شبكة قحطان - مجالس قحطان - منتديات قحطان - البنقاله وغشهم في محطات البنزين

- المجلس الـــــعــــــــام (https://www.qahtaan.com/vb/forumdisplay.php?f=2)

- - البنقاله وغشهم في محطات البنزين (https://www.qahtaan.com/vb/showthread.php?t=37074)

البنقاله وغشهم في محطات البنزين

بسم الله الرحمن الرحيم

أعضاء المنتدى الكرام

السلام عليكم ورحمة الله وبركاته

اليوم وأنا أسولف مع واحد من الربع عن الغش في محطات البنزين وجرياتهم اللي يسوونها في زباينهم طريتوا على بالي لأنكم عوال العم وما أرضا ان البنقاليه يلعبون عليكم ، المهم هذي سالفه صايره علي من حوالي شهرين تقريباً كنت ابغى اعبي الموتر بنزين وتعرفون المحطات فيها مضخات 91 و 95 وأنا موتري يصلحله 95 ويوم اني جيت للمحطه إلا والبنقالي يأشر لي يقول قدم للمضخه الأخيره عشان اللي أنا واقف عندها يقول ما فيها بنزين قضت ، قال: كم صديق؟ قلت: عبي بـ 20 ويوم انه عبى جاني بياخذ الدراهم ..... وشي بداخلي يقول يا ولد البنقالي ذا مهوب مضبوط خلني ادقق وراه......ويوم اناظر إلا وأحصل معبي بعشره.....وامسكه واقوله ليه عبيت بعشره وانا قايلك بعشرين قال صديق أنا ما في معلوم أنت فيه كلام عشره....وقلت دامك سمعت اني قايلك بعشره ورى مارجعت عشره.....عاد تعرفون البنقالي إذا سوا نفسه ما يعرف عربي......وإلا يجيني خويه الثاني ويقول خلاص صديق أنا في عبي بعشره أنت ما في زعلان......وأنتهت القصه على هالوضع.

وهذي سالفت خويي ولأنها ما صارت علي بأختصرها......يقول مره من المراريت كان يبي يعبي بنزين والموتر بنزينه للنص ويوم انه جاء للمحطه قال للبنقالي عبي فل......وخويي يقول موتري تانكيه يشيل حدود الـ50لتر ويوم انه قضى قال صديق 23 قلت وليه ثلاث وعشرين أنا أفلل والموتر مافيه قطره بـ 25 ........ وطلع عند البنقاليه حركه ما يصفرون العداد ويحسب القيمه اللي انت عبيتها مع اللي معبي قبلك........عاد خويي يبي يفرسه وإلا هنا ناس يفرقون ...... والله ويجيه بنقالي ثاني ويعطيه الباقي بدون الإضافات......وسلامتكم

الفائده من هالموضوع:
1-لا تعبي بنزين إلا في مضخه تشوف العداد حقها.
2-تأكد أنه صفر العداد.

أتمنى أن أكون وفقت في طرح الموضوع مع أني متوقع انتقاد منكم في اللغه (مره عاميه ومره عربيه فصحى) لكن استروا ما واجهتوا.........واللي عنده قصه مع المحطات لا يبخلبها علينا.

دمتم بود

اخوكم / سلمان القحطاني