بسم الله


نص أول . . متواضع

اتمنى ان يحوز على رضا النخبة هنا . .

.
.
[poem=font="Simplified Arabic,5,black,normal,normal" bkcolor="transparent" bkimage="" border="double,4,black" type=1 line=0 align=center use=sp num="0,black"]
نصايحي للشباب وجيلي الحالي =نصايحٍ في ثنايا بدع الامثالي
نصيحتي لكل عـــاقل يتسمعني =واللي بلا عقل لاماله ولا مـــالي
نصيحتي الدين وتقوى الله والسنة =وصلاة ربي تراها خير الأعمـالي
افطن لها يافطين القلب واحفظها=تحفظك في يوم تشخص به وتهتالي
وحذراك تترك صلاتك أو تأخرها =واحذر عليها وأنا احذرك الأهمالي
ونصيحتي الوالدين وبرهم واجب =لن برهم مقترن بعبادة الوالي
ولاتقل اف لأحدهما ولاتنهــر =واخفض لهم من جناح الـــذل اذلالي
في طاعة الوالدين تِيَسّر امورك =يقوم حظك وتصبح طيـــب الفالي
ونصيحتي بالقرابة ووصل الارحامي=لاتقطع الوصل فيقطع ربي التالي
ونصيحتي الجار وصى به رسول الله =أحسن جوارك وخلك دوم حمالي
ونصيحتي بالجماعة محزم لظهرك =وعصـابة الرأس لامن الزمن مالي
لاتطق شور الجماعة وتغدي اجرب =تنحاز عن لابتك وتصير في جالي
مع الجماعة وخل ايديك بيديهم=ماللرجل غير ربعه زبن واظلالي
ونصيحتي خوة المنعور والمطلق=اللي غداله مع اهل الطيب منزالي
إليا نصيته لقيته فاتح(ن)بابه =يقضي لزومك وصيته بالكرم عالي
يزيح عنك الهموم ويرتكي لحملك =ويشل عنك الحمول ولو هي اثقالي
هذاالذي خوته تسر واتنومس=وتجارة(ن) رابحة والمكسب الغالي
وحاذرك من خوة الهلفوت والدوني =اللي علومه كذاب وكلها هزالي
بوقت الرخا فارس(ن)وشجاع وملسن=وفي حزة الضيق ياكثر التملمالي
هذاك مايفرحك شوفه وجياته=ولايفرحك عيشة اللي مثله أنذالي
ونصيحتي لالفاك الضيف رحب به =واثن التراحيب واكثر من التهلالي
وقدم له البن الاشقر والحساوية =وفل الحجاج وتخيّر زين الاقوالي
وكرامة الضيف واجب لاتأخرها=اذبح له الحايل اللي تشرح البالي
ونصيحتي الشور لاتأخذه من جاهل=ولاتأخذه من ردي الفعل محتالي
بل استشر شايب(ن)مجرب وعارف =قد جرب المر في دنياه والحالي
ونصيحتي فالقناعة كنز لايفنى= أن اشهد إن القناعة خير الاموالي
ونصيحتي في علوم الطيب طبقها=وخلك مع الاول ولاتصير فالتالي
ولاتترك أحد(ن) ابد يسبقك للعليا=ولاتقول أنا بفعل الطيب ان تهيالي
الطيب والمرجلة بفعلك تحصلها=وخلك لفعل الجمايل عد منهالي
ونصيحتي لا لفيت المجلس العامر=خلك رزين(ن) وقولك قول عقالي
حاذرك يكثر كلامك وماحد ناشك=الرجل صندوق محكوم(ن) بالاقفالي
ونصيحتي لانكحت فدور المنسب =وانشد عن الأب والاعمام والخالي
وعليك باللي نسبهم كنه النجمة=تشع نور(ن) وفي عالي السما تلالي
عليك ببنت الكريم المطلق الذربي =اللي يفك النشب ويزبن الجالي
ياتي ولدها شجاع واتفاخر به=ويصير لك عزوة لاصار رجالي
واحذر من اللي رديات مناسبهم =اللي آذاهم على الاقراب نزالي
اهل الردى والفشيلة لاتناسبهم =ترى نسبهم يجر لشر واهوالي
وإن كان ربي حماك شرور صهرتهم =بيأتي ولدها ردي وزايد هبالي
ونصيتحي الكِبر لايدخل إلى قلبك=ولاتمش في الارض مرحاً وانت تختالي
الكبروصف(ن)من اوصاف العليم الله=اختص به واحد على العرش متعالي
نصايح(ن) قلتها واعدّها عدي =وقبلي كثير من الشعار قد قالي
عقد(ن)نضمته من القيفان بأفكاري =جسدت فيه النصايح كنها اللالي
والشاعر الياطرى له طاري(ن) يبدع =والا يّذكر بشيئاً فيه إدلالي
هذاوأنا ماأدعي بالعرف والصفوة=ولاشاب رأسي ولاعاصرت الاجيالي
توي صغيّر ولكن عقلي مفكر=واشوف شيئاً بعيني مايورالي
اشوف ناس(ن) دروب الحق تِجَنّبها=وتتبع دروب بها ياكثر الاضلالي
واشوف جيل(ن)نسى تاريخ جدانه =يتبع ورى الموضة الوان(ن)واشكالي
يهتم في المنظر الخداع والكاذب=ويطرب على قولته ياليل يالالي
هذا اللي هاض الهجوس وبيّح بسدي =وخلا بيوت القصيد الجزل تبرالي
وختامها عد مايبرق ويرعد به =وعداد ماهل من الأمزان همالي
صلاة ربي ورضوانه وتسليمه =على الذي قد ختم به ربي الارسالي [/poem]


وسلامتكم

اخوكم

سعـد بن حوفان الوهابي

الغالي

عاشق الوطن

صح بدنك

ولاهنت على الاطراء والمرور

وبيض الله وجهك

ولاعدمت تواصلك

احتراماتي

اخيك