس نعطيعهم فرصه ثانيه تسلم يالغالي وربي يسعدك على طلتك وردك العاطر -------------------------------------------------------------------------------------- الأخ المميز محمد ال قوت كان الله في عونكم وعلى العموم لو ماحلو هالمشكله بس قولي وانا اتصرف بس مابي من اولها ابهذلهم واقطع رزقهم تسلم يالغالي حضور وردود ومواضيعك مميزه من المميز والمبدع محمد ال قوت لاعدمتك |
رد : الرحله رقم Sv 1696
يامنصور
حرااام يالاستراحه ما لها طعم من غير مداخلاتك الجميله وجودك في المجالس يأثر أيجاباً على الاعضاء وأنا منهم وفي الحقيقه بلشنا بالمجلس في غيبتك نحن متواجدين دايم ولا علينا خلاف في ذالك ولاكن ردودك ومواضيعك الجيده والمحركه للمجلس صعب تعويضها نحن نقول لك ذا الكلام علشان نثقلك معنوياً ونت ماتقصر وسلامة الاسفار يابو نواف :) |
رد : الرحله رقم Sv 1696
منصور
تصدق موضوع حلو كيف سويت؟؟ خخخخخخخخخخخخخخخخخخخخخخخخخخخخخخخخخخخخخخخخخخخخخخخخخخ خخخخخخخخخخخخخخخخخخخخخخخخخخخخخخخخخخخخخخخخخخخخخخخخخخ خخخخخخخخخخخخخخخخخخخخخخخخخخخخخخخخخخخخخخخخخخخخخخخخخخ خخخخخخخخخخخخخخخخخخخخخخخخخخخخخخخخخخخخخخخخخخخ |
رد : الرحله رقم Sv 1696
مــــــن طـــلـــــــبــــــــك عــــلـــــمـــــــــــك
ومن اللي طلبك قصت حياتك هههههههههههههههههههههه خخخخخخخخخخخخخخخخخخخخخخخخخخخخخخخخخخخ وهع هع هع هع هع هع هع حقت عبدالوهاب ههههههههههه الحمد لله على السلامه وخارجن من الشر ولا تعبوا اهل الخطوط منك ومن عيالك واثرهم طالعين على ابوهم مزعجين خخخخخخخخخخخخ الله يعقل عليك بهم ويحفظهم لك ويخليك لهم وكل عام وانت بخير والخطوط هذي عوايدهم يعني ما جبت شئ جديد <<<<<<<<< ما هو تحطيم هههههههههههه والله يحييك في محلك وكلام ابوجابر صحيح مليووووووون في الميه يعني لك وزنك في المنتدى <<<<<<< بس لا احدن يضاير ؟؟؟:021: :021: :021: |
| الساعة الآن 12:17 AM |
Powered by vBulletin® Copyright ©2000 - 2025, Jelsoft Enterprises Ltd. TranZ By
Almuhajir
جميع الحقوق الأدبيه والفكرية محفوظة لشبكة قحطان وعلى من يقتبس من الموقع الأشارة الى المصدر
وجميع المواضيع والمشاركات المطروحه في المجالس لاتمثل على وجه الأساس رأي ووجهة نظر الموقع أو أفراد قبيلة قحطان إنما تمثل وجهة نظر كاتبها .
Copyright ©2003 - 2011, www.qahtaan.com