|
ابداع معاق
هذه احد ابداعات احد الاطفال المعاقين في هذا البلد الكريـــــــــــــــم
اعجبتني فنقلتها طويلة ولكن رائعة ابكتني عند قرائتها الطفوله .. أحلى مافي هالحياة مرحله من غير هم كنـّا دايم نبتسم كنـّا حتى لو بكينا ... وجارت الدنيا علينا بعد لحظـات وثواني ... بسمه فينا ترتســم كنـّا نركض خلف كورة ... لا لا أنا ماكنت معهم؟ وحدي بس بعيد عنهم ... كنت أضحك من ضحكهم ... جالس لحالي أهذري!... جالس أحسب كم( كُوبري )*... صلـّحه( أحمد ) في ( ماجد ) ؟؟ والله واجد!! وقبل ما يحل الظلام ... للبيوت نروح نجري ... لا لا أنا ماكنت معهم ! أمشي وحدي بعيد عنهم ... أمشي وأعدد أثرهم! وهم عني يبعدون ... يبعدون ... يبعدون ... إلا( ماجد )! كان مثلي حيل ضايق ... بس حزنـي كــان حارق كان يسألني ببراءه : ... ليه تعرج ؟ ... قلت مادري ! - باستياء - ليش تبكي ؟ قلت مابكي - بكبرياء - ضاق مني ... ثم سألني في غباء ... قال ( وثرايك تـثــابق )؟ وراح عنــّــي ... !! . ------------ . كنت أسأل دوم نفسي ... ليش ما أركض معاهم ؟؟ ليش دوم أمشي وراهم ؟؟ وش بلاي ؟؟ أو وش بلاهم ؟؟ ليه أنا غير الأنام ؟؟ زاحمتني الأسئله... كل شيٍ أجهله ؟ وإن تعبت من الإجـــابه... أحظن الحيـــره وأنام . . ------------ . مرّت سنين وكبرت ... صار همّي اليوم أكبر حتى دمعي صار أكثر للأسف توي قدرت ... أفهم إني شخص ( عاجز )! يعني بيني وبينكم مليون حاجـــز !!! صدقوني ذي حقيقه ... لا طلعت السوق ... كل مامشي دقيقه القى كل شوي أبله ! يمشي ويناظر صديقه ... ويغمز له يقول : ناظر...! وش يناظر ؟؟ وتتفجّــر في خفوقي ألف ضيقه ووحدة في وسط الزحام ... طالعتني باهتمام ... بنت في عمر الزهور ... أي رشاقه ... وأي أناقه ... وأي عطـــور !! قلت في نفسي ياهووووه هي تناظرني بغرام ؟ أو هي نظره والسلام ؟ بس أكيد إنها تعرفني ... شايفتني ؟ شايفتني في جريده ؟ واعجبتها لي قصيده ؟ إيييييه أنا توي افتكرت ... لي قصيده ... كنت ناشر معها صوره بس صوره ... ياسلااااا م وفاجأتني ... لمـّا صارت لي قريبه ... كانت تـتمـتم بطيبه ( يكسر الخاطــر حـــرااااام ) !!!!! وتركت دمعه غريبه ... وضاعت بوسط الزحــام دمعه كانت تحكي وضعي ... زلزلتني ارتطم قلبي بضلعي ... دمرتني صدقوني ... أصعب اللحظــات وأقسى لاغدا الرجـّــــال يكسر ... خاطر انثى كيف ينسى ؟؟؟ جاوبوني ! . ------------ . وزاد همّــي ... يوم فكــّـرت بوظيفه ... ثم زواج أي وظيفه ... وأي زواج ؟؟ اللــي مثـلي ... مهما طالب ... لويلف ولو يدور زين لو حطـــّــوه كــاتب لا ... وعلى بنــد الأجـــــــور ... ماهو رسمي !!! صدقون لو تدرّج ... وصار راتبه يتصاعد وابتــدا وضعه يزين ما أظنه بيتزوّج ... إلا من بعد التقاعد من سنه الى سنتين ! . ------------ . وفي النهــايه ... يابلــدنا... مهما كانت تسميتـنا عاجزين ... معوّقين لك عهدنا... وذا قسمنا: أقسم بالله العظيم ... منزل الذكر الحكيم أن أصونــك يابلادي ... من شرور العابثين من مطامع كل حاسد ... من نوايا كل فاســد وإني لك حصن ٍ حصين إنتي ناديني وشوفي ... لا نويتي بالجهاد والله أقهر لك ظروفي ... دامك إنتي لي بــــلاد وباسم كل العاجزين ... دام فينا أصبع يطول الزنـــاد لا يهمــّـك يابلادي ... وازهليهــــــــا . |
يا سلام عليه هذا طفل عزيمته اتكسر جبال الله يجبر بخاطره ويلبي له كل شي يتمناه...
ومشكور يا ابن شويه على هذي المشاركه الرئعه... اخوك شيخ المهادية |
شيخ المهادية
الله يسمع منك مرورك اروع لاهنت لاهنت |
ابن شويه ... سلمت ..والله سلمت
يعطيك العافيه على نقل مثل هذا الموضوع وفعلآ ..اعزومه ذالغليم ..قويه ..الله يعافيه ويعافي مرضى المسلمين.... ومشكور ....الغالي ابن شويه اخـــوك خـــــالـــد |
اللهم امين
تسلم ياخالد |
القصيده للمبدع محمد عويضه
ولاهنت يا ابن شويه |
[grade="00BFFF 4169E1 0000FF"]أخوي أبن شوية 000 لا هنت على هذه المشاركة القيمة 000 وفعلاً لوحة أدبية راقية 000 شكراً لك مرة أخرى على إيرادها للمنتدى 000 يا مبدع. أخوك :[/grade] |
علي
القايل مايهون وشكرا على ذكر الشاعر @@@@@@@@@@@@@@@@@@ االنهاري القايل مايهون وشكرا على اطرائك @@@@@@@@@@@@@@@ اخوكم/ ابن شويه |
| الساعة الآن 02:27 PM |
Powered by vBulletin® Copyright ©2000 - 2024, Jelsoft Enterprises Ltd. TranZ By
Almuhajir
جميع الحقوق الأدبيه والفكرية محفوظة لشبكة قحطان وعلى من يقتبس من الموقع الأشارة الى المصدر
وجميع المواضيع والمشاركات المطروحه في المجالس لاتمثل على وجه الأساس رأي ووجهة نظر الموقع أو أفراد قبيلة قحطان إنما تمثل وجهة نظر كاتبها .
Copyright ©2003 - 2011, www.qahtaan.com